धनगढीमा आजदेखि सीप तथा रोजगार मेला

कैलाली । धनगढीमा बिहीबारदेखि सीप तथा रोजगार मेला सुरु हुने भएको छ । धनगढी उपमहानगरपालिकाको आयोजनामा हुने मेलाको तयारी पूरा भएको उपप्रमुख कन्दकला रानाले जानकारी दिनुभयो । धनगढी उपमहानगरपालिकाले १८ देखि ४० वर्षका युवालाई स्वरोजगार हुन सहयोग पुगाउन विभिन्न ८ विधामा २९ किसिमका तालिम दिइने उहाँले बताउनुभयो । यसपटक एक हजार ४० जनालाई विभिन्न २९ किसिमको तालिम दिन लागिएको हो । तालिम तथा रोजगार व्यवसायी महासंघलगायत विभिन्न सघं संस्थासँगको सहकार्यमा मेला आयोजना गरिन लागेको हो ।

मेलामा सहभागी हुन चार हजार आठ सय ३० जनाको आवेदन परेको तालिम तथा रोजगार व्यवसायी महासंघ सुदूरपश्चिमका अध्यक्ष प्रमोद पाठकले जानकारी दिनुभयो । मेलाका लागि सुदूरपश्चिमका सबै स्थानीय तहबाट युवाहरूले आवेदन दिएका थिए । सोमध्ये फोनबाट र प्रत्यक्ष बोलाएर अन्तर्वाता गरी तालिमका लागि छनोट गरिएको उहाँले बताउनुभयो । सुदूरपश्चिम प्रदेशका नौ जिल्लाका ४७ पालिकाबाट आवेदन आए पनि अब ३९ पालिकाका एक हजार ४० जनालाई तालिम दिइने उहाँले जानकारी दिनुभयो ।

१८ देखि ४० वर्षका युवालाई स्वरोजगार हुन सहयोग पुर्‍याउन विभिन्न आठ विधामा २९ किसिमका तालिम दिइने बताइएको छ । यसपटक एक हजार ४० जनालाई विभिन्न २९ किसिमको तालिम दिइने धनगढी उपमहानगरपालिकाले जनाएको छ ।

बिल्डिङ पेन्टरको तालिमका लागि २५ सिट, पुरोहितका लागि २५, वेटरमा ५०, टायल मार्बल फिक्स्चर तालिमका लागि ५०, फेसन डिजाइन, एड्भान्स ब्युटिसियन, लेखा व्यवस्थापन तालिम, एड्भान्स टेलरिङ, कफी वारिस्तालगायत विभिन्न तालिमका लागि कोटा निर्धारण गरिएको थियो । छनोट भएका युवायुवतीहरू तालिममा सहभागी हुने धनगढी उपमहानगरपालिकाका मेयर गोपाल हमालले बताउनुभयो । उहाँका अनुसार तालिमका लागि छनोट भएका युवालाई एक महिनासम्म निःशुल्क तालिम दिइनेछ । तालिम सकिएपछि स्वरोजगार बन्न अभिमुखीकरण तालिमसमेत दिइनेछ ।

४० दिनसम्म चल्ने तालिममा युवाहरूलाई स्वरोजगार तथा आत्मनिर्भर बनाउन बजार मागअनुसार सीप सिकाइ दक्ष बनाउने, स्वदेशमै रोजगारको अवसर पाउने गरी दक्ष बनाउने, सँगै बाहिर जाने युवालाई समेत दक्ष बनाएर दक्षताको अभावमा विदेशमा असुरक्षित र न्यून ज्यालामा रोजगारी गर्नुपर्ने बाध्यतासमेत हट्ने उपमहानगरपालिकाको अपेक्षा छ । त्यस्तै, मेलामा युवालाई दक्ष बनाई स्वउद्यमी बन्न र स्टार्टअप व्यवसायका लागि उत्प्रेरित गर्नेलगायतका लक्ष्य रहेको मेयर हमालले बताउनुभयो । यस्ता कार्यक्रम संघीय सरकारले गर्नुपर्ने उहाँको भनाइ छ । हरेक जिल्लामा हरेक वर्ष यस्ता मेला लाग्न जरुरी रहेको उहाँले बताउनुभयो । धनगढी उपमहानगरपालिका–१ स्थित खुलामञ्चमा आयोजना हुने मेला उद्घाटन नेपाल सरकारका उद्योग, वाणिज्य तथा आपुर्तिमन्त्री दामोदरप्रसाद भण्डारीले गर्ने कार्यक्रम तय भएको छ ।

यसैबीच कार्यसम्पादन मूल्यांकनमा कैलालीका १३ स्थानीय तहमध्ये धनगढी उपमहानगरपालिका पहिलो भएको थियो । राष्ट्रिय प्राकृतिक स्रोत तथा वित्त आयोगले सार्वजनिक गरेको आर्थिक वर्ष २०८०/०८१ को कार्यसम्पादन मूल्यांकन विवरणअनुसार ६३.३ अंक प्राप्त गर्दै धनगढी उपमहानगर जिल्लामै पहिलो भएको हो । आयोगले माघ ३० गते कार्यसम्पादन मूल्यांकनका आधारमा प्रदेश सरकार र स्थानीय तहले प्राप्त गरेको अंकसम्बन्धी विवरण प्रकाशित गरेको थियो । जानकी गाउँपालिका ६३.१ अंकसहित दोस्रो, बर्दगोरिया गाउँपालिका ६२.७ अंकसहित तेस्रो र घोडाघोडी नगरपालिका ६२. ७ अंकसहित चौथो भएका थिए । पाँचौं स्थानमा गोदावरी नगरपालिकाले ५८.७ र छैटौंमा ५४.६ अंकसहित कैलारी गाउँपालिका रहेको छ । टीकापुर नगरपालिका ५२.७ अंकसहित सातौं, जोशीपुर गाउँपालिका ५०.४ अंकसहित आठौं, गौरीगंगा नगरपालिका ४७.१ अंकसहित नवौं र भजनी नगरपालिका ४७.१ अंकसहित १० स्थानमा रहेको छ ।