काठमाडौं । ताप्लेजुङमा निर्माण हुने दुई सय ८५ मेगावाटको माथिल्लो तमोर अर्धजलाशययुक्त जलविद्युत् आयोजनामा एभरेष्ट बैंकको नेतृत्वमा आठवटा बैंक तथा संस्थाले ३८ अर्ब ६० करोड ऋण लगानी गर्ने भएका छन् । बिहीबार राजधानीमा आयोजित एक कार्यक्रमबीच एभरेष्ट बैंक र प्रवद्र्धक कम्पनी तमोर इनर्जी प्रालीबीच ऋण सम्झौता भएको हो । सम्झौतापत्रमा एभरेष्ट बैंकका प्रमुख कार्यकारी अधिकृत सुदेश खालिङ र कम्पनीका अध्यक्ष पुष्पज्योति ढुंगानाले हस्ताक्षर गर्नुभएको थियो ।
दुर्ई सय ८५ मेगावाटको तमोरमा एभरेष्ट बैंकको नेतृत्वमा आठवटा बैंक तथा संस्थाले ३८ अर्ब ६० करोड ऋण लगानी गर्ने भएका हुन् ।
ताप्लेजुङको फक्तालुङ गाउँपालिका र फुङलिङ नगरपालिकामा बन्ने परियोजनाको लागत अनुमान ५५ अर्ब १५ करोड रहेको छ, जसमा ७० प्रतिशत अर्थात् ३८ अर्ब ६० करोड रकम ऋणमार्फत् जुटाइएको हो । एचआइडिसिएल र कृषि विकास बैंक को-लिड रहेका छन् । राष्ट्रिय वाणिज्य बैंक, प्रभु बैंक, लक्ष्मी सनराइज बैंक, नेपाल एसबिआई बैंक र गरिमा विकास बैंकले परियोजनामा ऋण लगानी गर्नेछन् । बाँकी १६ अर्ब ५५ करोड भने कम्पनीले स्वपुँजीका रूपमा लगानी गर्नेछ । स्वपुँजीका लागि आइपिओसमेत निष्कासन गर्ने कम्पनीको तयारी छ । हस्ताक्षर कार्यक्रममा सभामुख देवराज घिमिरे, भौतिक पूर्वाधार तथा यातायातमन्त्री रघुवीर महासेठ, परराष्ट्रमन्त्री नारायणकाजी श्रेष्ठ, ताप्लेजुङबाट प्रतिनिधित्व गर्ने सांसद् योगेश भट्टराईसहित बैंक तथा वित्तीय संस्था, बिमा कम्पनी, जलविद्युत् कम्पनी, सरकारी निकायका प्रतिनिधि तथा स्थानीय तहका जनप्रतिनिधिहरूको उपस्थिति रहेको थियो ।
तमोर इनर्जीका अध्यक्ष ढुंगानाले निजी क्षेत्रबाट यतिका ठूलो परियोजना निर्माणमा प्रवेश गर्नु ठूलो उपलब्धि भएको भन्दै २०८५ जेठभित्र परियोजना तयार हुने बताउनुभएको छ । एभरेष्ट बैंकका प्रमुख कार्यकारी अधिकृत खालिङले पनि परियोजना समयमा सम्पन्न हुनुपर्नेमा जोड दिँदै सम्झौताले अन्य ठूला परियोजनामा लगानी गर्न बैंक तथा वित्तीय संस्थालाई हौसला मिल्ने बताउनुभयो । हाल नेपालमा निजी क्षेत्रले सञ्चालनमा ल्याएको सबैभन्दा ठूलो परियोजना ८६ मेगावाटको सोलुखोला (दूधकोशी) हो ।
ताप्लेजुङमा रहेको तमोर नदीमा अर्धजलाशयुक्त परियोजनाको हेडवक्र्स, आठ लाख घनमिटर पानी सञ्चित गर्ने क्षमताको हेड पोन्ड, करिब ८.७ किलोमिटर लामो भूमिगत हेडरेस टनेल र भूमिगत पावरहाउस फक्तालुङ गाउँपालिकामा हुनेछ । परियोजनामा ९१ मिटर लामो र २२ मिटर अग्लो बाँध हुनेछ भने टेलरेस फुङलिङ नगरपालिकामा रहनेछन् । आयोजनाबाट वार्षिक १६ सय ५५ गिगावाट आवर विद्युत् उत्पादन हुनेछ । जसमध्ये सुक्खायाममा चार सय ४६ गिगावाट आवर विद्युत् उत्पादन हुनेछ । उत्पादित विद्युत् करिब १५ किलोमिटर लामो २२० केभीको डबल सर्किट प्रसारणलाइनमार्फत् ढुंगेसाँघु सबस्टेसनमा जोडिने कम्पनीले जनाएको छ । आयोजना सञ्चालनमा आएको पहिलो वर्ष १० अर्ब १२ करोड आम्दानी हुने र पिपिए दरमा हुने वृद्धिका कारण नौ वर्षपछि वार्षिक १२ अर्ब ५५ करोड आम्दानी हुने कम्पनीको दाबी छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच