काठमाडौं । आइसिसी विश्वकप लिग-२ अन्तर्गत त्रिकोणात्मक ओडिआई सिरिजमा नेपालले दोस्रो जित दर्ता गरेको छ । अमेरिकामा जारी त्रिकोणात्मक सिरिजअन्तर्गत बुधबार बिहान सम्पन्न खेलमा नेपालले स्कटल्याण्डलाई ५ विकेटले पराजित गर्दै लिग २ मा दोस्रो जित दर्ता गरेको हो । यसअघि नेपालले खेलेका नौमध्ये एकमात्रै जित गत फेब्रुअरी १७ मा नेदरल्याण्ड्सविरुद्ध टियु क्रिकेट मैदानमा निकालेको थियो । त्यसयता लगातार जितविहीन रहेको नेपालले पहिलो जित निकालेको हो । जारी सिरिजमा नेपालले पहिलो जित दर्ता गर्दा स्कटल्याण्डले भने पहिलो हार बेहोरेको छ ।
स्कटल्याण्डले दिएको १५५ रनको मध्यम लक्ष्य नेपालले २९.५ ओभरमा ५ विकेटको क्षतिमा भेट्टायो । नेपाललाई जिताउन आरिफ शेख ५१ र गुल्सन झा २५ रनमा अविजित रहनुभयो । आरिफले ४२ बलमा ८ चौका प्रहार गर्दा गुल्सनले ३० बलमा ३ चौका र १ छक्का हान्नुभयो । छैटौँ विकेटका लागि आरिफ र गुल्सनले ५७ रनको अविजित साझेदारी गर्नुभएको थियो ।
नेपाल एक समय २१.३ ओभरमा ५-१०० को अवस्थामा थियो । ओपनर अनिल शाह १३ र आशिफ शेख २१ रनमा पेभेलियन फर्किनुभयो । कुशल भुर्तेलले २५ र कुशल मल्लले ७ रन बनाउनुभयो । कप्तान रोहित पौडेल १ रनमा क्याच आउट हुनुभयो । स्कटल्याण्डका लागि ब्रान्डोनले २ तथा ब्राड कुरी, मार्क वाट र ज्याकले समान एक विकेट लिनुभयो ।
त्यसअघि अमेरिकाको डालासस्थित ग्राण्ड प्रेरी क्रिकेट स्टेडियममा नेपालले टस जितेर फिल्डिङ रोजेपछि ब्याटिङमा उत्रिएको स्कटल्याण्ड ४१.४ ओभरमा १५४ रनमा अलआउट भएको थियो । स्कटल्याण्डका लागि मार्क वाटले सर्वाधिक ३४ रन बनाउनुभयो । अन्य ब्याटरले उल्लेखनीय रन बनाउन सकेनन् ।
स्कटल्याण्डलाई सस्तैमा रोक्न नेपालका लागि सन्दीप लामिछानेले तीन विकेट लिनुभयो । करण केसी, सोमपाल कामी र गुल्सन झाले समान दुई विकेट लिनुभयो । आरिफ शेखले एक विकेट लिनुभयो । नेपालका आरिफ शेख प्लेयर अफ द म्याच घोषित हुनुभयो । ब्याटिङ, बलिङ र फिल्डिङ तीनै क्षेत्रबाट राम्रो प्रदर्शन गर्नुभएका आरिफ प्लेयर अफ द म्याच घोषित हुनुभएको हो । ओडिआई करियरमा उहाँको यो दोस्रो प्लेयर अफ द म्याच अवार्ड हो । यसअघि सन् २०२२ मा पपुवा न्युगिनीविरुद्ध उहाँले पहिलो प्लेयर अफ द म्याच अवार्ड जित्नुभएको थियो ।
सिरिजको पहिलो खेलमा नेपाल घरेलु टोली अमेरिकासँग तीन विकेटले पराजित भएको थियो । स्कटल्याण्डले भने सिरिजको आफ्नो पहिलो खेलमा अमेरिकामाथि १० विकेटको फराकिलो जित निकालेको थियो ।
जितसँगै नेपालले अंक तालिकामा पाँच अंक पुर्याएको छ । लिग २ मा १० खेल खेलेको नेपालले २ खेलमा जित र सात खेलमा हार भोगेको छ । नेपालले क्यानडामा ओमानसँगको एक खेल रद्द हुँदा अंक बाँडेको थियो । सिरिजको तेस्रो खेलमा नेपालले शनिबार अमेरिका र सोमबार स्कटल्याण्डसँग खेल्ने तालिका छ । क्यानडा १२ खेलमा १६ अंकका साथ शीर्ष स्थानमा छ । आठ टोली सहभागी लिग २ मा शीर्ष चार टोलीले २०२७ को एकदिवसीय विश्वकप छनोट सोझै खेल्न पाउनेछन् ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच