सुन तस्करी प्रकरण :

काठमाडौं । सुन तस्करी जाँचबुझ आयोगले केन्द्रीय अनुसन्धान ब्युरोकी एआइजी किरण बज्राचार्यसँग सोधपुछ गरेको छ । प्रहरी अतिरिक्त महानिरीक्षक बज्राचार्यलाई सिंहदरबारस्थित कार्यालयमा बोलाएर आयोगका पदाधिकारीहरूले सोधपुछ गरेका हुन् । सुन तस्करी प्रकरणमा मुछिएका एक आरोपी प्रहरी कार्यालयमा पुगेर पनि छुटेको सन्दर्भमा उहाँसँग सोधपुछ गरेको सुन समितिका एक सदस्यले जानकारी दिनुभयो । त्यसक्रममा बज्राचार्यले ‘त्यो विषयमा’ आफूलाई थाहा नभएको जवाफ दिएको समितिका सदस्यले बताउनुभयो । समितिले सुन प्रकरणको अनुसन्धान अधिकृत डिएसपी दुर्गाराज दाहालसँग पनि सोधपुछ गरेको छ । ‘भेपमा लुकाएर तस्करी भएको नौ किलो सुनको सन्दर्भमा रहेर उनीसँग कुरा भएको हो’, समितिका एक सदस्यले भन्नुभयोे, ‘पछिल्लो सुन प्रकरणबारे पनि कुरा भएको छ ।’ तस्करले ६० किलो सुन हङकङबाट र इलेक्ट्रिक चुरोट ‘भेप’मा लुकाएर दुबईबाट सुन काठमाडौंमा ल्याएका हुन् ।

६० किलो सुनबारे अनुसन्धान गरिरहनु भएका एसपी सञ्जयसिंह थापा र भेपबारे अनुसन्धान गरिरहनु भएका डिएसपी दुर्गा दाहालसँग पनि आयोगका पदाधिकारीले सोधपुछ गरेका छन् । तर, अनुसन्धान अधिकृतहरूले अनुसन्धानमा उठेका प्रश्नहरूको जवाफ दिनुभएन । आयोगका एकजना पदाधिकारीले भन्नुभयो, ‘अनुसन्धान अधिकृतहरूले जवाफ नदिएपछि एआइजी बज्राचार्यलाई बोलाएर सोधपुछ गरेका हौँ ।’

ब्रेक प्याडभित्र लुकाएर तस्करी भएको ६० किलो सुनमा जोडिएका जीवन चलाउनेलाई केन्द्रीय अनुसन्धान ब्युरोकी एआइजी किरण बज्राचार्यले उन्मुक्ति दिएको आरोप छ । चलाउनेविरुद्ध डिप्mयुजन नोटिस जारी गर्न अन्तर्राष्ट्रिय प्रहरी संगठन (इन्टरपोल)मा पत्राचार गरिएको छ । तर, अनुसन्धानको बेलामा सिआइबीमा बोलाएर चलाउनेलाई एआइजी बज्राचार्यले थुनामा नराख्न र प्रतिवादी कायम नगर्न निर्देशन दिनुभएको हो । सरकारी वकिल कार्यालयले मुद्दा दायर गर्दा चलाउनेलाई प्रतिवादी कायम गरेको छ । तर, सिआइबीले उहाँलाई प्रतिवादी बनाएको थिएन । आयोगका पदाधिकारीले एआइजी बज्राचार्यसँग त्यसबारे प्रश्न गरेका छन् ।

आयोगका अधिकारीहरूले जिल्ला सरकारी वकिल कार्यालयका तत्कालीन प्रमुख अच्युतमणि न्यौपानेसँग पनि सोधपुछ गरेका छन् । समिति स्रोतका अनुसार, केहीअघि सहसचिव झलकराम अधिकारीको पनि बयान लिइएको छ । सुन तस्करी प्रकरणमा जोडिनुभएका दावा छिरिङसँग भएको संवादको विषयलाई लिएर उहाँसँग सोधपुछ भएको हो । अध्यागमन विभागमा महानिर्देशक रहनुभएका बेला दावासँग उहाँको कुराकानी भएको विवरण सार्वजनिक भएका बेला मन्त्रालयले उहाँको जिम्मेवारी खोसेको थियो ।

सहसचिव अधिकारी हाल सामान्य प्रशासन मन्त्रालयको अतिरिक्त समूहमा कार्यरत हुनुहुन्छ । ६० किलो सुन तस्करीमा संलग्न बेल्जियन नागरिक दावा छिरिङसँग सहसचिव अधिकारीको ‘कनेक्सन’ देखिएको छ । त्रिभुवन अन्तर्राष्ट्रिय विमानस्थलबाट अवैध रूपमा तस्करीको सुन भित्रिएकोबारे छानविन गर्न सरकारले गत असोज १४ गते उच्च अदालतका पूर्व न्यायाधीश डिल्लीराज आचार्यको संयोजकत्वमा चार सदस्यीय आयोग गठन गरेको थियो । तीन महिनाको समय सीमा सकिएपछि फेरि थप भएको अवधिमा आयोगले सुन प्रकरणसँग सम्बन्धित अन्य व्यक्तिहरूसँग बयान लिइरहेको छ । आयोगको सदस्यहरूमा पूर्व-सहसचिवद्वय किशोरजंग कार्की र प्रेमराज जोशी तथा पूर्वप्रहरी अतिरिक्त महानिरीक्षक सहकुल थापा हुनुहुन्छ ।

गत साउन ३ गते राजस्व अनुसन्धान विभागले त्रिभुवन अन्तर्राष्ट्रिय विमानस्थल भन्सार कार्यालयबाट बाहिरिएको साढे ६० किलो सुन बरामद गरेको थियो । उक्त सुन दुई पांग्रे सवारीसाधनको ‘ब्रेक सु’ भित्र हालेर ल्याइएको थियो । यो सुन प्रकरणबारे राजस्व अनुसन्धान विभागले सुरुका करिब १९ दिन अनुसन्धान गरेको थियो । त्यसपछि दलीय सहमति र सरकारको निर्देशनमा सिआइबीले अनुसन्धान गरेर मुद्दा पनि चलाएको छ ।

गोरेसँग पनि लिइयो बयान
सुनको अवैध पैठारी (तस्करी) नियन्त्रणसम्बन्धी जाँचबुझ आयोग, २०८० ले बहुचर्चित साढे ३३ किलो सुन तस्करीका योजनाकार मध्येका एक चूडामणि उप्रेती ‘गोरे’सँग बुधबार बयान लिएको छ । केन्द्रीय कारागार सुन्धाराभित्र कैद सजाय काटिरहेका आरोपी ‘गोरे’सँग आयोगले सिंहदरबारमा बयान लिएको हो । केन्द्रीय कारागारको गोलघरभित्र रहेका गोरेलाई आयोगले सिंहदरबारस्थित गृह मन्त्रालय रहेको पुरानो भवनमा रहेको कार्यालय बोलाएर बयान लिएको एक सदस्यले जानकारी दिनुभयो । गत असोज १४ गते उच्च अदालतका पूर्वन्यायाधीश डिल्लीराम आचार्यको संयोजकत्वमा गठित उक्त आयोगले गोरेसँग लिएको बयानको विस्तृत विवरण खुलाएको छैन ।