काठमाडौं । डिफेन्डिङ च्याम्पियन एमेच्योर सद्भाव आचार्यलाई सात स्ट्रोकको फराकिलो अन्तरमा हराउँदै पूर्व नम्बर एक गल्फर रवि खड्काले सूर्य नेपाल गल्फ टुर २०२३-२४ अन्तर्गतको पाँचौँ प्रतियोगिता, सूर्य नेपाल च्यालेन्जको उपाधि जित्नुभएको छ ।
उहाँले सात वर्षपछि करियरको पहिलो उपाधि जित्नुभएको हो । सन् २०१७ को अप्रिलमा सूर्य नेपाल एनपिजिए म्याच प्ले जितेपछि यो उहाँको पहिलो उपाधि हो । उहाँको यो सूर्य नेपाल टुरको १२औँ उपाधि पनि हो । उपाधिसहित उहाँले नगद एक लाख प्राप्त गर्नुभयो ।
लगातार दुई दिनका लिडर सद्भाव आचार्यले अन्तिम दिन बिहीबार ६-ओभर ७४ को खराब प्रदर्शन गर्दा उपाधि रक्षा गर्ने मौका गुमाउनुभयो । समग्रमा १-अण्डर २७१ को स्कोरमा उहाँले चित्त बुझाउनुभयो । उहाँले एमेच्योरतर्फ उपाधि जित्नुभयो । एमेच्योरतर्फ समग्रमा ७-ओभर २७९ को स्कोरमा टासी छिरिङ दोस्रो हुनुभयो । उहाँले बिहीबार ३-ओभर ७१ मा खेल सक्नुभयो ।
समग्रमा १-ओभर २७३ सहित प्रोतर्फ दिनेश प्रजापती, दीपक मगर र धनबहादुर थापाले संयुक्तरूपमा दोस्रो स्थान बाँड्नुभयो । दिनेशले बिहीबार ४–अण्डर ६४ को उत्कृष्ट स्कोर बनाउँदा दीपकले १-ओभर ६९ र धनले ३-ओभर ७१ को स्कोर खडा गर्नुभयो । उहाँहरूले समान ५१ हजार ६६५ रुपैयाँ नगद पुरस्कार प्राप्त गर्नुभयो ।
पहिलो दिनका लिडर रामे मगरले बिहीबार इभन-पार ६८ खेलेर समग्रमा ४-ओभर २७६ सहित पाँचौँ स्थानमा खेल सक्दै ३६ हजार नगद पुरस्कार हात पार्नुभयो । समग्रमा ५-ओभर २ सय ७७ को नतिजामा भुवन नगरकोटी, सञ्जय लामा, भुवनकुमार रोक्का र जयराम श्रेष्ठले संयुक्तरूपमा छैटौँ स्थान बाँड्नुभयो । दाबेदार भुवनले बिहीबार ८-ओभर ७६ को बिर्सनलायक प्रदर्शन गर्दा तेस्रो स्थानबाट तल झर्दै छैटौँ स्थानमा खेल सक्न बाध्य हुनुभयो ।
यस्तै, ३-ओभर ७१ स्कोर गर्दा भुवनकुमार रोक्का र जयरामले इभन-पार ६८ मा खेल पूरा गर्नुभयो । उहाँहरूले २७ हजार ८ सय ७५ नगद आफ्नो नाममा लेखाउनुभयो । समग्रमा १२-ओभर २८४ को नतिजामा रमेश अधिकारी दशौँ हुनुभयो र २१ हजार प्राप्त ग्रेमा उहाँले बिहीबार ६-ओभर २७४ को स्कोर बनाउनुभयो ।
अन्तिम १८ होलको खेल सुरु हुँदा रवि सद्भावभन्दा ३ स्ट्रोकले पछि हुनुहुन्थ्यो । सद्भावले लय गुमाउँदा रविले सुझबुझपूर्ण प्रदर्शन गर्नुभयो । रविले पहिलो, दोस्रो, चौथो र आठौँ होलमा बर्डी प्रहार गर्नुभयो । तेस्रो र सातौँ होलमा एक-एक सट खेर फाल्नुभयो । फ्रन्ट नाइन २-अण्डर ३२ मा सक्नुभयो । यता ३ स्ट्रोकको अग्रतामा दिनको सुरूवात गर्नुभएका सद्भावले पहिलो होलमा बर्डी प्रहार गरे पनि तेस्रो होलको डबल बोगी र आठौँ होलको बोगीले फ्रन्ट नाइन २-ओभर ३६ मा सक्नुभयो । नौ होलको समाप्तिमा रविले सद्भावलाई एक स्ट्रोकले पछि पार्नुभयो ।
खेलको टर्निङ प्वाइन्ट दशौँ होल बन्यो । सद्भावले टी सट जंगलमा प्रहार गर्नुभयो । दोस्रो सट ओबी खेल्दा यो होलमा ट्रिपल बोगीको सामना गर्न बाध्य हुनुभयो । यता रविले यही होलमा इगल प्रहार गर्दा दशौँ होलको समाप्तिमा सद्भावविरूद्ध ६ स्ट्रोकको अग्रता बनाउनुभयो । यसपछि रविले १७औँ होलमा एक सट खेर फाल्नुभयो भने १८औँ होलको बर्डीले ब्याक नाइन २-अण्डर ३२ मा नै पूरा गर्नुभयो ।
सद्भावले दशौँ होलको ट्रिपल बोगीलगत्तै १२औँ होलमा डबल बोगी र १५औँ होलमा बोगीको सामना गर्नुभयो । १३औँ र १४औँ होलमा एक-एक सट बचाउनुभयो र ब्याक नाइन ४-ओभर ३८ मा सक्नुभयो । दिनेशले फ्रन्ट र ब्याक नाइन दुवै २-अण्डर ३२ मा सक्नुभयो । उहाँले पहिलो, चौथो, आठौँ, दशौँ र १५औँ होलमा बर्डी प्रहार गर्दा सातौँ होलमा एक सट खेर फाल्नुभयो ।
दीपकले पहिलो र सातौँ होलमा एक-एक सट बचाउँदा पाँचौँ र नवौँ होलको बोगीले फ्रन्ट नाइन इभन-पार ३४ मा सक्नुभयो । यसपछि १३औँ होलको बर्डीविरूद्ध १५औँ र १७औँ होलको बोगीले ब्याक नाइन १-ओभर ३५ मा पूरा गर्नुभयो ।
धनले फ्रन्ट नाइन २-ओभर ३६ र ब्याक नाइन १-ओभर ३५ मा पूरा गर्नुभयो । यो क्रममा उहाँले पहिलो, ११औँ, १३औँ र १५औँ होलमा बर्डी प्रहार गरे पनि तेस्रो, आठौँ र नवौँ होलमा बोगी खेप्दा १०औँ र १८औँ होलमा डबल बोगीको सामना गर्नुभयो ।
७२ होलको चारदिने प्रतियोगिताको कुल पाँच लाख ७२ हजार २५० नगद पुरस्कार राशि रहेको थियो । प्रतियोगितामा कुल ३१ प्रोफेसनल र ११ एमेच्योर खेलाडीको सहभागिता रहेको थियो । प्रतियोगिताका विजयी खेलाडीहरूलाई सूर्य नेपाल प्रालिका मार्केटिङ उपाध्यक्ष दीप्रा लहरी, पिजिए नेपालका सल्लाहकार घनश्याम थापा, आरएनजिसीका अध्यक्ष मधुकर याक्थुम्बा, क्याप्टेन मिथुन राई र कोषाध्यक्ष रोशन राईले पुरस्कार वितरण गर्नुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच