भूकम्पले जाजरकोट र रुकुम (पश्चिम) भताभुंग, हजारौँ घर भत्किँदा पीडितलाई खानबस्नकै समस्या

डिबी शर्मा/जिल्ला ब्युरो/हिटा
काठमाडौं । जाजरकोट केन्द्रबिन्दु भएर गएको शक्तिशाली भूकम्पले कर्णाली प्रदेशका दुई जिल्ला तहसनहस भएका छन् । शुक्रबार राति गएको भूकम्पले जाजरकोट र रुकुम (पश्चिम)मा ठूलो जनधनको क्षति भएको हो । शुक्रबार राति ११ बजेर ४७ मिनेटमा जाजरकोटको रामीडाँडा केन्द्रविन्दु भएर ६ दशमलव ४ म्याग्निच्युडको शक्तिशाली भूकम्प गएको थियो । भूकम्पको धक्का पश्चिम नेपालका अधिकांश जिल्ला हुँदै भारतको राजधानी नयाँदिल्लीसहित काठमाडौंसम्म महसुस गरिएको थियो । सो भूकम्पपछि शनिबार अबेरसम्म १८० भन्दा धेरै साना परकम्प मापन भइसकेको भूकम्प मापन केन्द्रले जनाएको छ । भूकम्पले जाजरकोट र रुकुममा अकल्पनीय क्षति गरेको छ । विकटमा रहेका दुई जिल्लामा ठूलो माननीय र भौतिक क्षति गरेको छ । राति सबै सुतेको समयमा गएको भूकम्पले ठूलो मानवीय क्षति गरेको हो । मध्यरातमा गएको भूकम्पका कारण मानवीय क्षति बढी भएको भूगर्भ विभागका भूकम्पविद् मुकुन्द भट्टराईले बताउनुभयो । राति सबै सुतेको बेला भूकम्प गएपछि मानिसहरू बाहिर निस्किनै नपाएको उहाँको भनाइ छ ।

शनिबार अबेरसम्म डेढ सय बढी मानिसको मृत्यु पुष्टि नेपाल प्रहरीले जनाएको छ । प्रहरी हेडक्वार्टरको तथ्यांकअनुसार सबैभन्दा धेरै जाजरकोटमा सय बढीले ज्यान गुमाएका छन् । जाजरकोटपछि रुकुममा धेरै क्षति भएको छ । घाइतेको उद्धार र उपचार जारी रहेकाले मृतकको संख्या अझै बढ्नसक्ने अनुमान गरिएको छ । भूकम्पका कारण सयौँ मानिसहरू घाइते भएका छन् । घाइतेको अवस्थाअनुसार स्थानीय अस्पतालदेखि काठमाडौंसम्म उपचार भइरहेको छ ।

मानवीयसँगै दुई जिल्लामा ठूलो भौतिक क्षति भएको छ । यकिन विवरण आउन बाँकी रहे पनि हजारौँ घरहरू भत्किएको स्थानीय पालिका प्रमुखहरूले जानकारी दिएका छन् । जिल्लाको भूकम्पको केन्द्रबिन्दु रहेको जाजरकोटको बारेकोट गाउँपालिकामा मात्रै एक हजार बढी घर भत्किएका छन् । पालिकामा हजारौँ घर भत्किए पनि ठूलो मानवीय क्षति भने नभएको गाउँपालिका अध्यक्ष वीरबहादुर गिरीले जानकारी दिनुभयो । उहाँका अनुसार भूकम्पको कम्पन लामो समयसम्म रहेकाले मानिसहरू सुरक्षित घरबाहिर निस्किन सफल भएका थिए । दुई जिल्लाका विभिन्न ठाउँमा हजारौँ घरहरू भत्किँदा पीडितलाई गाँसबासकै समस्या भएको छ । ठूलो क्षति र प्रभावित धेरै भएकोले तत्काल अस्थायी बासस्थानको व्यवस्था गर्नसमेत गाह्रो भएको छ ।

भूकम्पबाट सबैभन्दा बढी जाजरकोटको नलगाड नगरपालिकामा क्षति भएको छ । नगरपालिकामा उपप्रमुखसहित ५० जनाको मृत्यु भएको छ । वडा नम्बर १ मा सबैभन्दा बढी क्षति भएको वडाध्यक्ष बद्रबहादुर पन्तले जानकारी दिनुभयो । उहाँका अनुसार वडामा मात्रै २२ जनाको ज्यान गएको छ । भूकम्पका कारण रुकुम पश्चिममा एउटै वडाका २७ जनाको मृत्यु भएको छ । नगरपालिका प्रमुख रवि केसीका अनुसार आठबीसकोट नगरपालिका-१४ मा २७ जनाको ज्यान गएको हो । वडाको बाँकेडाँडा, हल्देटोल, ज्यामिरकोट, छेपारे, बाँकेटोल र पीपलचौरसहितका गाउँमा मात्रै २७ जनाको मृत्यु भएको उहाँले बताउनुभयो । नेपाली सेना, नेपाल प्रहरी, सशस्त्र प्रहरी, स्थानीय, राजनीतिक दलका कार्यकर्तालगायत उद्धारमा खटिएका छन् । नेपाली सेनाले तीनजना डाक्टरसहित मेडिकल टिम प्रभावित क्षेत्रमा परिचालन गरेको छ ।
नेपाल आयल निगम लिमिटेडले भूकम्प प्रभावितको उद्धारमा परिचालन भएका हवाई जहाज र हेलिकप्टरकोमा प्रयोग हुने इन्धन खर्च बेहोर्ने घोषणा गरेको छ । निगमले शनिबार एक विज्ञप्ति जारी गर्दै विपद्को घडीमा भूकम्प प्रभावित क्षेत्रमा राहत तथा उद्धार कार्यमा खटिएका नेपाल एयरलाइन्स र नेपाली सेनाको हवाईजहाज एवं हेलिकप्टरमा प्रयोग हुने हवाई इन्धन बापतको खर्च बेहोर्ने घोषणा गरेको हो ।

प्रभावित क्षेत्रमा प्रधानमन्त्री, राहत र उद्धारमा हातेमालो गर्न अपिल
प्रधानमन्त्री पुष्पकमल दाहाल ‘प्रचण्ड’ले भूकम्प प्रभावित क्षेत्रको अवलोकन गर्नुभएको छ । शनिबार बिहानै उहाँ प्रभावित क्षेत्रमा पुग्नुभएको हो । प्रभावित क्षेत्रमा पुगेर उहाँले स्थलगत अवलोकन गर्नुका साथै पीडितलाई समेत भेट्नुभएको छ । उहाँले अस्पतालमा उपचाररत घाइतेलाई समेत भेट्नुभएको छ । प्रभावित क्षेत्रमा पुग्नुभएका प्रधानमन्त्री प्रचण्डले क्षतिको अवस्था बुझ्दै उद्धार, राहत र उपचारमा कुनै कसर बाँकी नराख्न सम्बन्धिन निकायलाई निर्देशन दिनुभएको उहाँको सचिवालयले जनाएको छ । भूकम्प पीडितलाई भेटेर प्रधानमन्त्री प्रचण्डले सरकार साथमा रहेको बताउनुभएको छ । सरकारले खोज, उद्धार र उपचारलाई व्यवस्थित गरिरहेको बताउँदै प्रधानमन्त्री प्रचण्डले नआत्तिन घाइते र प्रभावितलाई आग्रह गर्नुभएको हो । ‘भूकम्पले गरेको क्षतिप्रति हामी दुःखी छौँ । सरकारले तपाईंहरूको लागि उद्धार, राहत र अन्य विभिन्न कार्यक्रम गर्नेछ । तपाईंहरू नआत्तिनुहोला,’ प्रभावित क्षेत्रमा पुग्नुभएका उहाँले भन्नुभयो । उहाँ आफूले चढेको हेलिकप्टर उद्धारमा छोड्दै जहाजमार्फत काठमाडौं फर्किनुभएको छ । नेपाली सेनाको हेलिकप्टरमार्फत प्रभावित क्षेत्रको अवस्था बुझ्न ती क्षेत्रमा जानुभएका प्रधानमन्त्री नेपालगञ्जबाट नियमित उडानबाट काठमाडौं फर्किनुभएको हो ।

प्रधानमन्त्री ‘प्रचण्ड’ले भूकम्पपीडितको राहत र उद्धारमा सहकार्य र हातेमालोका लागि अपिल गर्नुभएको छ । शनिबार भूकम्प प्रभावित जिल्लाको निरीक्षणमा पुग्नुभएका प्रधानमन्त्री प्रचण्डले सम्पूर्ण राजनीतिक दल, निजी क्षेत्र, नागरिक समाजलगायत सबैमा पीडितको राहत र उद्धारमा सहकार्य र हातेमालोका लागि अपिल गर्नुभएको हो । पीडितलाई राहत र पुनस्र्थापना एवं घाइतेहरूको उपचारका लागि सरकार गम्भीर रहेको उहाँले बताउनुभएको छ ।

आजदेखि राहत र पुनःस्थापनामा लाग्छौँ : प्रधानमन्त्री
प्रधानमन्त्री प्रचण्डले भूकम्प प्रभावितलाई राहत र पुनःस्थापनामा सरकारले कुनै कसुर बाँकी नराख्ने बताउनुभएको छ । शनिबार भूकम्प प्रभावित क्षेत्रको अवलोकन गरेर फर्किनुभएका प्रधानमन्त्री प्रचण्डले नेपालगञ्ज विमानस्थलमा मृतकहरूप्रति श्रद्धाञ्जलि व्यक्त गर्दै घाइतेहरूको स्वास्थ्यलाभको कामना गर्नुभयो । उहाँले शनिबार सरकारको तर्फबाट गर्नुपर्ने सबै गरिएको बताउनुभयो । अब आज (आइतबार)देखि राहत तथा पुनःस्थापनामा जुट्ने उहाँले बताउनुभयो । ‘आइतबार बिहान ८ बजे मन्त्रिपरिषद्को बैठक बोलाइसकेको छु, त्यसपछि विपद् व्यवस्थापनको बैठक बसेर राहत र पुनःस्थानाको काममा लाग्छौँ’, प्रधानमन्त्री प्रचण्डले भन्नुभयो । भूकम्पपछिको क्षतिको प्रारम्भिक विवरण संकलनपछि आइतबार बिहान ८ बजे बस्ने गरी मन्त्रिपरिषद्को बैठक बोलाइएको छ ।

घाइतेहरूको उपचार निःशुल्क गर्ने
स्वास्थ्य तथा जनसंख्यामन्त्री मोहनबहादुर बस्नेतले भूकम्पमा परेर घाइते भएकाहरूको उपचार सरकारले निःशुल्क गर्ने बताउनुभएको छ । स्वास्थ्यमन्त्री बस्नेतले घाइतेहरूको उपचारका लागि स्वास्थ्यकर्मीहरूको टोली घटनास्थल पठाइसकिएको जानकारी दिँदै आवश्यकताअनुसार थप उपचारका लागि औषधिसहित चिकित्सकको टोली तयारी अवस्थामा राखिएको जानकारी दिनुभयो । त्यहीँ उपचार गर्नुपर्ने घाइतेहरूको उपचार त्यहीँ गर्छौं, त्यहाँ उपचार सम्भव नहुनेलाई हेलिकप्टरबाट भए पनि सुविधासम्पन्न अस्पताल ल्याएर उपचार गर्छौं,’ उहाँले भन्नुभयो, ‘उपचारमा कुनै कमी हुनेछैन ।’ मन्त्री बस्नेतले प्राकृतिक विपत्तिका बेला सरकारले उपचारमा कुनै कमी हुन नदिने जानकारी दिनुभयो ।

भूकम्प प्रभावित जाजरकोट र रुकुम पश्चिममा सरकारले पाँच/पाँच करोड पठाउने
सरकारले जाजरकोट र रुकुम पश्चिमको भूकम्प प्रभावित क्षेत्रमा खोज, उद्धार तथा उपचारका लागि जिल्ला विपद् व्यवस्थापन कोषमा पाँच÷पाँच करोड रुपैयाँ पठाउने भएको छ । भूकम्प प्रभावित क्षेत्रमा खोज, उद्धार तथा उपचार कार्यलाई पहिलो प्राथमिकता दिने भन्दै तत्कालको राहतका लागि स्वीकृत मापदण्डबमोजिम खर्च गर्ने गरी जाजरकोट र रुकुम पश्चिमको जिल्ला विपद् व्यवस्थापन कोषमा पाँच÷पाँच करोड पठाइने रकम राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।

उपप्रधानमन्त्री तथा गृहमन्त्री नारायणकाजी श्रेष्ठको नेतृत्वमा बसेको प्राधिकरणको बैठकले राहत पठाउने निर्णय गरेको हो । बैठकले घाइतेको तत्काल औषधि उपचारको व्यवस्थाका लागि आवश्यक पर्ने औषधि तथा विशेषज्ञ चिकित्सकसहितको जनशक्ति, अत्यावश्यक औषधि उपकरणहरू तत्काल परिचालन गर्ने निर्णय गरेको छ ।

प्राथमिक राहत व्यवस्थापनका लागि खाद्यान्न, अस्थायी आवास (टेन्ट, त्रिपाल, कम्बल, म्याट्रेस, स्लिपिङ ब्याग आदि), सुर्खेत, नेपालगञ्ज र काठमाडौंमा रहेका भण्डारणबाट भूकम्प प्रभावित जिल्लाको आवश्यकताका आधारमा तत्काल परिचालन गर्ने निर्णयसमेत भएको छ । तत्काल द्रुत लेखाजोखा कार्यका लागि नेपाल रेडक्रसले जिल्ला विपद् व्यवस्थापन समितिसँगको समन्वयमा तालिम प्राप्त जनशक्तिसमेत खटाउने निर्णय गरेको छ । भूकम्पका कारण अवरुद्ध भएका सडक तत्काल खुलाउन सडक विभागले आवश्यक व्यवस्था मिलाउने भएको छ ।

खोज, उद्धार र राहतका लागि जिल्ला विपद् व्यवस्थापन समितिमार्फत एकद्वार प्रणाली अवलम्बन गर्ने साथै सहयोग गर्ने सबै व्यक्ति तथा निकायहरूले सोही संयन्त्रसँग समन्वय गरी सहयोग गर्ने व्यवस्था मिलाउने निर्णय पनि भएको छ । प्रभावित क्षेत्रमा त्रिपाल, कम्मल र खानेकुराको व्यवस्था गर्ने, आवश्यक परे थप पठाउने उपप्रधानमन्त्री श्रेष्ठले बताउनुभयो । छिमेकी तथा अरू देशले पनि आवश्यक सहयोग गर्ने वचन दिएको भन्दै आवश्यक परे सरकारले आग्रह गर्ने उहाँले बताउनुभयो ।

जुट्दै राहत : प्रदेश सरकारको अग्रसरता
जाजरकोट केन्द्रबिन्दु भएर गएको भूकम्प प्रभावितका लागि विभिन्न क्षेत्रबाट राहत जुटिरहेको छ । संघीय सरकारदेखि प्रदेश र स्थानीय सरकारहरूले समेत धमाधम सहयोग घोषणा गरेका छन् । यस्तै, निजी क्षेत्रले समेत सहयोग घोषणा गरेको छ । लुम्बिनी प्रदेश सरकारले भूकम्प प्रभावितका लागि डेढ करोड रुपैयाँ आर्थिक सहयोग गर्ने भएको छ । शनिबार तुलसीपुरमा बसेको प्रदेश सरकार मन्त्रिपरिषद्को बैठकले डेढ करोड सहयोग गर्ने निणर्य गरेको प्रदेश सरकारका अर्थमन्त्री धनबहादुर मास्कीले जानकारी दिनुभयो । उक्त रकम प्रदेश विपद् कोषबाट निकासा गरी कर्णाली प्रदेश सरकारलाई दिइनेछ । साथै लुम्बिनी प्रदेश सरकारले प्रभावित जिल्लामा उद्धारका लागि गृहमन्त्री सन्तोष पाण्डेको नेतृत्वमा उद्धारकर्ताको एक टोलीसमेत पठाएको छ । प्रदेश सरकारले यसअघि शनिबार बिहान राप्ती प्रादेशिक अस्पताल तुलसीपुरका निमित्त मेडिकल सुपरिटेन्डेण्ट डा. पदमराज अधिकारीको नेतृत्वमा २० जना स्वास्थ्यकर्मी तथा स्वास्थ्य सामग्री पठाएको थियो ।

यस्तै, कोशी प्रदेश सरकारले भूकम्प पीडितको राहत र पुनःस्थापनाका लागि एक करोड रुपैयाँ पठाउने निर्णय गरेको छ । शनिबार बसेको प्रदेश मन्त्रिपरिषद् बैठकले पीडितको राहत, उद्धार र पुनःस्थापनाका सम्बन्धित प्रदेशलाई एक करोड रुपैयाँ सहयोग गर्ने निर्णय गरेको हो । प्रदेश सरकारले नगदसँगै एक ट्रक राहत सामग्री पनि पठाउने निर्णय गरेको मन्त्री गणेश उप्रेतीले जानकारी दिनुभयो ।

बागमती प्रदेश सरकारले भूकम्प पीडितलाई राहतस्वरूप एक करोड ५० लाख रुपैयाँ सहयोग गर्ने भएको छ । शनिबार बसेको मन्त्रिपरिषद् बैठकले भूकम्प पीडितका लागि राहत, उद्धार, र पुनर्निर्माणका लागि बागमती प्रदेश सरकारले एक करोड ५० लाख रुपैयाँ कर्णाली सरकारमार्फत सहयोग गर्ने निर्णय गरेको मुख्यमन्त्री शालिकराम जम्कट्टेलले जानकारी दिनुभयो ।

यस्तै, गण्डकी प्रदेश सरकारले भूकम्प प्रभावित क्षेत्रमा चिकित्सक सहितको स्वास्थ्यकर्मी टोली पठाएको छ । भूकम्प प्रभावितको उद्धार र उपचारमा सहयोग गर्ने उद्देश्यले डाक्टर विकास गौचनको नेतृत्वमा विशेषज्ञ चिकित्सकसहितको टोली पठाएको हो ।

भूकम्प प्रभावित क्षेत्रका लागि सुदूरपश्चिम प्रदेश सरकारले एक करोड रुपैयाँ प्रदान गर्ने भएको छ । उद्धार, राहत र पुनःस्थापनाका लागि सुदूरपश्चिम सरकारले उक्त रकम सरकारी कोषमा जम्मा गर्ने निर्णय भएको सामाजिक विकासमन्त्री झपटबहादुर साउदले जानकारी दिनुभयो । सुदूरपश्चिम सरकारले स्वास्थ्य उपचारमा सहयोग गर्न औषधिसहित २० जना स्वास्थ्यकर्मीको टोली पठाएको छ ।
प्रदेश सरकारबाहेक सत्तारूढ नेपाली कांग्रेसले पीडितको उद्धार, राहत र पुनःस्थापनाका लागि पचास लाख नेपाल सरकारलाई उपलब्ध गराउने निर्णय पनि गरेको छ । कांग्रेसले पीडितहरुको उद्धार, राहत र पुनःस्थापनाका लागि पचास लाख नेपाल सरकारलाई उपलब्ध गराउने निर्णय पनि गरेको छ ।

यस्तै, भूकम्प पीडितलाई राहतका लागि बुद्ध एयरले एक करोड रुपैयाँ सहयोग गर्ने घोषणा गरेको छ । बुद्ध एयरले प्रधानमन्त्री दैवी प्रकोप राहत कोषमार्फत भूकम्प पीडितलाई राहत र पुनर्निर्माणका लागि एक करोड रुपैयाँ दिने घोषणा गरेको हो ।

राहत र उद्धारमा तीव्रता दिने कर्णाली प्रदेश सरकारको निर्णय
कर्णाली प्रदेश सरकारले नेपाली सेनासँग समन्वय गरी सुर्खेत एयरबेसमा रहेको हेलिकप्टरमार्फत चिकित्सक पठाउने र बिरामी ल्याउने कामलाई तीव्रता दिने निर्णय गरेको छ । शनिबार बिहान मुख्यमन्त्री निवासमा बसेको मन्त्रिपरिषद्को आकस्मिक बैठकले उद्धार र राहतमा कुनै कमी हुन नदिने निर्णय गरेको हो । प्रदेश सरकारसँग उपलब्ध भएको राहत सामग्री तत्काल पठाउने र नपुगेको खरिद गर्ने निर्णय भएको कर्णाली प्रदेश सरकारका प्रवक्ता आन्तरिक मामिला तथा कानुनमन्त्री कृष्णबहादुर जिसीले जानकारी दिनुभयो । उहाँका अनुसार आवश्यकताअनुसार शोधभर्ना गर्ने गरी बजेट खर्चसम्बन्धी व्यवस्था मिलाइएको छ ।

दलहरूका पूर्वनिर्धारित कार्यक्रम स्थगित, उद्धार र राहतमा परिचालित हुन नेता-कार्यकर्तालाई अपिल
राजनीतिक दलहरूले जाजरकोट केन्द्रबिन्दु भएर गएको भूकम्प पीडितहरूको उद्धार र राहतमा परिचालित हुन पार्टी पंक्तिलाई आहृवान गरेका छन् । पूर्वनिर्धारित सबै कार्यक्रम स्थगित गरेर उनीहरूले तत्काल खोज, उद्धार र आपत्कालीन राहतका लागि पार्टी पंक्तिलाई आहृवान गरेका हुन् । सत्तारूढ नेपाली कांग्रेसका केन्द्रीय कार्यालयका मुख्य सचिव कृष्णप्रसाद पौडेलले विज्ञप्ति जारी गरी स्वदेश तथा विदेशमा रहेका सबैलाई खुला हृदयले मानवीय सेवाको अभियानमा जुट्न आहृवान गर्नुभएको छ । कांग्रेसले पीडितहरूको उद्धार, राहत र पुनःस्थापनाका लागि पचास लाख नेपाल सरकारलाई उपलब्ध गराउने निर्णय पनि गरेको छ ।

नेकपा एमालेले घाइतेहरूको उद्धार र उपचारमा परिचालित हुन पार्टी पंक्तिलाई अपिल गरेको छ । अध्यक्ष केपी शर्मा ओलीले गरेको अपिलमा देशभरका नेता-कार्यकर्तालाई उपचारमा जुट्न आग्रह गरिएको छ । सुर्खेत, नेपालगञ्ज र काठमाडौंका कमिटीहरूलाई उपचार, अस्पतालको व्यवस्थापन र घाइतेका लागि आवश्यक ब्लड संकलन गर्न अध्यक्ष ओलीले निर्देशन दिनुभएको छ । सरकारको नेतृत्व गरिरहेको नेकपा माओवादी केन्द्रले पनि पार्टीको पूर्वनिर्धारित कार्यक्रम स्थगित गरी उद्धारमा परिचालित हुन कार्यकर्तालाई निर्देशन दिएको छ । महासचिव देव गुरुङले वक्तव्य निकाली खोज, उद्धार र राहतमा परिचालित हुन पार्टी पंक्तिलाई निर्देशन दिनुभएको छ । नेकपा एकीकृत समाजवादीले पनि खोज, उद्धार र आवश्यक सहयोगका निम्ति पार्टी पंक्ति परिचालित गरेको छ । अध्यक्ष माधवकुमार नेपालले वक्तव्य जारी गरी सरकार र स्वयंसेवी संघसंस्थासँग समन्वय गरी उद्धारमा परिचालित हुन पार्टी पंक्तिलाई निर्देशन दिनुभएको छ ।

राष्ट्रिय स्वतन्त्र पार्टीले पनि उद्धार, उपचार र राहतका निम्ति आफ्नो टोली परिचालन गरेको छ । राष्ट्रिय प्रजातन्त्र पार्टीको टोली पनि तत्काल उद्धार कार्यमा परिचालित हुन पार्टीमा सर्कुलर पठाएको छ । यस्तै, नेपाल कम्युनिष्ट पार्टीले भूकम्प प्रभावितलाई पार्टीको खाद्य भण्डारबाट करिब २५ क्विन्टल चामल दिने निर्णय गरेको छ । नेकपाको शनिबार बसेको उपलब्ध केन्द्रीय सदस्यहरूको बैठकले पार्टी कोषबाट एक लाख रुपैयाँ राज्यको राहत कोषमा जम्मा गर्ने निर्णय गरेको प्रवक्ता खड्गबहादुर विश्वकर्माले जानकारी दिनुभयो ।

राष्ट्रपति रामचन्द्र पौडेलले भूकम्पबाट भएको मानवीय र भौतिक क्षतिले आफू मर्माहत भएको बताउनुभएको छ । राष्ट्रपति पौडेलले विपद्को घडीमा भूकम्प प्रभावित क्षेत्रमा प्रभावकारी उद्धार तथा राहतको काममा जुट्न सरकारलगायत सम्बन्धित सबैलाई अपिल गर्नुभएको राष्ट्रपति कार्यालयले जनाएको छ ।

यस्तै, पूर्वराजा ज्ञानेन्द्र शाहले भूकम्पमा भएको जनधनको क्षतिप्रति दुःख व्यक्त गर्नुभएको छ । शाहले भूकम्पमा परी जीवन गुमाएका सबैप्रति गहिरो सहानुभूति र समवेदना पनि प्रकट गर्नुभएको छ । घाइते सबैको स्वास्थ्य लाभको कामना गर्दै उहाँले मानवीय तथा भौतिक क्षतिप्रति गम्भीर चिन्ता पनि प्रकट गर्नुभएको छ ।

प्रभावित जिल्लाका कर्मचारीलाई तत्काल बिदामा नबस्न निर्देशन
भूकम्प प्रभावित जिल्लाका कर्मचारीहरूले तत्कालका लागि बिदामा बस्न नपाउने भएका छन् । संघीय मामिला तथा सामान्य प्रशासन मन्त्रालयले शनिबार एक विज्ञप्ति जारी गर्दै भूकम्प प्रभावित जिल्लाका स्थानीय तहमा कार्यरत प्रमुख प्रशासकीय अधिकृतसहित अन्य कर्मचारीहरूलाई तत्काल बिदामा नबस्न निर्देशन दिएको हो । ‘भूकम्प प्रभावित जिल्लाका स्थानीय निकायमा कार्यरत प्रमुख प्रशासकीय अधिकृत तथा अन्य कर्मचारीहरू बिदामा भएमा यथाशीघ्र आफ्नो कार्यालयमा हाजिर भई कामकाजमा खटिनुहुन र तत्काल बिदामा नरहनुहुन समेत निर्देशन गरिएको छ,’ विज्ञप्तिमा भनिएको छ । भूकम्पमा परी मृत्यु भएका व्यक्तिहरूको खोजी तथा पहिचान, घाइतेहरूको राहत तथा उद्धार, स्वास्थ्य उपचारसहित अन्य सबै पक्षहरूको व्यवस्थापनमा खटिन प्रभावित जिल्लाका सबै स्थानीय निकायका पदाधिकारी तथा कर्मचारीहरूलाई मन्त्रालयले अनुरोध गरेको छ ।