राप्ती नदीमा खसेको बस ट्राफिक छलेर किन हुइँकिएको थियो ?

दाङको । भालुबाङ स्थित पुलबाट यात्रुवाहक बस राप्ती नदीमा खस्दा दुइ भारतिय नागरिक सहित १२ जनाको मृत्यु भएको छ । दुर्घटनामा २२ जना घाइते भएका छन । उनिहरु मध्य चार जनाको अवस्था गम्भीर छ । सातजनाको घटनास्थलमै, चारजनाको उपचार गर्न लैजाने क्रममा बाटोमै र एकजनाको उपचारका क्रममा मृत्यु भएको जिल्ला प्रहरी कार्यालय दाङले जनाएको छ ।

शुक्रबार राति नेपालगञ्जबाट काठमाडौंतर्फ जाँदै गरेको भे १ ख ३००१ ख ३९१२ नम्बरको बस राप्ती गाउँपालिका–१ स्थित राप्ती पुलबाट खसेको थियो । राप्ती नदी माथि बनेको यो पुलले दाङ र अर्घाखाँची जिल्लालाई जोड्छ । दुर्घटनामा ज्यान गुमाउनेमा बाँके नेपालगञ्ज निवासी ६० वर्षीय कुसुम बस्नेत, मकवानपुर हेटौंडा निवासी ३९ वर्षीय सौरव विष्ट, काठमाडौँ चन्द्रागिरी नगरपालिका–१५ निवासी ६५ वर्षीय ताराकान्त पाण्डे, जुम्ला श्रीढुस्का–९ निवासी ४० वर्षीय मुनबहादुर बस्नेत, बाँके निवासी ३० वर्षीय रामबहादुर हरिजन र रुकुम गोतमकोट निवासी २५ वर्षीय दीपक कामीको भएको प्रहरीले जनाएको छ ।

यस्तै, भारत बिहार निवासी ६७ वर्षीय योगेन्द्र राम, भारत उत्तरप्रदेश निवासी ३१ वर्षीय अतिकुल्ला खैरे, बाँके खजुरा–३ खजुरा निवासी २५ वर्षीय सञ्जय केसी, चितवन भरतपुर महानगरपालिका–२५ निवासी ३५ वर्षीय अनिल खड्का, भारत निवासी ४५ वर्षीय चेतराम शिल्पकार र बाँके खजुरा गाउँपालिका–३ निवासी २८ वर्षीय अर्जुन थापाको पनि मृत्यु भएको प्रहरीले जनाएको छ । घाइते २२ मध्ये सातजनाको बुटवल, नौ जना नेपालगञ्ज र ६ जनाको प्रस्तावित भालुवाङ अस्पताल दाङमा उपचार भइरहेको छ ।

घटनास्थलमा जिल्ला प्रहरी प्रमुख एसपी रामबहादुर केसीसहित ३५ नेपाल प्रहरी, सशस्त्र प्रहरी बल ज्वालामाई गण भालुबाङका प्रमुख एस्पी गोपालप्रसाद श्रेष्ठसहित ४५ सशस्त्र प्रहरी र जिल्ला ट्राफिक प्रहरी प्रमुख किरणप्रकाश मल्लसहित ६ जना ट्राफिक प्रहरी उद्धारमा खटेको थियो । चालकलाई प्रहरीले नियन्त्रणमा लिएको छ ।

सिधा पुलमा कसरी भयो बस दुर्घटना ?

राप्ती पुल किनारमा अस्थायी ट्राफिक प्रहरी छ । ट्राफिक प्रहरीका अनुसार बस नेपालगञ्जबाट काठमाडौंको लागि अघि बढ्दै गर्दा भालुबाङ पुलचोकमा ट्राफिक जाँच थियो। दुईवटा बससँगै थिए । जसमध्ये एउटा बस चेकिङमा अडियो। अर्काे बस तीव्र गतिमा अघि बढ्यो । ट्राफिक जाँच छलेर तीव्र गतिमा गुडेको बस पुलमा प्रवेश गरेलगत्तै फलामको रेलिङ भाँचेर दक्षिण किनारमा खस्यो । पुलमा जोडिने बेलामा बाटो साँघुरो छ । तीव्र गतिमा गुडेको गाडी नियन्त्रणमा आउन कठिन छ । दुर्घटनामा परेको बसले ट्राफिक छलेको प्रस्टै हुन्छ । चेक पोइन्टदेखि झन्डै ३० मिटर पूर्व चालककै साइड दायाँबाट राप्ती नदीमा खसेको थियो । बसको अगाडिको भाग पानीमा र पछाडिको भाग बगरमा थियो ।

‘मैले चेक प्वाइन्टमा बसेका डिउटीका ट्राफिक प्रहरीलाई बुझ्दा चालकले बस नरोकेर तीब्र गतिमा अगाडि बढाएको भन्ने नै छ,’ इलाका प्रहरी कार्यालय भालुवाङका प्रमुख इन्स्पेक्टर उज्ज्वल बहादुर सिंहले भन्नुभयो । ‘ तर, चालकले प्राविधिक कारण बस दुर्घटनामा परेको भनेर हामीलाई बयान गरेका छन् ।’ प्राविधिक कारणले हो वा मानवीय त्रुटीको कारणले बस दुर्घटनामा परेको हो भन्ने कुरा थप अध्ययनपछि मात्रै खुल्ने उहाँले बताउनुभयो ।

भालुवाङमा ट्राफिक चेकपोइन्ट नजिक पुगेपनि बस रोकिएन । त्यहाँ चेकिङ भइरहेको भएपनि चालकले रोक्दै नरोकी हुँइक्याए। त्यतिबेला बस ७०/८० को स्पिडमा रहेको यात्रु आशुतोष गौतमको अनुमान छ। बस चेकजाँचका लागि त्यहाँ रहेका ट्राफिक प्रहरीले सिटी पनि फुकेका रहेछन्। तर चालकले रोक्दै नरोकी बस दौडाए। केही पर पुगेपछि बस दायाँ बायाँ गर्दै अगाडि बढ्न थालेपछि मुटुमा ढ्यांग्रो बज्न थालेको गौतमले भन्नुभयो । बस दायाँबाया हल्लिन थालेपछि आफू हामफालेको एकै छिनमा ठूलो आवाजका साथ बस राप्ती नदीमा बजारिएको उहाँले बताउनुभयो ।

‘त्यो दुर्घटना हुने ठाँउ नै हैन,’ इलाका प्रहरी कार्यालय भालुवाङका प्रमुख इन्स्पेक्टर उज्ज्वलबहादुर सिंहले भन्नुभयो ‘त्यस्तो सिधा पुलबाट बस कसरी नदीमा खस्यो त्यो अनुसन्धान भइरहेको छ ।’ बस चालकले भने इन्जिनमा समस्या भएपछि दुर्घटना भएको बयान दिएका छन् । प्रहरीको नियन्त्रणमा रहेका चालक लालबहादुर नेपालीले बसको सापट बिग्रिएपछि दुर्घटना भएको बयान दिएका हुन्। ‘हामीले चालकसँग बयान लिँदा बसको सापटले काम नगरेपछि दुर्घटना भएको भनेका छन्’ जिल्ला प्रहरी कार्यालयका डिएसपी जनक मल्लले भन्नुभयो,‘बसको इञ्जिनमा समस्या भए नभएको बारे परीक्षण गरिनेछ।’ तर सवारी साधनका जानकारहरु भने बसको इन्जिनमा प्रयोग हुने सापटको समस्याका कारण बस नमोडिने समस्या नहुने बताउँछन् । स्टेरिङ फेल हुनु, पट्टा भाँचिदा बस नमोडिएर दुर्घटना हुने खतरा रहने तर सापट बिग्रिँदा यो समस्या नहुने उनीहरू बताउँछन् । मृतकको लमही अस्पतालमा पोष्टमार्टम गरिएको वडा प्रहरी कार्यालय लमहीका प्रहरी निरीक्षक शंकर श्रेष्ठले जानकारी दिनुभयो ।