काठमाडौं । फिल्म निर्माण कम्पनी अनन्या फिल्मस् प्रालिले मल्टिष्टारर फिल्म ‘जेरी अन टप’को छायांकन सम्पन्न गरेको छ । हिमालपारिको जिल्ला मुस्ताङमा फिल्मको छायांकन सम्पन्न गरेर कलाकारसहितको निर्माण टिम काठमाडौं रिटर्न भएको छ । यो फिल्ममा स्टार अभिनेता अनमोल केसी, अभिनेत्रीद्वय आँचल शर्मा र जसिता गुरुङ, चर्चित हाँस्य अभिनेता केदार घिमिरे ‘माग्नेबुढा’ प्रमुख अभिनयमा हुनुहुन्छ ।
‘फिल्ममा समावेश हुने दुई गीतबाहेकका सम्पूर्ण दृश्य छायांकन सकेर फर्केका छौं,’ निर्माता सरोज न्यौपानेले भन्नुभयो, ‘उत्कृष्ट फिल्म तयार हुनका लागि आवश्यक कुनै पक्षमा सम्झौता गरिएको छैन ।’ सगरमाथा बेसक्याम्प, काठमाडौं, मुस्ताङलगायत ठाउँमा फिल्म खिचिएको छ । फिल्मका केही दृश्य काठमाडौंमा झण्डै एक करोडको लागतमा तयार गरिएको सेटमा छायांकन गरिएको थियो ।
अभिनेता भुवन केसी, अभिनेत्री सुरक्षा पन्त र उषा खड्की पनि यो फिल्ममा प्रमुख अभिनयमा छन् । अनमोल पिता अभिनेता भुवन केसीले ‘जेरी अन टप’मा पनि अनमोलको बुबाकै भूमिका निभाउनुभएको छ । बाल कलाकार हुँदै कलाकारितामा प्रवेश गर्नुभएका अनमोलले ‘स्टार’को ट्याग पाइसक्दा अनमोल र भुवनलाई एकसाथ स्क्रिनमा देख्न आतुर दर्शकलाई यो फिल्म उपयुक्त अवसर बन्नेमा निर्माण टिम विश्वस्त छ ।
कलाकारको लाइन अपदेखि छायांकनसम्म पुग्दा फिल्मको बजेट झण्डै ६ करोड पुगेको निर्माता न्यौपानेले बताउनुभयो । गत सातामात्रै यो फिल्मको अन्तर्राष्ट्रिय वितरण तथा प्रदर्शन अधिकार बिक्री भएको थियो । हङ्कङमा स्थापना भएको एलजी एसोसिएट्सले तीन करोड बढी एमजी (मिनिमम ग्यारेन्टी)मा ‘जेरी अन टप’को विदेश राइट्स खरिद गरेको बताइएको छ । यद्यपि रकम भने दुवै पक्षले खुलाएका छैनन् । न्यौपानेले विदेश प्रदर्शन अधिकार बिक्री हुँदा फिल्मको आधा लगानी ‘कभर’ भइसकेको बताउनुभयो ।
सुयोग गुरुङको निर्देशनमा तयार यो फिल्मको प्रदर्शन मिति तय भइसकेको छैन । वितरण कम्पनीसँगको सल्लाहमा केही दिनमै फिल्मको प्रदर्शन मिति सार्वजनिक गरिने निर्माता न्यौपानेले बताउनुभयो । फिल्ममा समावेश हुने एक गीत नेपालमा र एक गीत भारतमा छायांकन गरिने निर्माण टिमले बताएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच