चीनद्वारा ताइवानको सीमा क्षेत्रमा सैन्य अभ्यास

Friday August 5, 2022

Read Time = 2 mins

विदेश

A A- A+

एजेन्सी/चीनले ताइवानसँगको सीमा क्षेत्रमा सैन्य अभ्यास गरेको छ । अमेरिकी प्रतिनिधिसभाकी सभामुख न्यान्सी पेलोसी ताइवान भ्रमणबाट फर्किएलगत्तै चीनले ताइवान आसपासको क्षेत्रमा सैन्य अभ्यास सुरु गरेको हो । चीनले संसारको सबैभन्दा व्यस्त जलमार्गमा सैन्य अभ्यास हुने र लामो दूरीसम्म गोला–बारुद्ध प्रहार हुनेसमेत बताइसकेको छ ।

यो अभ्यासबाट जोगिन ताइवानले आफ्ना जहाजहरूलाई वैकल्पिक मार्ग अपनाउन आग्रह गरेको छ । जापानले छिमेकी मुलुकसँगको हवाई मार्गमा समेत विकल्पको खोजी गरेको छ । यसअघि चीनको चेतावनी बाबजुद पेलोसी मंगलबार ताइवान पुग्नुभएको थियो ।

भ्रमणबाट फर्किँदै गर्दा ताइवानलाई एक्लो नछोड्ने पेलोसीको अभिव्यक्तिपछि चीन थप आक्रोशित देखिएको छ । यसअघि जी सेभेनको बैठकमा चिनियाँ गतिविधिले ताइवान र आसपासका क्षेत्रमा अस्थिरता फैलिन लागेको चर्चा भएको थियो ।

यस्तै सीमा क्षेत्रमा चिनियाँ लडाकु विमानहरूको गतिविधि बढेपछि ताइवानले पनि आफ्नो आकाशमा लडाकु विमानको उपस्थिति बढाएको छ । उसले चिनियाँ लडाकु विमानको निगरानीका लागि वायु सेना परिचालन गरेको उल्लेख गरेको छ ।

यो खबर पढेर तपाईलाई कस्तो महसुस भयो ?