प्रसूतिगृह परिसरका क्यान्टिन अनुगमन

काठमाडौं । खाद्य प्रविधि तथा गुण नियन्त्रण विभागले मोबाइल फुड ल्याब भ्यान सञ्चालन गरी काठमाडौं महानगरपालिकासँगको सहकार्यमा खाद्य बजार बजार अनुमन गरेको छ । महानगरपालिकाका उपप्रमुख सुनिता डंगोल, महानगर प्रमुखका विज्ञ सल्लाहकार जीवनप्रभा लामा, खाद्य प्रविधि तथा गुण नियन्त्रण विभागका निमित्त महानिर्देशक सोमकान्त रिजाल, महानगरपालिकाका प्रमुख सल्लाहकार सन्तोष गिरी तथा विभागका खाद्य निरीक्षण अधिकारीहरूसमेतको टोलीमार्फत् बिहीबार थापाथलीस्थित परोपकार प्रसूतिगृह तथा स्त्री रोग अस्पतालमा सञ्चालित विभिन्न क्यान्टिनको स्थलगत अनुगमन तथा खाद्य पदार्थको नमुना परीक्षण गरेको हो । काठमाडौं क्षेत्रमा मोबाइल फुड ल्याब भ्यान सञ्चालन गरी खाद्य पदार्थको स्वच्छता तथा गुणस्तर नियमन कार्यमा सहकार्य गर्ने गरी चैत ४ गते विभाग र महानगरपालिकाबीच समझदारी भएको थियो ।

प्रसूतिगृहस्थित सुनिल क्यान्टिन तथा कपडा पसल अनुगमनका क्रममा सरसफाइमा कमी रहेको, फ्रिजमा भण्डारण व्यवस्थित नरहेको, भुइँमा रहेको टायल फुटेको अवस्थामा पाइएको, भेज र ननभेज खानेकुरा एकै ठाउँ भण्डारण गरेको पाइएको खाद्य प्रविधि तथा गुण नियन्त्रण विभागले जनाएको छ । उक्त क्यान्टिनमा बिक्री भइरहेका दूध तथा पानीको नमुना मोबाइल फुड ल्याब भ्यानमा परीक्षण गरिएकोमा नमुनामा कैफियत नपाइएको पनि विभागद्वारा जारी प्रेस विज्ञप्तिमा उल्लेख छ । उक्त क्यान्टिनलाई सरसफाइमा ध्यान दिन, फ्रिजमा खानेकुराको उचित भण्डारण गर्न, भेज र ननभेज खानेकुरा अलग्गै भण्डारण गर्ने व्यवस्था मिलाउन, क्यान्टिनको भुइँ तथा भित्ताको फुटेको टायल मर्मत गर्नका साथै खाद्य पदार्थ भण्डारण गर्ने कक्ष यथाशीघ्र व्यवस्थित गरी विभागमा जानकारी गराउन निर्देशन दिइएको विभागका प्रवक्ता मोहनकृष्ण महर्जले बताउनुभएको छ ।

त्यसैगरी मनकामना माई क्यान्टिनमा अनुगमनमा सरसफाइमा कमी रहेको, खाद्य पदार्थ भण्डारण व्यवस्थित नरहेको, झ्याल तथा ढोकामा जाली नभएको, भेज र ननभेज खानेकुरा एकै ठाउँ भण्डारण गरेको पाइएको छ । उक्त क्यान्टिनमा तयारी गरी बिक्रीमा रहेको समोसाको नमुनामा थप परीक्षणका लागि नमुना संकलन गर्नुका साथै क्यान्टिनमा बिक्री भइरहेका दूध तथा पिउने पानीको नमुना मोबाइल फुड ल्याब भ्यानमा परीक्षण गरिएकोमा कैफियत भने नपाइएको पनि विभागले जनाएको छ । तथापि उक्त क्यान्टिनलाई सरसफाइमा ध्यान दिन, फ्रिजमा खानेकुराको उचित भण्डारण गर्न, भेज र ननभेज खानेकुरा अलग्गै भण्डारण गर्ने व्यवस्था मिलाउन तथा झ्याल तथा ढोकामा पेष्ट नियन्त्रणका लागि जाली राख्न निर्देशन दिएको प्रवक्ता महर्जनले बताउनुभएको छ ।

त्यस्तै, क्याफे केयर प्रालि थापाथलीको अनुगमनमा सरसफाइ अवस्था सामान्य रहेको तर फ्रिजमा भण्डारण व्यवस्थित नरहेको, भेज र ननभेज खानेकुरा एकैठाउँ भण्डारण गरेको पाइएको छ । उक्त क्यान्टिनमा बिक्रीका लागि राखिएका क्रिम डोनटको थप परीक्षणका लागि नमुना संकलन गर्नुका साथै क्यान्टिनमा बिक्रीमा रहेको दूध तथा पिउने पानीको नमुना मोबाइल फुड ल्याब भ्यानमा परीक्षण गरिएकोमा कैफियत नपाइएको बताइएको छ । तथापि उक्त क्यान्टिनलाई सरसफाइमा ध्यान दिन, फ्रिजमा खानेकुराको उचित भण्डारण गर्न, भेज र ननभेज खानेकुरा अलग्गै भण्डारण गर्ने व्यवस्था मिलाउन तथा खाद्य पदार्थ भण्डारण गर्ने कक्ष व्यवस्थित गर्न निर्देशन दिइएको छ । परोपकार प्रसूतिगृह तथा स्त्री रोग अस्पतालमा सञ्चालित उल्लेखित विभिन्न क्यान्टिनको स्थलगत निरीक्षण अनुगमनका क्रममा बिक्री वितरणमा रहेका दूध तथा पिउने पानीसहितका छ थान नमुनाहरू संकलन गरी तत्काल मोबाइल फुड ल्याब भ्यानमार्फत् स्थलगत परीक्षण गरेकोमा कैफियत नपाएको विभागले उल्लेख गरेको छ ।