दिगो लेखा अभ्यासमा जोड

काठमाडौं । चार्टर्ड एकाउन्टेन्ट्सहरूको नियामक निकाय नेपाल चार्टर्ड एकाउन्टेन्ट संस्था(आइक्यान) को आयोजनामा लेखा व्यवसायीको राष्ट्रिय सम्मेलन बिहीबारदेखि राजधानीमा सुरु भएको छ । सम्मेलन उद्घाटन गर्दै उद्योग, वाणिज्य तथा आपूर्तिमन्त्री दामोदर भण्डारीले आर्थिक विकास र देशको समृद्धिका लागि लेखा व्यवसायीको महत्वपूर्ण भूमिका हुने बताउनुभयो । राम्रो लेखांकन नहुँदा कतिपय क्षेत्र नै बन्द भएको भन्दै लेखा आचारसंहिताको परिपालना अनिवार्य हुने उहाँको भनाइ थियो । मन्त्री भण्डारीले भन्नुभयो, ‘यो पेशामा रहने व्यक्तिले आचारसंहिताको अनुभूति र सिद्धान्तअनुसार अघि बढिरहनुभएको कुरामा म विश्वस्त छु ।’

अर्थतन्त्रमा पछिल्लो समय केही सुधार देखिएको भन्दै स्वदेशी उत्पादनमार्फत् आर्थिक वृद्धि गर्न आवश्यक रहेको उहाँले बताउनुभयो । जसबाट देशभित्रै रोजगारी सिर्जना हुने र त्यसमा मुख्य योगदान लेखा व्यवसायीकै हुने उहाँको भनाइ थियो । मन्त्री भण्डारीले सम्मेलनबाट प्राप्त निष्कर्ष तथा सुझावअनुसारको कारबाही अघि बढाउन प्रधानमन्त्री पुष्पकमल दाहालसँग छलफल गरेर मन्त्रिपरिषद्मा पेश गर्ने प्रतिबद्धतासमेत व्यक्त गर्नुभयो ।

सम्मेलनका प्रमुख वक्ता इन्टरनेसनल फेडेरेसन अफ एकाउन्टेन्ट्सकी अध्यक्ष आस्मा रेस्मौकीले दिगो लेखा अभ्यासका लागि सार्वजनिक चासोका मुद्दा अघि बढाउन आवश्यक रहेको बताउनुभयो । लेखा अभ्यास र व्यावसायिक लेखाको क्षेत्रमा धेरै अवसर रहेकाले त्यसलाई प्राप्त गर्न द्रुतगतिमा अघि बढ्नुपर्ने उहाँको सुझाव थियो ।

पछिल्लो समय सबै क्षेत्रले दिगो विकास अवधारणा अंगीकार गरेकाले लेखा व्यवसायलाई पनि सोहीअनुसार अघि बढाउनुपर्ने उहाँले बताउनुभयो । जसका लागि आचारसंहिता पालना गर्दै अघि बढ्न रेस्मौकीले आग्रह गर्नुभयो । उहाँले भन्नुभयो, ‘समय परिवर्तनशील छ । तर, लेखा अभ्यासको आफ्नै महत्व रहनुका साथै नयाँ प्रतिस्पर्धा, विचार, परिवर्तन हुनुपर्ने नयाँ कुरामा ध्यान दिन आवश्यक छ ।’
उहाँले लेखा व्यवसायमा नयाँ पुस्ता ल्याउन आइक्यान र विभिन्न शैक्षिक संस्थाबीच सहकार्यमा जोड दिँदै भन्नुभयो, ‘यो पेशा चाहनाअन्तर्गतको मात्र नभई मुलुककै अर्थतन्त्र सुधार गर्ने मुख्य आधार हो ।’

नेपाल राष्ट्र बैंकका गभर्नर महाप्रसाद अधिकारीले सिएले मुलुकको अर्थतन्त्रमा महत्वपूर्ण भूमिका खेल्दै आएको बताउनुभयो । मुलुकको दिगो विकासका लागि लेखा व्यवसायीको महत्वपूर्ण भूमिका हुने भएकाले सम्मेलनले यसलाई थप उजागर गर्ने उहाँको भनाइ थियो । गभर्नर अधिकारीले भन्नुभयो, ‘आइएमएफले यस वर्ष नेपालले ३.२ प्रतिशतको आर्थिक वृद्धिदर हासिल गर्ने प्रतिवेदन सार्वजनिक गरेको छ । मुलुकको अर्थतन्त्र पनि सुधार हुँदै जाने देखिएको छ । अहिलेको यस्तो अवस्थामा पनि पारदर्शितासहित यो पेशा अघि बढिरहेको अवस्था छ ।’

उहाँले आइक्यानसँगको सहकार्यमार्फत् राष्ट्र बैंकले राम्रो लाभ लिइरहेको पनि बताउनुभयो । हालै प्रचलनमा आएको नेपाल फाइनान्सियल रिपोर्टिङ स्ट्याण्डर्ड (एनएफआरएस) प्रभावकारीरूपमा कार्यान्वयन भइरहेको उहाँले जानकारी गराउनुभयो ।

कार्यक्रमको आयोजक आइक्यानका अध्यक्ष सुजनकुमार काफ्लेले तेस्रो सम्मेलनले विश्वभर हुँदै आएको लेखा अभ्यासको अध्ययन, प्रवद्र्धन तथा विस्तारमा सहयोग पुग्ने बताउनुभयो । सम्मेलनको पहिलो दिन दिगो लेखा अभ्यासमा केन्द्रित हुने र दोस्रो दिन सार्वजनिक लेखापरीक्षणको समसामयिक भूमिकाबारे छलफल हुने उहाँले जानकारी दिनुभयो । सम्मेलनले वर्तमान अवस्थामा लेखा व्यवसायको क्षेत्रमा देखिएको चुनौती र त्यसको दिगो समाधानका लागि हुनुपर्ने प्रयास सम्बन्धमा नयाँ दिशा दिने उहाँको भनाइ थियो ।

नेपाल अडिटर एसोसिएसन (अडान) का वरिष्ठ उपाध्यक्ष बद्रीप्रसाद भट्टराईले दिगो लेखा अभ्यास केन्द्रित सम्मेलनले आगामी दिनमा मुलुकमा सुशासन र आर्थिक वृद्धिमा टेवा पुग्ने बताउनुभयो । सो अवसरमा उहाँले अडानमा आबद्ध आठ हजारभन्दा सदस्यमार्फत् पारदर्शीरूपमा विभिन्न निकायको वित्तीय विवरण प्रस्तुत गर्ने काम भइरहेको जानकारी गराउनुभयो ।

चार्टर्ड एकाउन्टेन्ट संघ (एक्यान) का अध्यक्ष दिपक पाण्डेले अहिले देशभर तीन हजार दुर्ई सय चार्टर्ड एकाउन्टेन्टले सक्रियरूपमा काम गरिरहेको र पारिश्रमिकमा समेत प्रतिस्पर्धा आएको बताउनुभयो । डिजिटल अर्थतन्त्र विस्तार हुँदै जाने क्रममा सोहीअनुसार सीप र दक्षता विस्तार हुन नसके पेशागत चुनौती पनि देखा पर्न सक्ने उहाँको भनाइ थियो ।

सिएको समकक्षता सन्दर्भमा देखिएको अन्योल अन्त्य हुनुपर्नेमा जोड दिँदै उहाँले भन्नुभयो, ‘१२ कक्षा पढेपछि पाँच वर्ष चार्टर्ड अकाउन्टेन्ट पढ्दा पनि स्नातक÷स्नातकोत्तर सरहको मान्यता निश्चित छैन, भारतमा आइआइएम, आइआरडी जस्ता संस्थाले सिएलाई पोस्ट ग्राजुएटको मान्यता दिइसकेको छ । हाम्रोमा भने मुद्दा लड्दालड्दै पनि कुनै टुंगो लागेको छैन ।’

आइक्यान उपाध्यक्ष प्रवीणकुमार झाले सम्मेलन अवधिभर लेखा अभ्यास, लेखा व्यवसायीको जिम्मेवारी, दिगो व्यापार रणनीति, नियमन संयोजनलगायत विषयमा छलफल हुने बताउनुभयो ।

सो अवसरमा आइक्यानले आफ्नो आधिकारिक गीत पनि सार्वजनिक गरेको थियो । शुक्रबारसम्म चल्ने सम्मेलनमा देशभरबाट करिब एक हजार लेखा व्यवसायीको सहभागिता रहेको आयोजकले जनाएको छ ।