पोखरा । स्याङ्जाको कोल्मामा सम्पन्न क्रसकन्ट्री दौडको उपाधि आर्मीका गोपाल तामाङले जित्नुभएको छ । सात सय कोल्मा बहाकोट सम्पर्क मञ्चले आयोजना गरेको चौथो संस्करणको क्रसकन्ट्री दौडमा आर्मीका धावकले बर्चस्व जमाउँदा गोपालले पहिलो स्थान हासिल गर्नुभयो । आर्मीकै सञ्जय श्रेष्ठ र सुशीलकुमार शाही क्रमशः दोस्रो र तेस्रो हुनुभयो ।
निर्धारित २५ किलोमिटरको दूरी गोपालले एक घण्टा ३१ मिनेट ५६ सेकेण्डमा पार गर्नुभएको हो । उहाँले उपाधिसँगै नगद ५० हजार, ट्रफी, मेडल र प्रमाणपत्र प्राप्त गर्नुभएको हो । दोस्रो बन्नुभएका आर्मीका सञ्जयले एक घण्टा ३३ मिनेट ४३ सेकेण्डको समय र तेस्रो बन्नुभएका सुशीलले एक घण्टा ३४ मिनेट दुई सेकेण्डको समय लगाउनुभयो । सञ्जयले ४० हजार र सुशीलले ३० हजार रुपैयाँसहित ट्रफी, मेडल, प्रमाणपत्र प्राप्त गर्नुभयो ।
यस्तै, २१ वर्षमुनिको १० किलोमिटर पुरुष खुला दौडतर्फ तनहुँका सनम गुरुङले ४१ मिनेट १४ सेकेण्डमा पार गर्दै उपाधि हात पार्नुभयो । उपाधिसँगै गुरुङले ३० हजार रुपैयाँसहित ट्रफी, मेडल र प्रमाणपत्र प्राप्त गर्नुभयो । पोखराका तेन्जेन रोका उपविजेता बन्नुभयो । उहाँले २० हजार रुपैयाँ प्राप्त गर्नुभयो । पोखराकै मनोज रोका तेस्रो बन्दै १० हजार रुपैयाँ हात पार्नुभयो ।
महिला पाँच किलोमिटर दौडको उपाधि जुम्लाकी राममाया बुढाले हात पार्नुभयो । निर्धारित दूरी २१ मिनेट १८ सेकेण्डमा पार गर्दै राममायाले उपाधिसहित नगद १५ हजार रुपैयाँ प्राप्त गर्नुभएको हो । दाङकी सुस्मिताकुमारी चौधरी दोस्रो र पोखराकी नितु तामाङ तेस्रो बन्दै क्रमशः १० हजार र पाँच हजार रुपैयाँसहित ट्रफी, मेडल, प्रमाणपत्र प्राप्त गर्नुभयो ।
प्रतियोगिताका विजेतालाई बन्जी नेपाल पोखराले बन्जीको निःशुल्क टिकट उपलब्ध गराएको छ । प्रतियोगितामा ११ वर्षीया एन्जिला जिटी सबैभन्दा कम उमेर र ५८ वर्षीय गोविन्द नेपालीले सबैभन्दा बढी उमेरको धावकका रूपमा सहभागिता जनाउनुभएको छ ।
प्रतियोगिताका विजेताहरूलाई गण्डकी प्रदेशका सामाजिक विकास तथा स्वास्थ्यमन्त्री सुशीला सिंखडा, गण्डकी प्रदेशका पूर्वमन्त्रीहरू दिपक चर्ती मगर, मेखलाल श्रेष्ठ, गण्डकी प्रदेशका पूर्वसांसद मीनप्रसाद गुरुङलगायतले पुरस्कार वितरण गर्नुभएको थियो । कार्यक्रममा सातौँ दक्षिण एसियन कराँते खेलमा कुमिते क्याटगोरीमा स्वर्णपदक विजेता तनहुँ देवघाट-५ की पार्वती गुरुङलाई सम्मान गरिएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच