दिपेश पुनलाई ८ दिन हिरासतमा राखेर अनुसन्धान गर्न अदालतले दियो अनुमति

रुपन्देही । बुटवलको सुप्रिम बचत तथा ऋण सहकारीको ७८ करोड रकम अपचलन गरेको आरोपमा पक्राउ परेका दिपेश पुनलाई ८ दिन हिरासतमा राखेर अनुसन्धान गर्न अदालतले अनुमति दिएको छ ।

आइतबार रुपन्देही जिल्ला अदालतले उनलाई ८ दिनसम्म हिरासतमा राखेर अनुसन्धान गर्ने अनुमति दिएको इलाका प्रहरी कार्यालय बुटवलका प्रमुख विजयराज पण्डितले बताउनु भयो ।

नेकपा माओवादी केन्द्रनिकट अखिल क्रान्तिकारीका महासचिवसमेत रहेका पुनलाई प्रहरी प्रधान कार्यालयको विशेष टोलीले शुक्रबार साँझ काठमाडौँमा पक्राउ गरेको थियो । उनलाई प्रहरीले शुक्रबार राति नै बुटवल ल्याएको थियो ।

दिपेश पूर्वउपराष्ट्रपति नन्दबहादुर पुनका कान्छा छोरा हुन् । इलाका प्रहरी कार्यालय बुटवलले झन्डै एक महिनादेखि सुप्रिम सहकारी ठगी प्रकरणको अनुसन्धान गरिरहेको छ ।

प्रहरील यसअघि नै सुप्रिम सहकारीका अध्यक्ष ओमप्रकाश गुरुङ, भैरहवा शाखाकी व्यवस्थापक दुर्गा पाण्डेय चापागाईं पक्राउ गरी अनुसन्धान गरिरहेको छ । उनीहरुको बयानका आधारमा पुनलाई पक्राउ गरिएको इलाका प्रहरी कार्यालय बुटवलका प्रमुख विजयराज पण्डितले बताउनु भयो ।

सुप्रिमका १० हजार ३ सय ९१ बचतकर्ताको १ अर्ब ७ करोड ८२ लाख ६७ हजार रुपैयाँ संकलन गरेकामा ७८ करोड ५० लाख रुपैयाँ पदाधिकारीले नै अपचलन गरेको बचतकर्ताको उजुरी छ ।

सुप्रिम सहकारीको करिब डेढ अर्ब रकम हिनामिना भएको उजुरी दिएका बचतकर्ताहरुलाई यसका पूर्वसचिव रहेका दिपेश पुनसहितका अधिकांश मुख्य व्यक्तिहरु पक्राउ परेपछि आफ्नो रकम फिर्ता हुने आशा पलाएको बताएका छन् ।

रुपन्देही क्षेत्रका करिब १० हजार बचतकर्ताको सबा १ अर्ब रकम हिनामिना प्रकरणमा दीपेश जोडिएका छन् । जीबी राई अध्यक्ष र पुन कोषाध्यक्ष रहेको सुप्रिम सहकारीको बचत रकम हिनामिना गरेको उजुरी प्रहरीमा छ ।

रुपन्देही प्रहरीले उनीविरुद्ध मुद्दा भएकाले काठमाडौँबाट झिकाइएको र अनुसन्धान थालेको जनाएको । काठमाडाैै  प्रहरीले उनलाई सुन तस्करीमा संलग्न भएको आरोपमा पक्राउ गरेको थियो । सुन तस्करीबारे अनुसन्धान गर्दा सहकारी ठगीमा पनि यसअघि नै वारेन्ट जारी भएकाले यहाँ ल्याइएको हो ।

इलाका प्रहरी कार्यालय बुटवलका डिएसपी विजयराज पण्डितले सुप्रिम सहकारीका वचतकर्ताले सबा १ अर्ब रकम अपचलन गरेको मुद्दाको विषयमा अनुसन्धान गर्न पुनलाई बुटवलमा ल्याइएको बताउनु भयो ।

‘सुप्रिम सहकारीबाट पीडित वचतकर्ताको उजुरीका आधारमा यहाँ ल्याइएको हो, १ अर्बभन्दा बढी रकम अपचलन भएको उजुरी छ, हामीले यसअघि यसबाट पीडित वचतकर्ताको निवेदन पनि संकलन गरेका छौं, त्यो आधारमा पनि छानविनलाई अगाडि बढाउँछौं’ उहाँले भन्नु भयो।

रुपन्देहीलगायत आसपासका जिल्लाका १० हजार ३९१ जना बचतकर्ताहरुको १ अर्ब ७ करोड ८२ लाख ६७ हजार ७२९ रुपैयाँ हिनामिना गरी एक वर्षदेखि संस्थाका संस्थापक अध्यक्ष एवं संरक्षक गितेन्द्र बहादुर (जिबि) राई सम्पर्कविहीन छन् । वचतकर्ताले सहकारीका मुख्य व्यक्तिहरु पक्राउ परेपनि राजनीतिक दल र सरकारको पहुँचमा रहेकालो दोषीलाई उम्काउने प्रयास हुनसक्ने भन्दै खबरदारीका लागि आग्रह गरिरहेका छन् ।

सहकारीमा बचत गरेका पीडित रमा भटट्राईले सहकारीका मुख्य मान्छे पक्राउ परेकाले उनीहरुको सबै सम्पत्ति छानविन गरेर आफूहरुको रकम भुक्तानी दिने वातावरण सरकारले मिलाउनुपर्ने बताउनु भयो ।

सुप्रिम सहकारी संस्थाका दुई सयभन्दा बढी सदस्यले आफूहरूको एक अर्ब बढी बचत रकम ठगी गरेको भन्दै उजुरी दिएको लुम्बिनी प्रदेश सहकारी रजिष्ट्रार भिमप्रसाद तिवारीले जानकारी दिनु भयो ।

‘एउटै सदस्यको साढे तीन करोडसम्म ठगी गरेको उजुरी परेको छ, सहकारीले एक अर्ब बढी ठगी गरेको भन्दै दुई सयभन्दा बढी व्यक्तिले उजुरी दिनुभएको छ,त्यही आधारमा प्रहरीलाई थप अनुसन्धानका लागि पठाएका हौं’ तिवारीले भन्नुभयो ।

कुल १० हजार ३९१ जना बचतकर्ताबाट संकलन गरेको १ अर्ब ७ करोड ८२ लाख ६७ हजार ७२९ रुपैयाँमध्ये सहकारीका संस्थापक अध्यक्ष तथा संरक्षक रहेका राई र उनी संलग्न विभिन्न पाँचवटा कम्पनीलाई मात्र ७८ करोड ५० लाख ७६ हजार ६६५ रुपैयाँ ऋण दिइएको बताइएको छ ।