काठमाडौं । ललितपुर जिल्ला ब्याडमिन्टन संघको आयोजना तथा बालकुमारी रिमिक्स क्लबको सहआयोजनामा दोस्रो ललितपुर मेयर कप राष्ट्रिय ब्याडमिन्टन प्रतियोगिता यही पुस ३ गतेबाट हुने भएको छ । र्याकिंग प्रतियोगितासमेत रहेको प्रतियोगितालाई ललितपुर नगरपालिकाको मुख्य प्रायोजन रहेको छ । प्रतियोगितामा पुरुष एकल, महिला एकल, यू-१७ छात्र तथा छात्रा एकल, नेपाल ब्याडमिन्टन संघको शीर्ष २० बरीयताबाहेकको पुरुष युगल र ४५ वर्षमाथिको भेट्रान्स युगल (खुला) गरी ६ विधामा प्रतिस्पर्धा गराइने आयोजक ललितपुर जिल्ला ब्याडमिन्टन संघका अध्यक्ष गोपाल महर्जनले जानकारी गराउनुभएको छ ।
करिब ३० लाख लागत रहेको प्रतियोगितामा पुरुष एकल र महिला एकलतर्फ विजयी खेलाडीहरूले नगद ४० हजारका साथै मेडल, प्रमाणपत्र र ट्रफी प्राप्त गर्नेछन् । यस्तै, उपविजयी खेलाडीहरूले नगद २० हजारका साथ मेडल, प्रमाणपत्र र ट्रफी प्राप्त गर्नेछन् । यस्तै तेस्रो स्थान प्राप्त गर्ने दुई खेलाडी प्रत्येकले नगद १० हजारका साथ मेडल, प्रमाणपत्र र ट्रफी प्राप्त गर्नेछन् ।
यसैगरी पुरुष युगलतर्फका विजयी जोडीले नगद ४० हजार, उपविजयी जोडीले नगद २० हजार र तेस्रो स्थान प्राप्त गर्ने प्रत्येक जोडीले नगद १० हजारसहित मेडल, प्रमाणपत्र र ट्रफी प्राप्त गर्नेछन् । यू-१७ छात्र-छात्रा तथा भेट्रान्स युगलतर्फका विजयी खेलाडीहरूले नगद २० हजार, उपविजयीले नगद १० हजार र तेस्रो स्थान प्राप्त गर्ने खेलाडीले नगद पाँच हजार मेडल, प्रमाणपत्र र ट्रफी प्राप्त गर्नेछन् ।
नेपाल ब्याडमिन्टन संघको प्राविधिक सहयोगमा हुने प्रतियोगितालाई भव्य र सभ्यरूपमा सञ्चालन गर्नका लागि नेपाल ब्याडमिन्टन संघका पूर्वउपाध्यक्ष धु्रव महर्जनको संयोजकत्वमा प्रतियोगिता मूल समारोह समिति गठन गरिएको छ ।
ललितपुर बालकुमारीस्थित बालकुमारी रिमिक्स क्लबको आफ्नै कोर्टमा पाँच दिनसम्म सञ्चालन हुने प्रतियोगिता विश्व ब्याडमिन्टन महासंघ, एसियन ब्याडमिन्टन महासंघ र नेपाल ब्याडमिन्टन संघको नियमानुसार खेलाइनेछ । प्रतियोगितामा फिदर सटल कर्कको प्रयोग गरिने आयोजकले जनाएका छन् । बरीयता प्रतियोगितासमेत रहेको प्रतियोगितामा नेपाल ब्याडमिन्टन संघसँग आबद्ध जिल्ला, क्लब र अन्य गरी करिब ४०० खेलाडीको सहभागिता रहने आयोजकले जनाएका छन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच