बुटवल । रूपन्देहीको तिलोत्तमामा निर्माण भएको एक्स्ट्राटेक ओभल क्रिकेट रंगशालाको उद्घाटन भएको छ । सोमबार लुम्बिनी प्रदेश प्रमुख अमिक शेरचनले उक्त रंगशालाको उद्घाटन गर्नुभएको हो । तिलोत्तमा नगरपालिका-१७ स्थित पूर्व दरखसवामा गत जेठ २९ गते शिलान्यास भएको रंगशालाको पहिलो चरणको कामअन्तर्गत खेल मैदान नौ महिनामै तयार भएको हो ।
गुल्मीबाट तिलोत्तमामा बसाइँ सर्नुभएका र अष्ट्रेलियामा दश वर्ष बिताइसक्नुभएका विनोद कुँवरले अष्ट्रेलियामा ‘एक्स्ट्राटेक ओभल प्रालि’ नामको सूचना प्रविधि (आइटी) सम्बन्धी ट्रेनिङ इन्स्टिच्युट सञ्चालन गर्नुभएको छ । उहाँ आफैं पनि आइटी इञ्जिनियर हुनुहुन्छ ।
कन्सल्टेन्सी व्यवसायसमेत गरिरहनुभएका विनोद कुँवर दम्पतीले अन्तर्राष्ट्रियस्तरको क्रिकेट मैदान बनाउन सुरु गर्नुभएको हो । रंगशालाका अन्य पूर्वाधारहरू पाँच वर्षभित्र पूरा गर्ने लक्ष्य छ । लगानीकर्ता विनोद कुँवरका अनुसार मैदान निर्माण गर्दा मात्र जग्गाबाहेक सात करोड खर्च भएको छ ।
१८ करोडको लागतमा प्याराफिटको काम लगत्तै सुरु हुने उहाँले बताउनुभयो । ‘रंगशालाका सबै पूर्वाधार पाँच वर्षमा पूरा हुनेछन्, हामीले यसलाई चरण-चरणमा बनाउँदै लग्नेछौं,’ कुँवरले भन्नुभयो, ‘पहिलो वर्षमा पाँच हजार दर्शक अट्ने प्याराफिट बन्नेछ, क्रमशः बढाउँदै पाँच वर्षमा २५ हजार क्षमतासहितको रंगशाला पूरा गर्ने योजना छ ।’ उद्घाटनका अवसरमा प्रदेश प्रमुख अमिक शेरचनले तिलोत्तमामा अन्तर्राष्ट्रियस्तरको रंगशाला निर्माणले राष्ट्रिय तथा अन्तर्राष्ट्रियस्तरका प्रतियोगिता आयोजना गर्न, खेलाडी उत्पादन गर्न सहज हुने बताउनुभयो ।
पूर्वअर्थमन्त्री एवं एमाले उपाध्यक्ष विष्णु पौडेलले आर्थिक राजधानीका रूपमा विकास भएको रूपन्देहीमा निजी क्षेत्रबाट निर्माण भएको रंगशालाले लगानीमैत्री वातावरण छ भन्ने पुष्टि गरेको र यसले खेल पर्यटनका माध्यमबाट जिल्लाको आर्थिक समृद्धिमा टेवा पुग्ने धारणा राख्नुभयो ।
पूर्वमन्त्री एवं सांसद छविलाल विश्वकर्मा, पूर्वमन्त्री एवं सांसद गोकर्ण विष्ट, कांग्रेस नेता एवं संघीय सांसद चन्द्र भण्डारी, सांसद वासुदेव घिमिरे, तिलोत्तमाका नगरप्रमुख रामकृष्ण खाँण, नेपाल क्रिकेट संघका उपाध्यक्ष रोशन सिंहलगायतले रंगशाला निर्माणबाट खेलाडी उत्पादनमा सहयोग पुग्ने बताउँदै सफलताको शुभकामना दिनुभएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच