भैरहवा । लुम्बिनी प्रेस क्लब, रुपन्देहीको नवौँ स्थापना दिवसको अवसरमा आयोजित मैत्रीपूर्ण फुटसल प्रतियोगिताको उपाधि जिल्ला प्रहरी कार्यालय, रुपन्देहीको टिमले जितेको छ । सिद्धार्थनगर-१३ स्थित फुटसल मैदानमा सम्पन्न खेलमा प्रहरीको टिमले आयोजक लुम्बिनी प्रेस क्लवलाई ४-३ गोल अन्तरले पराजित गर्दै मैत्रीपूर्ण फुटसलको उपाधि जितेको हो ।
निर्धारित ३० मिनेटको खेलमा दुवै टिमले ३-३ गोलको बराबरी खेलेपछि निर्णयको लागि ५ मिनेट थपिएको थियो । थपिएको समयको चौथो मिनेटमा प्रहरीका सुभाष थारूले गोल गर्दै फुटसल उपाधि दिलाउन सफल हुनुभएको थियो ।
यसअघि खेल सुरु भएको १४औँ मिनेटमा प्रहरीका राजेश बस्नेतले आत्मघाती गोल गरेपछि पूर्वाद्र्धमा लुम्बिनी प्रेस क्लबले १-० गोलको अग्रता बनाउनुभयो । उत्तराद्र्धको २०औँ मिनेटमा प्रेस क्लबका जयकेश हरिजनले गोल थप्दै २-० को अग्रता दिलाउनुभयो । २५औँ मिनेटमा प्रहरीका सुभाष थारुले गोल गर्दै गोल अन्तर २-१ मा ल्याउनुभयो ।
२६औँ मिनेटमा प्रेस क्लबका जयकेशले नै गोल थप्दै ३-१ को अग्रता दिलाउनुभयो । खेल सकिन केही मिनेट बाँकी रहँदा प्रेस क्लबले धैर्यता गुमाउँदा प्रहरीले आकर्षक खेल पस्कियो । २८औँ मिनेटमा प्रहरीका सुभाष थारूले गोल गर्दै गोल अन्तरलाई ३-२ बनाउनुभयो । २९ औँ मिनेटमा प्रहरीका किशोर केसीले गोल गर्दै खेललाई बराबरीमा ल्याउन सफल हुनुभयो ।
फाइनल अघिका खेलहरूमा जिल्ला प्रहरी कार्यालयले जिल्ला प्रशासन कार्यालय, रुपन्देहीलाई ५-१ गोल अन्तरले पराजित गर्दै फाइनल पुगेको थियो । प्रहरीका लागि भरत बिक, किशोर केसी, राजेश बस्नेत, कौशल न्यौपाने र गोकुल कट्टेलले गोल गर्नुभएको थियो । प्रहरीका कप्तानसमेत रहेका जिल्ला प्रहरी प्रमुख भरत विकले एक गोल आत्मघाती गर्दा जिल्ला प्रशासनको टिमलाई गोल उपहार भएको थियो ।
त्यस्तै, अर्को खेलमा लुम्बिनी प्रेस क्लबले सशस्त्र प्रहरी बल नम्बर २७ गण, रुपन्देहीलाई ५-३ गोल अन्तरले पराजित गर्दै फाइनलमा स्थान सुरक्षित गरेको थियो । प्रेस क्लबका लागि दीपेन्द्र बडुवाल र जयकेश हरिजनले समान २-२ गोल गर्दा प्रकाश न्यौपानेले १ गोल गर्नुभएको थियो । सशस्त्रको टिमका लागि किशोर श्रेष्ठ, अस्विनी गुरुङ र देवराज मल्लले १-१ गोल गर्नुभएको थियो ।
विजेता तथा उपविजेता टिमका खेलाडीहरूलाई रुपन्देहीका प्रमुख जिल्ला अधिकारी गणेश अर्याल, लुम्बिनी प्रेस क्लबका कार्यबाहक अध्यक्ष कमल रायमाझी लगायतले ट्रफी, पदक तथा प्रमाणपत्र प्रदान गर्नुभएको थियो । प्रमुख जिल्ला अधिकारी अर्यालले पुरस्कार वितरण गर्दै यस किसिमका कार्यक्रमले बन्धुत्व भावना विकास हुने र स्वास्थ्य पनि राम्रो हुने बताउनुभयो ।
कार्यक्रममा क्लबका कार्यबाहक अध्यक्ष रायमाझी, फुटसल प्रतियोगितामा सहभागी टिमका तर्फबाट सहायक प्रमुख जिल्ला अधिकारी रामचन्द्र अर्याल, रुपन्देही प्रहरी प्रमुख भरतबहादुर विक, सशस्त्र प्रहरी प्रमुख दीपककुमार थापाले बोल्दै सुरक्षा निकाय, निजामती कर्मचारी र पत्रकारहरूबीच भएको खेलले एकआपसमा भाइचारको विकाससँगै मनोरञ्जन प्रदान हुने र स्वास्थ्यका लागि फाइदा पुग्ने जनाउनुभयो ।
प्रेस क्लबका कार्यबाहक अध्यक्ष रायमाझीको सभापतित्व, कार्यक्रम संयोजक प्रकाश न्यौपानेको स्वागत मन्तव्य तथा सल्लाहकार मनोरञ्जन शर्माको सञ्चालनमा कार्यक्रम सम्पन्न भएको थियो । प्रेस क्लब आफ्नो स्थापना दिवसको अवसरमा फुटसलसँगै भैरहवा-लुम्बिनी बौद्ध सञ्चार यात्रा र कर्पोरेट क्रिकेट प्रतियोगिता सम्पन्न गरिसकेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच