खाद्यले बेच्यो दुई दिनमै तीन सय बढी खसीबोका

काठमाडौं । खाद्य व्यवस्था तथा व्यापार कम्पनीले कम्पनीले आइतबारदेखि दशैँ लक्षित खसीबोका र च्यांग्रा बेच्न सुरु गरेको छ । कम्पनीले ल्याएका खसीबोका च्यांग्रामा उपभोक्ताको आकर्षण देखिएको छ । दुई दिनमै खसीबोका र च्यांग्रा गरी ३१८ वटा बिक्री भएका छन् । सोमबारसम्म कम्पनीको प्रादेशिक कार्यालय थापाथलीबाट उक्त संख्यामा खसीबोका र च्यांग्रा बिक्री भएका हुन् । सोमबार साँझसम्म खसी २४५, बोका २० र च्यांग्रा ५३ गरी कुल ३१८ वटा बिक्री भएको प्रादेशिक कार्यालय थापाथलीका प्रमुख भीमबहादुर थापाले हिमालय टाइम्सलाई बताउनुभयो । उहाँका अनुसार हालसम्म ९९४ वटा खसीबोका र २८५ च्यांग्रा भित्रिसकेका छन् ।

‘सोमबारसम्म राजधानी भित्रिएका खसीबोका च्यांग्रालगायत स्वस्थकर नै रहेको पाइएको छ । परीक्षणका क्रममा स्वास्थ्यमा त्यस्तो कुनै समस्या भेटिएको छैन ।’

खसीबोका च्यांग्रा नवमीका दिनसम्म बिक्री हुनेछन् । कम्पनीले काठमाडौं उपत्यकालाई लक्षित गरी मुस्ताङबाट च्यांग्रा र मकवानपुर, दाङ लगायतबाट खसीबोका ल्याएको हो । आइतबारसम्म तीनसय च्यांग्रा र २०८ खसीबोका ल्याएको थियो । जिउँदो खसी बोकाको मूल्य प्रतिकेजी ६७० र जिउँदो च्यांग्रा प्रतिकेजी एक हजार २३० रुपैयाँ तोेकिएको छ । उक्त मूल्यमा प्रतिकेजी १० रुपैयाँ छुट हुनेछ । कम्पनीकी सूचना अधिकारी शर्मिला न्यौपानेका अनुसार यसपटक दशैँका लागि एक हजार पाँचसय खसीबोका र तीनवटा च्यांग्रा ल्याउने तयारी छ ।

विगतमा घटस्थापनादेखि खसीबोका बिक्री गर्ने गरिएकोमा यसपटक बाढी-पहिरोका कारण राजमार्ग अवरुद्ध हुँदा खसीबोका ल्याउन ढिलाइ भएकाले आइतबारदेखि बिक्री थालिएको कम्पनीले जनाएको छ । खाद्य कम्पनीबाहेक निजीस्तरमा व्यवसायीले पनि खसीबोका च्यांग्रा ल्याउने गरेका छन् । उनीहरूले पश्चिम तराई र आसपासका सल्यान, सुर्खेत, रुकुम, रोल्पा, गुल्मी, अर्घाखाँचीबाट खसीबोका ल्याउने गरेका छन् । चौपाया खरिद बिक्री संघका अध्यक्ष सन्तोषबहादुर खत्रीका अनुसार बाढी पहिरोका कारण बाटो अवरुद्ध हुँदा खोटाङ, ओखलढुंगा, रामेछाप, सिन्धुली, उदयपुर र काभ्रेबाट खसीबोका ल्याउन समस्या भएको छ । हरेक वर्ष दशैैँमा काठमाडौं उपत्यकामा ४५ हजार हराहारीमा खसीबोका ल्याउने गरिएको छ भने मनाङ र मुस्ताङबाट भेडाच्यांग्रा ल्याउने गरिएको छ ।

खत्रीका अनुसार काठमाडौं उपत्यकामा हाल तराईका खसी जिउँदो प्रतिकेजी ७२० देखि ७५५ रुपैयाँ, पहाडे खसी ६७० देखि ७०५ रुपैयाँ, बोका ६७० देखि ७२० रुपैयाँसम्म र च्यांग्रा प्रतिकेजी एक हजार तीन सय रुपैयाँमा बिक्री भइरहेका छन् । काठमाडौं चौपाया खरिद–बिक्री वधशालाका अध्यक्ष जनक खड्काका अनुसार दैनिक २५ ट्रकसम्म खसीबोका राजधानी भित्रिने गरेका छन् । कलंंकी बजारमा जिउँदो खसी–बोकाको मूल्य तौलअनुसार ६५० देखि सात सय रुपैयाँ केजीसम्म निर्धारण गरिएको छ ।

राजधानी भित्रिएका खसीबोका र च्यांग्रामा समस्या देखिएन : महाशाखा
यसैबीच पशु सेवा विभागले उपभोक्ताको स्वास्थ्यलाई दृष्टिगत गर्दै खसीबोका बिक्री भइरहेका ठाउँमा पशु चिकित्सकको टोली खटाएर अनुगमन एवं परीक्षण गरिरहेको छ । विभागले स्वस्थ खसी बोकाको सिङमा हरियो र बिरामीलाई रातो रङ लगाइएको बताउँदै स्वस्थ चौपाया खरिद गर्न आग्रह गरेको छ । तथापि हालसम्म राजधानी भित्रिएका खसीबोका च्यांग्राको स्वास्थ्यमा कुनै समस्या नरहेको पशु क्वारेन्टाइन महाशाखाले जनाएको छ । महाशाखा प्रमुख तथा वरिष्ठ पशु चिकित्सक डा. राजेश यादवले हिमालय टाइम्ससँग भन्नुभयो, ‘सोमबारसम्म राजधानीमा भित्रिएका खसीबोका च्यांग्रालगायत स्वस्थकर नै रहेको पाइएको छ । परीक्षणका क्रममा स्वास्थ्यमा त्यस्तो कुनै समस्या भेटिएको छैन । त्यसैगरी, पशु सेवा विभागबाट भक्तपुरको लोकन्थली क्षेत्रमा खटिनुभएका वरिष्ठ पशु विकास अधिकृत सीताराम ओलीले पनि हालसम्म खसीबोका च्यांग्रा स्वस्थकर नै रहेको पाइएको बताउनुभएको छ । उहाँले हिमालय टाइम्ससँग भन्नुभयो, ‘भक्तपुरको लोकन्थली क्षेत्रमा दशैँमा मात्र नभई वर्र्षैभरि खसीबोका खरिद बिक्री हुन्छ । त्यहाँ ठूलो परिमाणमा खसी बोकाको कारोबार हुने गरेको छ । केही दिनदेखि म सोही बिक्री केन्द्रको अनुगमनमा छु, अहिलेसम्म त्यस्तो स्वास्थ्य समस्या भेटिएको छैन ।’