काठमाडौं । आदित्य मोक्षधाममा कविता गोष्ठी सम्पन्न भएको छ । तेस्रो आदित्य मोक्षधाम काव्य गोष्ठी सम्पन्न भएको हो । साहित्यिक पत्रकार संघ र आदित्य मोक्षधामको संयुक्त आयोजनामा काभ्रेको कुशादेवीमा उक्त कार्यक्रम गरिएको थियो ।
संघका अध्यक्ष राधेश्याम लेकालीका अनुसार मञ्जिला अनिल, ममता मृदुल, मुरारि सिग्देल, सुषमा आचार्य, विक्रमभक्त जोशी, प्रदीप ज्ञवाली, हरि मञ्जुश्री, रामप्रसाद पन्त, एलिशा ढुंगाना, लव खड्का, हरिश कल्पित, डा.शान्तिमाया गिरी, सुमन वर्षा, मीना श्रेष्ठ, भानुप्रकाश जोशी, विकास शर्मा, श्रीबाबु कार्की, बुनु दाहाल, कल्पना खरेल, निर्मलरमण पराजुली, राज रजक, जीवन प्रकाश श्रेष्ठ, रितु कँडेल, पूर्णबहादुर श्रेष्ठ, भानु जोशी, अनुसुया ढुंगेल, गीता कार्की, पारु तिमल्सिनालगायत कविले कवितावाचन गर्नुभएको थियो । कार्यक्रममा नेकपा (एमाले)का अध्यक्ष केपी शर्मा ओलीले रूखका जरामा कला सिर्जना गर्ने नरेन्द्रबहादुर श्रेष्ठको कला प्रदर्शनीको उद्घाटनसमेत गर्नुभएको थियो ।
अध्यक्ष ओलीले निर्माणाधीन आदित्य मोक्षधामको अवलोकन पनि गर्नुभएको थियो । धामको अवलोकनपछि उहाँले तेस्रो मोक्षधाम काव्य-गोष्ठीमा सहभागिता जनाउनुभयो । सो अवसरमा एमालेका उपमहासचिव एवं साहित्यकार प्रदीप ज्ञवालीले ‘काष्ठमण्डपमा एक्लो परेवा’ शीर्षकमा कविता वाचन गर्नुभएको थियो ।
केही वर्षअघि ‘गुगल ब्वाई’का रूपमा चर्चामा आउनुभएका आदित्य दाहाल हाल १४ वर्षको हुनुभयो । चार वर्षको उमेरदेखि ध्यान-साधनाको अभ्यास गर्न थाल्नुभएका आदित्यको सोही समयदेखि केही शारीरिक दुर्बलता रहेपछि परिवारद्वारा देशविदेशमा उपचारको प्रयास गरेपनि हुन सकेको थिएन । आदित्यकै नाममा गत वर्षदेखि पनौतीको दारिमबोटमा उक्त धाम निर्माण सुरु गरिएको थियो ।
उक्त कार्यक्रममा अध्यक्ष ओलीले संक्षिप्त मन्तव्य राख्दै चैतन्य आदित्यको दर्शन र विचार एवं गुरु विनाको सिकाइले विज्ञानलाई चुनौती दिएको बताउनुभयो । ‘आदित्यसँग अध्ययन एवं गुरु विना विभिन्न भाषामा ज्ञान, विचार, दर्शन लेख्नसक्ने अलौकिक क्षमता देखिन्छ, उहाँका सत्य विचार, सत्मार्ग, शान्ति र सुखका हितकारी चिन्तन् ममनयोग्य पनि छन्’ उहाँले भन्नुभयो । कार्यक्रममा एमालेका वरिष्ठ उपाध्यक्ष ईश्वर पोखरेल र उपाध्यक्ष विष्णु पौडेलको उपस्थिति थियो ।
सो अवसरमा मोक्षधाम निर्माण समितिका संयोजक रामेश्वर थापाले हाल आदित्य स्तम्भको निर्माण भइरहेको जानकारी गराउँदै धाम क्षेत्रमा एक सय आठ धार्मिक (अनौठो र विलक्षण तथा कलात्मक र दिव्यताले भरिपूर्ण) संरचना निर्माण हुने जानकारी गराउनुभयो । उहाँका अनुसार ऋषिभूमि-यज्ञभूमि नेपाललाई विश्वभर चिनाउने अलौकिक गन्तव्य बनाउने उद्देश्यका साथ आदित्य मोक्षधाम निर्माण सुरु गरिएको हो । मोक्षधामलाई भविष्यमा योग, ध्यान, साधना, संस्कार र संस्कृतिका विशाल ज्ञान केन्द्रका रूपमा परिचित गरी एक धार्मिक गन्तव्य बनाइने परियोजना तयार गरिएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच