धनगढी । आठौँ संस्करणको लिटल फ्लावर प्रिमियर लिगको उपाधि सत्यवती एकेडेमी, अत्तरियाले जितेको छ । कैलालीको धनगढीस्थित फाप्ला क्रिकेट मैदानमा सम्पन्न फाइनलमा सत्यवती एकेडेमीले धनगढी स्पोर्ट्स क्लबलाई ५ रनले पराजित गरेको हो ।
रोमाञ्चक खेलमा सत्यवतीले दिएको १२७ रनको लक्ष्य पछ्याएको धनगढी स्पोर्ट्सले १९ दशमलब २ ओभरमा सबै विकेट गुमाएर १२१ रन बनायो । धनगढी स्पोर्ट्सको ब्याटिङमा वसन्त कार्कीले ३५, सुनिल धमलाले २८ तथा अमरसिंह रौटेलाले २७ रनको योगदान दिनुभयो ।
लक्ष्य पछ्याउने क्रममा धनगढी स्पोर्ट्सले सुरुवातमा ३६ रन बनाउँदै ५ विकेट गुमायो । छैटौँ विकेटका लागि वसन्त कार्की र भुवन कार्कीले ३३ रनको साझेदारी गर्नुभयो । भुवनको विकेटपछि सातौँ विकेटका लागि वसन्तले अमरसिंह रौटेलासँग ४३ रन जोड्नुभयो । अठारौँ ओभरमा अभिषेक कोइरालाले अमरसिंह रौटेलाको विकेट लिँदै सत्यवतीलाई खेलमा फर्काउनुभयो । लगत्तै अर्को ओभरमा तृतराज दासले वसन्त कार्की र दिपक चन्दको विकेट लिनुभयो ।
जितका लागि अन्तिम ओभरमा १० रन आवश्यक हुँदा धनगढी स्पोर्ट्स क्लबसँग १ विकेट बाँकी रहेको थियो । अन्तिम ओभर बलिङ गर्नुभएका सन्दीप खत्रीले पहिलो बलमा वाइड र दोस्रो बलमा २ रन दिएपछि तेस्रो बलमा विकास आग्रीका रूपमा धनगढी स्पोर्ट्सले अन्तिम विकेट गुमायो । सत्यवतीको बलिङमा प्लेयर अफ द म्याचसमेत घोषित अभिषेक कोइरालाले सर्वाधिक ४ विकेट लिनुभयो जुन क्रममा ४ ओभरमा १५ रन खर्चिनुभयो ।
तृतराज दासले २ तथा फिर्दोश अन्सारी, सन्तोष कार्की र रञ्जित कुमारले १ विकेट लिनुभयो । यसअघि टस जितेर ब्याटिङ गरेको सत्यवती एकेडेमीले २० ओभरमा ६ विकेटको क्षतिमा १२६ रन बनायो । सत्यवतीको ब्याटिङमा पाँचौँ नम्बरमा ब्याटिङ गर्नुभएका सन्दीप रजालीले सर्वाधिक ४१ रन बनाउनुभयो । उहाँले ३६ बलमा ३ चौका र ३ छक्का प्रहार गर्नुभयो । तृतराज दासले १३ बलमा अविजित २७ रन बनाउनुभयो ।
फिर्दोश अन्सारीले २२, सन्तोष कार्की र समिर कार्कीले समान १० रन बनाउनुभयो । पावर प्लेमा ३ विकेट गुमाएको अवस्थाबाट चौथो विकेटका लागि सन्दीप रजाली र फिर्दोश अन्सारीले ६७ रनको साझेदारी गर्दै टिमलाई उकास्नुभयो । आठौँ विकेटका लागि तृतराज र समिर कार्कीले अविजित ३६ रनको साझेदारी गर्नुभयो ।
विजेता सत्यवती एकेडेमीले ट्रफीसहित दुई लाख ५५ हजार र उपविजेता धनगढी स्पोर्ट्स क्लबले एक लाख २८ हजार पुरस्कार पाएका छन् । प्रतियोगिताको उत्कृष्ट खेलाडी तथा उत्कृष्ट बलर धनगढी स्पोर्ट्स क्लबका कप्तानसमेत रहनुभएका भुवन कार्की घोषित हुनुभयो । कार्कीले पाँच खेलमा १२ विकेट लिनुभयो । प्रतियोगिताको उत्कृष्ट ब्याट्सम्यान शुक्लाफाँटा ब्ल्याकबक्सका किरण ठगुन्ना घोषित हुनुभयो । उहाँले तीन खेलमा १३४ रन बनाउनुभयो ।
प्रतियोगिताको उदयीमान खेलाडी कैलाली जिल्ला क्रिकेट क्लबका सुधांशु रावल घोषित हुनुभयो । विजेता खेलाडीहरूलाई समापन कार्यक्रमका प्रमुख अतिथि सुदूरपश्चिम प्रदेशका सामाजिक विकासमन्त्री झपटबहादुर साउदले पुरस्कृत गर्नुभयो । प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ टिमको सहभागिता थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच