पूर्वविशिष्टलाई आजीवन सुविधा दिने तयारी सरकारको दुस्कर्म : नेता कोइराला

राजेन्द्र गौतम झापा, संवाददाता

१ चैत्र २०८१, शुक्रबार १५:१५

Read Time = 3 mins

डिजिटल संस्करण

कोशी प्रदेश

प्रदेश समाचार

A A- A+

झापा । नेपाली कांग्रेसका नेता डा . शेखर कोइरालाले वर्तमान सरकार कुशासनको दुश्चकर्ममा परेको कडा टिप्पणी गर्नु भएको छ । पूर्व विशिष्टलाई आजीवन सुविधा दिने कानुन बनाउन सरकार लागेपछि नेता कोइराला आक्रोशित बन्नु भएको हो ।

नेता कोइरालाले पूर्व विशिष्टलाई आजीवन सुविधा दिने सरकारको योजनालाई " विनास काले विपरीत बुद्धि" को संज्ञा समेत दिनु भएको छ । " यस्ता कामले व्यवस्था र पार्टीको हित गर्दैन " सामाजिक सञ्जालमा नेता कोइरालाले लेख्नुभएको छ "सरकार ! यस्तो काम अघि नबढाउ बरु दिएको सुविधा पनि घटाऊ ।"

उहाँले सरकारको काम कारबाहीलाई लिएर गलत तत्वले सडक तताइरहेको संवेदनशील अवस्थामा अर्को दुस्कर्म नगर्न र पूर्व विशिष्टलाई दिएको सुविधा घटाउन सरकारसँग माग समेत गर्नु भएको छ ।

"सरकार कुशासनको दुश्चक्रमा परेको छ, नागरिकको बढ्दो आक्रोस, सत्तारुढ पार्टी भित्र नै सरकारको कामको तीव्र विरोध भइरहेको छ " उहाँको टिप्पणी छ," गलत तत्वहरुले सडक तताइरहेको संवेदनशील अवस्थामा पूर्व विशिष्टलाई आजीवन सुविधा दिने कुरा अर्को दुस्कर्मको प्रयास हो ।"

सरकारको विषयमा बारम्बार असन्तुष्टि पोख्दै आउनु भएका नेता कोइरालाको पछिल्लो अभिव्यक्ति वर्तमान सरकारको कार्य सम्पादनलाई लिएर अहिलेसम्मकै कडा टिप्पणी हो । आफूहरू सत्तामा रहेको तर सरकारमा नरहेको धारणा बारबार दोहोर्‍याइ रहनु भएको नेता कोइराला सरकारको पछिल्लो कामबाट क्षुब्ध बन्नु भएको छ ।

सरकारले पूर्वराष्ट्रपति, पूर्वउपराष्ट्रपति, पूर्वप्रधानमन्त्री, मन्त्रिपरिषदका पूर्वअध्यक्ष र राष्ट्रियसभाका पूर्वअध्यक्षलाई आजीवन सुविधा दिने गरी विधेयक ल्याउने गृहकार्य गरिरहेको छ । सरकारको यो कामको आलोचना भइरहेको छ ।

गृह मन्त्रालयले पूर्व विशिष्टहरूका लागि आजीवन सुविधा दिने गरी विधेयक ल्याउन मन्त्रिपरिषदबाट स्वीकृति लिएको छ । गृहमन्त्री रमेश लेखककाे सक्रियतामा सो काम अघि बढेपछि नेता कोइराला विच्किनु भएको हो ।

यो खबर पढेर तपाईलाई कस्तो महसुस भयो ?