सर्लाहीका किसानलाई चैते धान रोप्ने चटारो

प्रकाश मैनाली सर्लाही, संवाददाता

१९ चैत्र २०८१, मङ्गलबार ०८:२४

Read Time = 3 mins

सिफारिस

संसद्को चालु अधिवेशनको अन्तिम बैठक आज बस्दै, तीन विधेयक पारित गरिने

डिजिटल संस्करण

प्रदेश समाचार

मधेश प्रदेश

A A- A+

सर्लाही । सर्लाहीमा सिचांई सुविधा भएका क्षेत्रका किसानहरूले चैते धान रोपाइँ तीव्र रूपमा सुरु गरेका छन्। कुलो तथा नहरको पानी उपलब्ध हुने तथा पम्पसेटबाट सिंचाइ गर्न सकिने ठाउँहरूमा किसानहरू उत्साहका साथ खेतीमा जुटेका हुन् ।

कृषि ज्ञान केन्द्र सर्लाहीका प्रमुख कमलदेवप्रसाद कुशवाहाले फिल्ड भिजिटका क्रममा कविलासी, ईश्वरपुर, लालबन्दी लगायतका क्षेत्रमा किसानहरूले धमाधम चैते धान रोपिरहेको जानकारी दिनुभयो। उहाँका अनुसार, पछिल्लो वर्षदेखि सर्लाहीमा चैते धान खेतीको क्षेत्रफल विस्तार भइरहेको छ। कृषि ज्ञान केन्द्रको तथ्याङ्कअनुसार, गत वर्ष जिल्लामा ५० हेक्टर क्षेत्रफलमा चैते धान खेती गरिएको थियो।

केही वर्षसम्म यो खेती रोकिएको भए पनि पम्पसेट र बोरिङ प्रविधिको प्रयोग गर्दै किसानहरूले पुनः खेती गर्न थालेका छन्। वैशाख दोस्रो सातासम्म रोपाइँ सम्पन्न हुने अनुमान गरिएको छ।

यसैबीच, गहुँ काट्ने सिजन सुरु भएसँगै किसानहरूले गहुँ भित्र्याउने कामलाई तीव्र बनाएका छन्। गहुँबाली उठाइसकेपछि थप किसानहरू चैते धान खेतीमा लाग्ने कृषि शाखाले जनाएको छ। सर्लाहीमा पूर्व–पश्चिम राजमार्गदेखि दक्षिणतर्फ नहरबाट सिंचाइ सुविधा पाएका तथा बोरिङ र पम्पसेटको प्रयोग गरिरहेका किसानहरूले खेती विस्तार गरिरहेका छन्।

गत वर्षको तुलनामा यस वर्ष केही सुक्खा अवस्थामा खेती गर्नुपरेको भए पनि किसानहरूले उत्साहपूर्वक रोपाइँ गरिरहेका छन्। गत वर्ष उत्पादन राम्रो भएको अनुभवका कारण यस वर्ष अझ राम्रो उपज हुने अपेक्षा गरिएको छ।

लालबन्दी नगरपालिकाका कृषि शाखाका प्रमुख गोकर्ण पौडेलका अनुसार, नगरपालिकाको जब्दी, सिस्वा, हरिभवन, जुटपानी, रानीगन्ज, र जियाजोर क्षेत्रमा चैते धान खेती भइरहेको छ। उहाँले नगरका विभिन्न वडाहरूमा रोपाइँ सुरु भइसकेको जानकारी दिनुभयो।

सिंचाइ सुविधा सहज भएमा यस वर्ष पनि चैते धान उत्पादनमा वृद्धि हुने आशा गरिएको छ। स्थानीय किसानहरूले अनुकूल मौसम र पर्याप्त पानी उपलब्ध भएमा अझ राम्रो उत्पादन हुने विश्वास व्यक्त गरेका छन्।