काठमाडौं । विसं २०६३ सालदेखि आयोजना हुँदै आएको ढोरपाटन महिला भलिबल डबल लिग च्याम्पियनसिपको १६औँ संस्करण आगामी माघको दोस्रो सातादेखि सुरु हुने भएको छ । आयोजक ढोरपाटन स्पोर्ट्स क्लबले मंगलबार पत्रकार सम्मेलन आयोजना गर्दै महिला भलिबलको बहुप्रतिक्षित प्रतियोगिता माघ १२ देखि २२ गतेसम्म सञ्चालन गर्ने जानकारी दिएको हो । सो प्रतियोगिता नयाँ बसपार्कस्थित ढोरपाटन स्पोर्ट्स क्लबको खेलमैदानमा सञ्चालन हुनेछ । पछिल्लो १५औँ संस्करण विसं २०७६ सालमा आयोजना भएको थियो । तर, कोरोना महामारीलगायत आर्थिक संकट भएपछि क्लबले तीन वर्षसम्म १६औँ संस्करणको आयोजना गर्न सकेन ।
यद्यपि लामो समयको अन्तरालपछि महिला डबल लिग भलिबल पुनः सञ्चालनमा आउने भएको छ । मंगलबार आयोजित पत्रकार सम्मेलनमा क्लबका अध्यक्ष मनवीर छन्त्यालले पनि कोरोना महामारी, आर्थिक संकट र नेपाल भलिबल संघको चुनावका कारण प्रतियोगिता गर्न नसकिएको उल्लेख गर्नुभयो । लामो समयपछि प्रतियोगिता फर्काउन पाउँदा खुसी लागेको उहाँले बताउनुभयो । यस वर्ष हुने प्रतियोगितामा नौ टोली सहभागी हुने सम्भावना रहेको अध्यक्ष छन्त्यालले जानकारी दिनुभयो ।
तयारीका लागि उपत्यकाबाहिरका टोलीलाई ८० हजार, न्यु डायमण्ड क्लबलाई ५० हजार र अन्य क्लबलाई ३० हजार प्रदान गर्ने आयोजकले जनाएको छ । यस प्रतियोगितामा सबैभन्दा सफल सशस्त्र प्रहरी बलको एपिएफ क्लबले सातपटक र पोखराको ज्ञानुबाबा स्कुलले पाँचपटक उपाधि जितेको छ । नेपाल पुलिस क्लब, रिड मोडल कलेजले समान एकपटक जितेको छ । पहिलो संस्करणमा पुरुषहरूको प्रतिस्पर्धा हुँदा त्रिभुवन आर्मीले जितेको थियो । हालसम्म ४३ महिला खेलाडी र तीन दर्शकले पुरस्कारबापत स्कुटर जितेका छन् ।
यसअघिका संस्करणमा एक दर्शकसहित चार खेलाडीलाई स्कुटर प्रदान गर्दै आएको थियो । यसपटक भने प्रतियोगिताको उत्कृष्ट खेलाडीलाई मात्र स्कुटर प्रदान गर्ने आयोजकले जनाएको छ । यसपटक प्रतियोगिताको पुरस्कार राशिमा भने वृद्धि हुँदा विजेताले पाँच लाख एक हजार, उपविजेताले दुई लाख ५० हजार, तेस्रो हुनेले एक लाख २५ हजार, चौथोले ७५ हजार, पाँचौँले ५० हजार र छैटौँ हुनेले २५ हजार रुपैयाँ नगद पुरस्कार पाउनेछन् । विधागत उत्कृष्ट खेलाडीले जनही पाँच हजार रुपैयाँ पाउने आयोजकले जनाएको छ । प्रतियोगिताका लागि ५१ लाख पाँच हजार रुपैयाँ अनुमानित खर्च हुने आयोजकले उल्लेख गरेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच