इरानमाथि नेपालको सानदार जित

काठमाडौं । उन्नाइस वर्षमुनि एसिसी यू-१९ प्रिमियर कप क्रिकेट प्रतियोगिताको पहिलो खेलमा नेपालले इरानलाई पराजित गरेको छ । मलेसियाको बान्गीमा बिहीबार भएको खेलमा नेपालले इरानलाई दुई सय ७४ रनले पराजित गरेकोे हो । जितका लागि ३५४ रनको विशाल लक्ष्य पछ्याएको इरान ३० दशमलब पाँच ओभरमा सबै विकेट गुमाउँदै ७९ रनमा समेटियो ।

इरानका लागि आमेर खोर्सन्दले ३७ रन बनाउनुभयो । उहाँले २२ बलमा एक चौका र पाँच छक्कासहित ३७ रन बनाउनुभएको हो । साबेर इब्राहिमपुर ४३ बलमा एक चौकासहित ११ रनमा नटआउट रहनुभयो । त्यसबाहेक अन्य इरानी ब्याटरले दोहोरो अंकमा रन बनाउन सक्नुभएन ।

इरानलाई सस्तैमा समेट्ने क्रममा नेपालका दीपेश कँडेल र सुवास भण्डारीले समान तीन-तीन विकेट लिनुभयो । त्यस्तै हेमन्त धामी र आकाश चन्दले समान दुई-दुई विकेट झार्नुभयो । त्यसअघि टस हारेर पहिले ब्याटिङ गरेको नेपालले ४० दशमलब एक ओभरमा सबै विकेट गुमाउँदै तीन सय ५३ रनको योगफल बनाएको थियो । नेपालको इनिङमा कप्तान देव खनालले शतक प्रहार गर्नुभयो भने दीपक बोहरा र दीपकप्रसाद डुम्रेले अर्धशतक बनाउनुभयो ।

तेस्रो नम्बर क्रिजमा आउनुभएका कप्तान देवले ५०औँ बल खेल्दै १२ चौका र चार छक्काको मद्दतमा एक सय रनको योगदान दिनुभएको हो । त्यस्तै दीपक बोहराले ५९ बलमा ६५ रन बनाउनुभयो । उहाँले चार चौका र दुई छक्का हिर्काउनुभएको थियो । पाँचौँ नम्बर क्रिजमा पुग्नुभएका दीपक डुम्रेले ४४ बलमा ६९ रन बनाउनुभयो । देव र दीपकले तेस्रो विकेटका लागि एक सय ६६ रनको साझेदारी गर्नुभएको थियो ।

यसैगरी दीपेश कंँडेलले २९, हेमन्त धामीले २३, आकाश चन्दले १९ रन तथा सुभास भण्डारीले १८ रन जोड्नुभयो । इरानका द्रहमान राइसीले र सलमान निज्मान्दले समान तीन-तीन विकेट लिनुभयो भने शेखी र जियाद राइसीले समान दुई-दुई विकेट लिनुभयो । अब नेपालले दोस्रो खेल यही असोज २८ गते बहराइनसँग खेल्नेछ ।
प्रतियोगितामा शीर्ष तीन टोलीले पाकिस्तानमा आगामी डिसेम्बरमा हुने एसिया कप खेल्न पाउनेछन् । एसिसी प्रिमियर कप क्रिकेट प्रतियोगितामा एसियाका विभिन्न १६ एसोसिएट टोलीले प्रतिस्पर्धा गर्दैछन् । सो प्रतियोगितालाई विभिन्न चार समूहमा विभाजन गरिएको छ ।

समूह ‘ए’ मा नेपालसहित बहराइन, साउदी अरेविया र इरान छन् भने समूह ‘बी’ मा युएई, ओमान, कतार र चीन छन् । त्यसैगरी समूह ‘सी’ मा सिंगापुर, कुवेत, थाइल्याण्ड र माल्दिभ्स तथा समूह ‘डी’ मा हङकङ, मलेसिया जापान र इण्डोनोसिया छन् । प्रतियोगिताका शीर्ष तीन टोलीले आगामी डिसेम्बरमा पाकिस्तानमा हुने यू-१९ एसिया कप खेल्न पाउनेछन् ।

देवको दोस्रो शतक
यसै खेलमार्फत् शतक प्रहार गर्दै नेपाली कप्तान देव खनाल नेपालबाट यू-१९ क्रिकेटमा दुई शतक हान्ने पहिलो नेपाली खेलाडी बन्नुभएको छ । देवले ६० बलमा १२ चौका र ४ छक्कासहित १ सय रन जोड्नुभएको थियो ।

उहाँले यसअघि गत फागुनमा आइसिसी यू-१९ विश्वकप एसिया क्षेत्र छनोटमा कुवेतविरुद्ध १ सय १७ बलमा ९ चौका र ३ छक्कासहित १ सय २५ रनको शतकीय इनिङ खेल्नुभएको थियो । त्यसपछि उहाँले यो शतक हिर्काउनुभएको हो ।

नेपालबाट यसअघि एकै उमेर समूहमा कुनै पनि खेलाडीले दुई शतक हिर्काउनुभएको थिएन । यसअघि रित गौतमले भने यू-१६ र यू-१९ दुवै फम्र्याटमा नेपालका लागि शतक हिर्काउनुभएको छ । नेपालबाट यू-१९ क्रिकेटमा शक्ति गौचन, कनिष्क चौलागाई, राजु रिजाल, रित गौतम, अर्जुन कुमाल र देव खनालले शतक प्रहार गर्नुभएको छ ।