नागरिकता विधेयक राष्ट्रघाती : महासचिव मनोज भट्ट

रुपन्देही । राष्ट्रिय जनमोर्चाका महासचिव मनोज भट्टले राष्ट्रपति रामचन्द्र पौडेलले प्रमाणिकरण गरेको नागरिकता विद्येयक नेपाल र नेपालीको हितमा नभएको बताउनु भएको छ ।

भारतलाई खुशी पार्न प्रधानमन्त्री पुष्पकमल दाहाल प्रचण्डले राष्ट्रपतिलाई दवाव दिएर नागरिकता विद्येयक प्रमाणिकरण गरिएको नेता भट्टको दाबी छ ।

राष्ट्रिय जनमोर्चा रुपन्देहीको शुक्रबारदेखि बुटवलमा शुरु भएको छैठौ जिल्ला सम्मेलन उद्घाटन कार्यक्रममा बोल्दै उहाँले अहिलेको नागरिकता विधेयक राष्ट्रघाती भएकाे बताउनु भयाे ।

महासचिव भट्टले वर्तमान सरकारले नागरिकता विद्येयक ल्याएर गैरकानुनी काम गरेको बताउनु भयो ।

नागरिकता विद्येयक राष्ट्रपतिबाट प्रमाणिकरण गरेसँगै राष्ट्रपति जस्तो सम्मानित संस्था विवादमा मुछिएको वताउदै उहाँले सरकारले गैर नेपालीलाई नागरिकता दिनेगरी नागरिकता विद्येयक ल्याएको बताउंनु भयो। नेता भट्टले भन्नु भयो – नागरिकता विद्येयक ल्याउनुको प्रचण्डको प्रमुख उद्वेश्य भारतलाई खुशी पार्नु हो ।

उहाँले अहिलेको नागरिकता विद्येयक आएसंगै राष्ट्रियतामाथि खतरा बढेको उल्लेख गर्दै सार्वभौम सत्ता र अखण्डतामाथि भारतीय एकाधिकार बढेको तर्क गर्नु भयो ।

अहिलेको नागरिकता विद्येयकले नेपालमा रहेका एक करोड भारतीयलाई नागकिरता दिन बाटो खुलेको बताउंदै अब नेपाली अल्पमतमा पर्ने सम्भावाना बढेको बताउनु भयो।

प्रधानमन्त्री पुष्पकमल प्रचण्डको भारत भ्रमण नेपालको हितमा नभएको दावी गर्दै भारत र अमेरिकाले चीनकाविरुद्व लड्न सरकारलाई प्रयोग गर्न सक्ने उहाँको भनाई थियो।

प्रधानमन्त्री भारत गएर भारतले सीमा मिचेको विषयमा बोल्न नसकेको बताउँदै उहाँले 'भारतसंग बोल्न डराउने अनी नेपाल फर्केर भ्रमण देशको लागि ऐतिहांसिक भयो भन्नु नेपाली र नेपालीमाथि गरिएको बैमानी हो'  भन्नु भयोे ।

नेपालको भूमिलाई भारतले अखण्ड भारतको नक्सामा समावेश गर्नु सांस्कृतिक नक्सा नभएको र राजनीतिक नक्सा भएको बताउँदै नेता भट्टले भन्नुभयो – 'त्यहीबाट पनि प्रष्ट हुन्छ भारतले नेपालको हित चाहेको छैन ।'
एमसीसी परियोजना नेपालको हितमा नभएकाले खारेज गर्नुपर्ने बताउँदै संघीयता असफल भइसकेकाले प्रदेश संरचना खारेज गरेर देशलाई अगाडी बढाउनु पर्ने बताउनु भयो।
नेपालीलाई भुटानी शरणार्थी बनाएर अमेरिका पठाउने भ्रष्टाचारीहरुलाई हदैसम्मको कारवाही गर्नुपर्ने बताउँदै सरकारले कारवाही गर्न नसके जनताले सडकबाट कारवाही गरेर देखाउने चेतावनी दिनु भयो।

कार्यक्रममा नेकपा रुपन्देहीका इन्चार्ज शरद वली, नेकपा माओवादी केन्द्रका रुपन्देही अध्यक्ष निर्मल जीसी, नेकपा एमाले रुपन्देहीका सचिवालय सदस्य ऋषिराम पाण्डेय, क्रान्तिकारी कम्युनिष्ट पार्टीका विनोद मरासिनी, एकीकृत समाजवादीका श्रीराम यादवले कम्युनिष्ट एकता आजको आवश्यक्ता रहेको बताउनु भयो ।

समयको माग अनुसार छरिएर रहेको कम्युनिष्ट शक्तिलाई एकीकृत गरेर कम्युनिष्ट आन्दोलनलाई मजवुत बनाउनुको अर्को कुनै विकल्प नभएको उहाँहरुको भनाई थियो।

राष्ट्रिय जनमोर्चा रुपन्देही अध्यक्ष वद्रे आलमको अध्यक्षता र सचिव टानबहादुर केसीको सञ्चालनमा भएको कार्यक्रममा राष्ट्रिय जनमोर्चाकी नेतृ इन्द्रिरा ज्ञवाली, जसपा रुपन्देही अध्यक्ष महेन्द्र यादव, लगायतले बोल्नु भएको थियो जिल्ला सम्मेलनको अवसरमा राष्ट्रिय जनमोर्चाले ७५ वर्ष उमेर नाघेका कम्युनिष्ट नेता पुरुषोत्तम कंडेल र दिलप्रसाद नेपालीलाई सम्मान गरेको छ । दुई दिनसम्म चल्ने सम्मेलनले नयाँ नेतृत्व चयन गर्ने छ ।