म्याग्दी । म्याग्दीको बेनी नगरपालिका वडा नं ९ घतानको एक घरमा दुर्लभ मानिएको ‘किङ्ग कोब्रा’ अर्थात् राज नाग भेटिएको छ ।
बुधबार (हिजो) साँझ घतानका टेकबहादुर खड्काको घरमा पिंडीमा अचानक राजजाग (किङ कोब्रा) देखिए पछि हेर्नेहरुको भीड लागेको बेनी नगरपालिका वडा नं ९ घतानका वडाअध्यक्ष चक्रवहादुर केसीले बताउनुभयो ।
विगत ९ वर्षदेखि पंक्षी तथा जंगली प्राणीहरुको खोज अनुसन्धानमा लाग्नुभएका त्रिभुवन विश्वविद्यालयमा एमएससी (प्राणीशास्त्र उत्तिर्ण) केशव चोखालले मंगलवार खड्काको घरमा भेटिएको नाग दुर्लभ ‘किङ्ग कोब्रा’ अर्थात् राज नाग नै भएको पुष्टी गर्नुभएको छ । चोखालका अनुसार २०७६ जेठमा पनि घतानकै कोशेपानीको जंगलमा किङ कोब्रा फेला परेको थियो ।
नेपालका लागि अत्यन्त दुर्लभ मानिएको सो सर्प पछिल्लो समय नेपालको मध्य पहाडी क्षेत्रहरुमा फाट्टफुट्ट देखिन थालेको प्राणी शास्त्रका अध्यता चोखालले बताउनुभयो । चोखालका अनुसार यसको संरक्षणका लागि सरकार र समुदाय दुवै लाग्न आवश्यक छ ।
नेपालीमा राजनाग, कालिनाग भनिने यो सर्पको बैज्ञानिक नाम ओपिओपगुस हन्नह (Ophiophagus Hannah) हो । यो विशेष गरेर तराई क्षेत्र वा संरक्षित क्षेत्रमा पाइने सर्प भएपनि पछिल्लो समय जलवायु परिवर्तनका कारण मध्य पहाडी क्षेत्रमा बसाइ सरेको हुनसक्ने चोखालको अनुमान छ । यो अत्यन्त विषालु प्रजातिको सर्प भए पनि नेपालमा भने यसले टोकेको जानकारी भने नरहेको चोखालले बताउनुभयो ।
यो सर्पलाई नचलाउने, नजिस्काउने र यसको नजिकमा नजाने हो भने यसबाट बच्न सकिने चोखालको भनाइ छ ।
म्याग्दीमा २०७६ सालमा भेटिएको सो नाग ‘किङ्ग कोब्रा’ अर्थात राज नाग नै भएको किङ्ग कोब्राका विशेषज्ञ एवम् हिमालयन नेचरका अनुसन्धान अधिकृत जीवन थापाले पुष्टि गर्नुभएको थियो । अहिले पनि सोही नाग पुनः खड्काको घरमा भेटिएको प्राणी शास्त्रका जानकार चोखालले बताउनुभयो । चोखालका अनुसार नेपालमा पाइने ८२ प्रजातीका सर्पहरुमध्ये किङ्ग कोब्राको संख्या अत्यन्त न्यून रहेको छ । यो सर्प नेपालको मात्रै नभएर विश्वकै सबैभन्दा ठूलो विषालु सर्प हो ।
यो सर्प दक्षिण एशिया र दक्षिण पूर्वी एशियाका १६ वटा देशमा मात्रै पाइन्छ । विश्वका १६ वटा देशमा पाइने भएपनि थाइल्याण्डको जंगली क्षेत्रमा बाहेक अरु ठाउँमा यो अत्यन्त दुर्लभ प्रजातीमा रहेको उहाँले जानकारी दिनुभयो ।
चोखालकाअनुसार यसले आहाराको रुपमा अरु सर्पलाई नै खाने गर्दछ । कहिलेकाँही आफ्नै प्रजातीका सर्पलाई पनि खाने गरेको अनुसन्धानबाट भेटिएको उहाँको भनाइ छ । चोखालले दिएको जानकारी अनुसार यसलाई आइयूटिएन (विश्व संरक्षण संघ)को रातो सूचिमा अति संवेदनशील भनेर सूचिकृत गरिएको छ । त्यसैगरी नेपालको कानुनले पनि संरक्षित वन्यजन्तुको सुचिमा राखेको छ ।
उहाँकाअनुसार यो सर्प विश्वव्यापिरुपमा नै अति कमलाई मात्र जानकारी भएको सर्प हो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच