पार्वतीको श्राप र रावणको विनाश

आज नेपालमा हिन्दुत्वका नाममा राष्ट्रिय स्वयं सेवक संघको पकड तराईदेखि हिमालसम्म बढ्दो क्रममा छ । नेपालमा जति जति इसाईकरण बढ्दै गइरहेको छ त्यति त्यति हिन्दुत्व जागरणको क्रम राष्ट्रिय स्वयं सेवक संघको ब्यानरमुनि बढ्दै गएको छ जो नेपालको मौलिक सनातन धर्मको लागि अत्यन्त हानिकारक हो । इन्डियाको लोकसभा निर्वाचनमा भाजपाको अकल्पित ह्रास यही घोर दक्षिणपन्थी हिन्दुत्वको कारणले पनि हो । उसको हिन्दुत्वको नारा जय श्रीराम र गेरुवा ध्वज हो । उसले काशी, मथुरा र ताजमहललाई पनि आफ्नो निशानामा राखेको छ । सरदार बल्लभभाइ पटेलले ५६५ वटा राज्य रजौटाहरूलाई साम, दाम, दण्ड र भेद नीति अपनाई इन्डियामा गाभेको हो ।

विशाल इन्डियाका हिन्दुहरूको धर्म एउटै भए पनि संस्कृति र परम्पराहरू फरक फरक छन् । साउथ इण्डियामा इसाई र मुस्लिमको बाहुल्य भए तापनि हिन्दु धर्मावलम्बीहरू पनि उल्लेख्य संख्यामा छन् । उनीहरूको धर्म हिन्दु भए तापनि संस्कृति र परम्परा अलग्गै छ । शैव र वैष्णव धर्मको केन्द्र हो साउथ इण्डिया । नर्थ इण्डियामा रामको पूजा हुन्छ भने साउथमा रावणको पूजा गर्ने पनि छन् । अनि उनीहरू कसरी जय श्रीरामको नारामुनि एकत्रित हुन सक्छन् ? नर्थ इण्डियाको उत्तरी भू-भागमा शिव र शक्तिलाई प्रमुख देवताको रूपमा मनिन्छ न कि रामलाई । विहारमा मैथिली र भोजपुरी संस्कृतिको प्रभाव छ । झारखण्ड, छत्तीसगढलगायत प्रदेशमा आदिवासी, जनजातिहरू प्रकृतिपूजक छन् ।

हामीले के बुझ्नुपर्छ भने जुन राष्ट्रिय स्वयं सेवक संघ र उसको भ्रातृ संगठन भाजपा आफ्नै देशका विभिन्न प्रान्तको मौलिक धर्म र संस्कृति मास्न लागिपरेको छ, उसले कसरी नेपालको मौलिक धर्म र संस्कृति, परम्परालाई सम्मान गर्न सक्छ ?

त्यहाँ केही आदिवासी समूहमा दशैँमा रावणको पूजा गर्ने चलन छ र दशैँको दिन रामले रावणलाई मारेकाले उनीहरू त्यसदिन विलाप गरी रुन्छन् । उनीहरू आफूहरूलाई रावणको वंशज भन्छन् । बंगालमा शक्तिलाई मान्छन् । त्यहाँ देवी पूजनलाई प्राथमिकता दिइन्छ, तन्त्र साधनाको प्रदेश हो पश्चिम बंगाल । असम तन्त्र साधनाको केन्द्र हो । उनीहरूको आफ्नै मौलिक चाडहरू छन् जो अन्यत्र छैन । उनीहरू बंगाली बिहुलाई आफ्नो प्रमुख चाड मान्छन् र देवी साधना पनि गर्छन् । बंगालमा दुर्गापूजा त्यसपछि कोजाग्रत पूर्णिमामा, लक्ष्मीपूजा र कार्तिक औंसीमा कालीपूजालाई प्रमुख चाड मान्छन् र महाराष्ट्रमा भदौमा गणेश पूजालाई । असमका वैष्णव समुदायले श्रीमन्त शंकरदेवको एकशरण दर्शनको अनुसरण गर्छन् । जसले भन्छ, सबै वस्तुहरूलाई एक समान सम्झ, उनीहरू स्वयं भगवान हुन् । ब्राहृमण र चाण्डालको जात नसोध ।

भाजपाको आइटी सेलको संस्थापक असमका प्रद्युत बराले भाजपाको काम कारबाही हेरेर सन् २०१५ मा पार्टी त्याग गरेका थिए । उनको भनाइ अनुसार, मोदी चरम दक्षिणपन्थी हुन् । उनको भनाइमा अध्यक्षले अध्यक्षता गर्ने हो र टिमले निर्णय । मोदीमा यो गुण छैन । उनले एउटा अन्तर्वार्तामा भनेका छन्, मेरा मातापिता असमको एउटा मध्यमवर्गीय पृष्ठभूमिका हुन् । पिता सरकारी अधिकारी र माता शिक्षिका हुनुहुन्थ्यो, दुवैले असम आन्दोलनमा भाग लिनुभएकोले उहाँहरूमा असमिया राष्ट्रवादको भावना जरैदेखि नै भरिएको थियो । असमको पहिचानलाई समाप्त पारेर मोदीले त्यहाँ हिन्दु पहिचान दिने प्रयास गरिरहेका छन् । हाम्रो भौगोलिक तथा सांस्कृतिक आधारमा बनेको पहिचानलाई मेटेर यहाँ धार्मिक पहिचान दिने प्रयास गरिरहेको छ, चारैतिरबाट संस्थागत आक्रमण भइरहेको छ ।

बराले आइटी सेलको सर्वोच्च पद पाएका थिए । उनी युवा भएकाले झन् झनमाथि जाने सम्भावना हुँदाहुँदै असमको मौलिक संस्कृतिमाथि राष्ट्रिय स्वयं सेवक संघको भ्रातृसंसथा भाजपाबाट संस्थागत आक्रमण भइरहेकाले पार्टी परित्याग गरे । आज नेपालमा अवकाशप्राप्त नोकरशाह, सेना, प्रहरीका उच्चपदस्थ अवकाशप्राप्त व्यक्तित्वहरू, नेताहरू जस्ता बौद्धिक व्यक्तित्वहरू जानी नजानी हिन्दुत्वको नाममा राष्ट्रिय स्वयं सेवक संघको कार्यकर्ता भएर उसको निर्देशनमा चलिरहेका छन् भने आमजनता त भ्रममा परेर सनातन धर्म जोगाउन हिन्दुत्वको आवरणमा नेपालको मौलिक सनातन धर्म, यहाँको संस्कृति र परम्परालाई सहयोग गरिरहेका छन् । हामीले के बुझ्नुपर्छ भने जुन राष्ट्रिय स्वयं सेवक संघ र उसको भातृ संगठन भाजपा आफ्नै देशका विभिन्न प्रान्तको मौलिक धर्म र संस्कृति मास्न लागिपरेको छ उसले कसरी नेपालको मौलिक धर्म र संस्कृति, परम्परालाई सम्मान गर्न सक्छ ?

यस देवभूमिमा पनि राक्षसहरूको अधिकार छ अहिले । सत्ताका चास्नीमा डुबेका कैकसी र रावणहरू प्रशस्त छन् यहाँ । जानी/नजानी सनातन धर्म बचाउने नाममा आफ्नो मौलिक धर्म, संस्कृति र परम्पराहरूलाई समाप्त पार्न आरएसएसको पछि लाग्नेहरूको संख्या उल्लेख्य छ ।

उसले यसलाई जरैदेखि समाप्त पार्न नेपालीहरूलाई नै प्रयोग गरिरहेको छ । हामीले यो बिर्सनु हुँदैन दरबार हत्याकाण्ड हुँदा इण्डियामा भाजपाका अटलबिहारी बाजपेयी प्रधानमन्त्री थिए र उनले माओवादी हिंसाकालमा साढे छ वर्षसम्म माओवादीलाई पूर्णसहयोग गरेका थिए । यो सीता तथा रामको भूमि भए तापनि यो शिवशक्तिको भूमि हो । भगवान रामले समेत लंका विजय गर्न जानुअगाडि शिवजीको पूजा गरेका थिए । नेपालमा राष्ट्रिय स्वयं सेवक संघ हाम्रो मौलिकतालाई समाप्त पार्न हिन्दु स्वयं सेवक संघ, वनवासी कल्याण आश्रम, पशुपति शिक्षा मन्दिर, विश्व हिन्दु परिषद् आदि नामले आक्रमण गरिरहेका छन् ।

आरएसएसले इन्डियन नागरिक ओमप्रसाद गर्गलाई २०४७ सालमा ‘मातृभूमि नेपाल’ नामको संस्था खोल्न पठाएको थियो । राजा वीरेन्द्रले कतैबाट आरएसएसले यहाँ संस्था खोली धार्मिक जागरणको नाममा नेपालमाथि इण्डियन हस्तक्षेप गर्ने कोसिस गर्दै छ भनेर थाहा पाएपछि यो संस्था नेपालमा दर्ता गर्ने अनुमति दिएनन् । २०४८ मा जननिर्वाचित सरकार गठन भएपछि यो संस्थालाई हिन्दु स्वयं सेवक नामले तत्कालीन सरकारले दर्ता गर्ने अनुमति दियो जुन विषवृक्ष अहिले नेपालभरि झांगिएको छ, जुन नेपालका लागि डरलाग्दो विषय हो । एकातिर बढ्दो इसाईकरण, अर्कातिर आयातित मुस्लिमहरूको कट्टर इस्लामीकरण र बीचमा आरएसएस ।

हाम्रा शासक वर्गमा भ्रष्टाचार तथा राष्ट्रघात भरिएको छ । यिनीहरूबाट न त राष्ट्रको रक्षा नै हुन्छ र न सनातन धर्मको नै । चुनाव हुनु जित्नु एउटा स्वाभाविक प्रक्रिया हो । चुनावमा नेताहरू कसरी जित्छन् हामीले हेरिसकेका छौं । पेपर नेपकिनलाई हात सफा गर्न प्रयोग गरिन्छ । प्रयोग गरेपछि त्यसलाई हामी फालिदिन्छौं । यसको विशेषता के हुन्छ भने यसलाई फेरि रिसाइक्लिन गरेर पेपर नेपकिन बनाउन सकिन्छ । नेपाली जनता पनि पेपर नेपकिन जस्तै हुन् । भ्रष्ट तथा देशद्रोहीहरूको प्रभावमा परेर होस् वा झोले भएको नाताले भोट एक दिन दिन्छन् र बाँकी दिन उनीहरूलाई सराप्छन् तर फेरि चुनाव आएपछि नेताहरूले उनीहरूलाई रिसाइक्लिन गरेर नयाँ नेपकिन बनाइदिन्छन् ।

हामी नेपाली जनता नेपकिन बन्नुमा वा नेता, नेतापत्नी, नेतासन्तान, नोकरशाहहरू भ्रष्ट तथा देशद्रोही बन्नुमा जन्मदोष वा विवाहदोष त होइन् ? कतिको प्रेमविवाह, अचेल त रिलेसनसिपमा बसेर विवाह गर्ने कुसंस्कृति पनि भित्रिएको छ वा कथित क्रान्तिकारी विवाह र विशुद्ध परिवारविहीन दीर्घावधि उच्चस्तरीय सम्भोग तथा भौतिक सुख प्रायोजित अविवाह जसलाई कर्पोरेट म्यारिज कल्चर पनि भनिन्छ र कुनै विदेशी शक्तिले आफ्नो स्वार्थ पूर्तिका लागि आफ्नो कठपुतली नारीसँग कुनै नेताको गरिदिने विवाहको प्रतिफल त होइन यो ?

एकदिन माता पार्वतीले शिवजीलाई आफ्ना लागि देउताहरूकै जस्तै दरबार बनाइदिन इच्छा व्यक्त गरिन् । शिवजीले विश्वकर्मालाई बोलाएर एउटा सुन्दर स्थानमा सुन्दर दरबार पार्वतीका लागि बनाइदिन आदेश दिनुभयो । विश्वकर्माले पनि शिवजीको आज्ञा अनुसार लंकामा भने जस्तै सुन्दर तथा भव्य सुनको दरबार बनाइदिए । स्वर्णको व्यवस्था विश्रवा ऋषिका पुत्र तथा महर्षि भारद्वाजका छोरीपट्टिका नाति कुबेरले स्वर्णको व्यवस्था गरिदिए । सुनको सुन्दर दरबार देखेर माता पार्वती हर्षले विभोर हुनुभयो । गृह प्रवेशका लागि पूजा गर्न विद्वान ब्राहृमणको खोजी भयो । शिवजीले हाल हाम्रो म्याग्दी बेनी पछैस्थित पुलह आश्रममा बस्ने पुलस्त्य महर्षिका पुत्र कुबेर, रावण, कुम्भकर्ण र विभीषणका पिता महर्षि विश्रवालाई ब्राहृमणका रूपमा रोज्नुभयो ।

गृहप्रवेशको पूजा वैदिक विधि अनुसार समापन भएपछि माता पार्वतीले महर्षि विश्रवालाई दक्षिणा माग्न भनिन् । विश्रवाले हजुर मेरो मात्र होइन समस्त विश्वकी माता हुनुहुन्छ माता गौरी, हजुरसँग के को दक्षिणा ? माता पार्वतीले भन्नुभयो, होइन विप्रवर दक्षिणाविना त कुनै अनुष्ठान पूर्ण हुँदैन र तपाईको आगमनले समस्त उत्सवको शोभा अनिर्वचनीय भएको छ, तपाई आफ्नो इच्छाले जे पनि माग्नुहोस् । शिवजीले तपाईलाई अवश्य प्रसन्न गर्नुहुनेछ । विश्रवाले भने, हजुरलाई कष्ट दिन चाहन्न माते, मैले न मागिकन धेरैथोक प्राप्त गरिसकेँ । हजुरको दर्शनभन्दा ठूलो मलाई के चाहियो र माते ? पार्वतीले भन्नुभयो, योे तपाईंको महानता हो विप्रवर तर अनुष्ठान पूर्ण हुन दक्षिणा आवश्यक हुन्छ ।

गृहपूजनमा विश्रवाको राक्षस कुलकी दोेस्री पत्नी कैकसी पनि साथमा थिइन् । उनले पति समीप आएर बिस्तारै भनिन््, दक्षिणामा यो दरबार माग्नुहोस् । उनको कुरा सुनेर महर्षि विस्मित भए तर पत्नीको करको अगाडि उनी बाध्य भएर पार्वतीलाई भने, संकोच हुन्छ माते । पार्वतीले भन्नुभयो । संकोच सोचेर यज्ञको पूर्णताको बारेमा सोच्नुस् विप्रवर । एकैछिन मौन रहेर कैकसीको दबाबलाई सम्झिदै उनले भने, माते, यदि साँच्चिकै हजुर मेरो पूजाबाट प्रसन्न हुनुहुन्छ भने, यदि हजुरले मलाई सन्तुष्ट गर्न खोज्नुभएको छ भने, यदि साँच्चिकै भगवान शिवजीमा सबैथोक दक्षिणामा दिने सामथ्र्य छ भने मलाई यो स्वर्णनगर दक्षिणामा दिनुहोस् ।

पार्वती आश्चर्यचकित हुनुभयो । उहाँले दुःखित मनले भन्नुभयो, यो स्वर्ण महल पनि तिमीसँग धेरै समयसम्म रहने छैन । यो जलेर नष्ट हुनेछ । तिम्रो कुलको दैवीय गुण जलेर नष्ट हुनेछ । त्यहीँ नजिकै शान्तिसँग बस्नुभएका शिवजीले भन्नुभयो ‘तथास्तु’ । तर, महर्षि विश्रवाले लंका उनको पहिली पत्नी महर्षि भारद्वाजकी पुत्री इडविडाबाट जन्मेका कुबेरलाई दिएर आफ्नो आश्रममा फर्के र पछि कैकसीबाट जन्मेका रावणले कुबेरलाई लंकाबाट लखेटेर स्वर्णलंका आफूले कब्जा गरे ।

पार्वतीका लागि बनाइएको महलमा रावणको बलजफ्ती अधिकार भए झैँ यस देवभूमिमा पनि राक्षसहरूको अधिकार छ अहिले । सत्ताका चास्नीमा डुबेका कैकसी र रावणहरू प्रशस्त छन् यहाँ । जानी नजानी सनातन धर्म बचाउने नाममा आफ्नो मौलिक धर्म, संस्कृति र परम्पराहरूलाई समाप्त पार्न आरएसएसको पछि लाग्नेहरूको संख्या पनि उल्लेख्य छ । यिनीहरू पनि आरएसएसको कैकसी हुन् । धर्मान्तरणविरुद्धको लडाइँ नेपाली जनताको हो र यो लडाइँ नेपाली जनता आफैंले लड्नुपर्छ न कि कुनै विदेशी छद्मवेशी षड्यन्त्रकारीहरूको पछ्यौरा समातेर ।