काठमाडौं । मनसुन बाहिरिनुअघि देशभर ‘असौजे झरी’ परेको छ । शुक्रबार रातिदेखि देशका अधिकांश स्थानमा लगातारको झरी परेको हो । केही क्षेत्रमा भने भारी वर्षासमेत भएको मौसम विज्ञान विभागले जनाएको छ । विभागका अनुसार अहिले परिरहेको झरी कम्तीमा आइतबारसम्म जारी रहनेछ । नेपालमा मनसुनी वायु कायमै रहेका बेला बंगालको खाडीबाट जलवाष्पयुक्त वायु नेपाल प्रवेश गरेपछि देशभर वर्षा भएको हो । त्यसको प्रभावले आइतबारसम्म सामान्यदेखि भीषण वर्षा हुनसक्ने प्रक्षेपण विभागले गरेको छ ।
विभागका अनुसार शनिबारसम्म नारायणी, बागमती, तिनाउ, पूर्वी राप्ती, पश्चिम राप्ती, बबई र यसका सहायक नदीहरूमा बाढीको जोखिम छ । शनिबार बेलुकासम्म नै लगातार पानी पर्ने सम्भावना रहेकाले नदी तथा खोला तटीय क्षेत्रमा सतर्कता अपनाउन विभागले अनुरोध गरेको छ ।
सामान्य अवस्थामा असोज १६ गते नेपालबाट मनसुन बाहिरिने गर्छ । तर, यसपालि भने आगामी केही दिन देशभरि वर्षा हुने मौसविद्हरूले बताएका छन् । लगातारको वर्षाले शुक्रबार देशभरको जनजीवन प्रभावित भएको थियो । लगातारको झरीले त्रिभुवन अन्तर्राष्ट्रिय विमानस्थलका अधिकांश आन्तरिक उडान प्रभावित भएका थिए । भारी वर्षाका कारण शुक्रबार काठमाडौंबाट हुने भद्रपुर, विराटनगर, सिमरा, भरतपुर, पोखरा, सुर्खेतका लागि तय नियमित उडान रद्द भएका थिए । त्यस्तै, मुख्य पर्यटकीय क्षेत्र सगरमाथा प्रवेश गर्ने लुक्लामा पनि उडान रद्द भएका थिए । भारी वर्षाले अन्तर्राष्ट्रिय उडानलाई भने असर नपु¥याएको विमानस्थल कार्यालयले जनाएको छ ।
ठाउँ ठाउँका सडक अवरुद्ध
लगातारको झरीले ठाउँ ठाउँका सडक अवरुद्ध भएका छन् । बिहीबार रातिदेखि परेको अविरल वर्षाका कारण शुक्रबार दिनभर देशभरका विभिन्न सडक अवरुद्ध भएका हुन् । बाढी पहिरोले अवरुद्ध केही सडक खुले पनि अधिकांश रातभर बन्द भएका हुन् । हेटौँडाबाट काठमाडौं भित्रिने छोटो दूरीको वैकल्पिक भीमफेदी-कुलेखानी-सिस्नेरी-दक्षिणकाली सडक पहिरोका कारण अवरुद्ध भएको थियो । इन्द्रसरोवर गाउँपालिका-३ रामचन्द्र भञ्ज्याङमा शुक्रबार दिउँसो गएको पहिरोका कारण सडक अवरुद्ध भएको जिल्ला प्रहरी कार्यालय हेटौँडाले जनाएको छ । यसैगरी, मध्यपहाडी लोकमार्गअन्तर्गत हलेसी तुवाचुङ नगरपालिका–७ हलेसी महादेवस्थानको बर्खेटारमा पहिरोले सडक अवरुद्ध भएको छ । शुक्रबार दिउँसो करिब साढे १२ बजेतिर तुवाचुङडाँडा क्षेत्रबाट पहिरो खसेर सडक पुरिँदा अवरुद्ध भएको हो ।
यस्तै, वर्षासँगै हेवा खोलामा आएको बाढीले डाइभर्सनको सतह पार गरेपछि सदरमुकामदेखि फालेलुङ गाउँपालिकातर्फ जाने सवारी र ढुवानीका साधन आवागमन बन्द भएको छ । यता, धादिङको धुनिबेँसीको सिस्ने खोलामा पहिरोसँगै आएको लेदोका कारण धादिङको नौबिसे नागढुंगा खण्ड अवरुद्ध भएको छ । लगातारको वर्षासँगै सडक छेउमा आएको पहिरोको लेदोको कारण सडक अवरुद्ध भएपछि संघीय राजधानी काठमाडौं भित्रिने र राजधानीबाट बाहिरिने सवारीसाधन रोकिएका थिए । सुरुङमार्गको प्रवेशद्वार अगाडिपट्टि आएको पहिरोबाट झरेको लेदो सडकमा आउँदा अवरुद्ध भएको हो ।
कपुरकोट-राम्री सडक खण्डमा तीन दिन ठूला सवारी साधन सञ्चालन रोक
वर्षाका कारण राप्ती राजमार्गको कपुरकोटदेखि राम्रीसम्मको सडक पहिरोले क्षतिग्रस्त भएपछि सडक डिभिजन कार्यालय दाङले मर्मतका लागि भन्दै शुक्रबारदेखि आइतरबासम्म उक्त सडक खण्डमा तीन दिनका लागि ठूला सवारीसाधन सञ्चालनमा रोक लगाएको छ । बिहीबार सूचना प्रकाशन गरेर कार्यालयले ठूला सवारीसाधन (टिपर, ट्रक) सञ्चालनमा रोक लगाएको हो । कपुरकोटदेखि राम्रीको बीचमा पहिरो जाने मात्र नभई सडकसमेत भासिएकाले रोक लगाइएको सडक डिभिजन कार्यालयले जनाएको छ । कार्यालयका अनुसार भारवहन गाडीलाई रोक लगाए पनि अन्य गाडीहरू भने सुचारु रहनेछन् ।
दुई दिन रात्रि बस चलाउन रोक
वर्षा देशभर फैलिँदै गएको छ । लगातार झरी परेसँगै राष्ट्रिय विपद् जोखिम न्यूनीकरण तथा व्यवस्थापन प्राधिकरणले दुई दिन हिमाली र पहाडी जिल्लामा रात्रि बस नचलाउन अनुरोध गरेको छ । प्राधिकरणले तराईका होचा भूभागमा डुबानको जोखिम पनि भएकाले सकेसम्म भुइँतलामा अन्नपात नराख्न पनि आग्रह गरेको छ । यसैगरी, लगातार पानी परिरहेकोले शुक्रबार राति नारायणगढ–मुग्लिन सडकमा गाडी चलाउन रोक लगाइएको थियो । जिल्ला सुरक्षा समितिले लगातारको पानीले रातीको समयमा पहिरोको जोखिम आँकलन नगरी गाडी चल्न नदिने निर्णय गरेको हो । समितिका संयोजक तथा चितवनका प्रमुख जिल्ला अधिकारी इन्द्रदेव यादवले शुक्रबार बेलुका ७ बजेदेखि बिहान ५ बजेसम्म गाडी चलाउन रोक लगाइएको जानकारी दिनुभयो ।
अत्यावश्यकबाहेक टाढाको यात्रा नगर्न आग्रह
गृह मन्त्रालयको राष्ट्रिय विपद् जोखिम न्यूनीकरण तथा व्यवस्थापन प्राधिकरणले अधिकांश स्थानहरूमा ठूलो पानी परिरहेकाले सचेत रहन आग्रह गरेको छ । प्राधिकरणले शुक्रबार दैनिक विपद् बुलेटिन सार्वजनिक गर्दै आइतबारसम्म नै झरी रहने सम्भावना रहेकाले अत्यावश्यकबाहेक घरदेखि टाढाको यात्रा नगर्न आग्रह गरेको हो । प्राधिकरणका अनुसार विशेषगरी कोशी, बागमती, गण्डकी र लुम्बिनी प्रदेशका सबै जिल्ला र मधेश, कर्णाली र सुदूरपश्चिम प्रदेशका केही जिल्लाहरू बढी प्रभावित हुनसक्ने देखिएको छ । त्यसैले आवश्यक सतर्कता अपनाउन प्राधिकरणले अनुरोध गरेको छ । निरन्तर परेको वर्षाका कारण विभिन्न राजमार्गहरूमा पहिरो जाँदा सडक अवरुद्ध भएका छन् । काठमाडौं महानगरपालिकाले पनि नियमित झरी र समय समयमा भारी वर्षा भइरहेकाले काठमाडौंका नदीहरूमा पानीको प्रवाह उच्च भएको जानकारी दिएको छ । महानगरपालिकाले सूचना नै जारी गरेर भनेको छ, ‘नदी किनारा, खोला, खोल्सामा अत्यावश्यक कामबाहेक नजाऔँ, पानी जम्मा भएको सडकमा प्रवेश नगरौँ, सवारी प्रवेश नगराऔँ, कोरीडोर, सडक किनारा, सडक तथा गल्लीमा सवारी पार्किङ नगरौँ, अनावश्यक सामान राखेर आवागमनमा अवरोध नगरौँ, आवश्यक सतर्कता अपनाऔँ, विपद् सामना गर्न पूर्वतयारी गरौँ ।’
आइतबारदेखि देशभर नै मौसममा क्रमिक सुधार हुने
लगातारको अविरल वर्षा शनिबारसम्मै जारी रहने भएको छ । मौसम विज्ञान विभागका मौसमविद्हरूले शनिबार रातिसम्मै झरी जारी रहने बताएका हुन् । विभागका मौसमविद् गोविन्द झाले आज (शनिबार) सम्म झरी जारी रहने बताउनुभयो । शनिबारदेखि पूर्वतिर खुल्दै गए पनि पश्चिमतिर भने बढ्ने उहाँले बताउनुभयो । आइतबारदेखि भने देशभर नै मौसममा क्रमिक सुधार देखिँदै जाने सम्भावना रहेको उहाँको भनाइ छ । ‘बिहीबार रातिदेखिको झरी शुक्रबार रातिसम्म लगातार पर्ने सम्भावना छ । आज (शनिबार) पूर्वतिर खुल्दै जान्छ तर, पश्चिमतिर बढ्दै जाने देखिन्छ ।’ आइतबारदेखि भने देशभर नै मौसममा क्रमिक सुधार देखिँदै जाने सम्भावना छ ।’ विभागले यसअघि नै बिहीबारदेखि आइतबारसम्म देशका धेरैजसो भागमा ‘हल्का’देखि ‘अति भारी वर्षा’ हुने देखिएको भन्दै चेतावनी जारी गरेको थियो । ५६ जिल्ला उच्च जोखिममा पर्ने आँकलन विभागले सार्वजनिक गरेको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच