अक्षयकोषका लागि एक महिनामा रु ६६ लाखभन्दा बढी संकलन

ध्रुवसागर शर्मा म्याग्दी, संवाददाता

२ मङ्सिर २०८१, आइतबार २०:३५

Read Time = 5 mins

गण्डकी प्रदेश

A A- A+

म्याग्दी । पश्चिम म्याग्दीको बिममा संचालित किसानी कृषि प्राविधिक शिक्षालयले स्थापना गरेको किसानी सञ्जीवनी अक्षयकोषमा ६३ लाखभन्दा बढी आर्थिक संकलन भएको छ ।

मालिका गाउँपालिका वडा नं ७ मा २०६८ सालबाट संचालित प्राविधिक शिक्षालयमा अक्षय कोषको घोषणा भएको एक महिनाको अवधिमा उक्त रकम संकलन भएको हो ।

तिहारमा गाउँमा खेलिएको देउसीभैलोबाट रु ३३ लाख ९२ हजार र विदेशमा रहेका बिमाली (बिमवासी) लगाएतबाट रु ३२ लाख ५० हजार गरी रु ६६ लाख ४२ हजार संकलन भएको विद्यालयका प्रधानाध्यापक जंगबहादुर गर्बुजाले जानकारी दिनुभयो ।
“दैनिकजसो स्वतस्फूर्त रुपमा सहयोग आइरहेको छ, संसारभरी रहेका बिमबासीबाट पनि सहयोग जुटाइरहेका छौ” प्रधानाध्यापक गर्बुजाले भन्नुभयो ।
अक्षयकोषका लागि विदेशमा रहेका बिमबासीले अभियान नै सञ्चालन गरेपछि छोटो समयमा अपेक्षा गरे अनु्सार आर्थिक संकलन भएको उहाँले बताउनुभयो ।
“यो सक्रियता विमबासीको एकताको नमुना पनि हो,आफ्नो गाउँको प्राविधिक शिक्षालयमा स्थापना हुने अक्षयकोषका लागि मन खोलेर सहयोग भइरहेको छ” प्राचार्य गर्बुजाले भन्नुभयो ।

अक्षयकोष स्थापनाका लागि गाउँमा खेलिएको देउसीभैलोमा करिव ३४ लाखको हाराहारीमा संकलन भएको थियो । देशका विभिन्न जिल्लाबाट कृषि र भेटेरनरी शिक्षा लिनका लागि यहाँ आउनुहुनेगरिब,विपन्न र जेहेनदार विद्यार्थीहरुको सहयोगका लागि दुई करोडको किसानी सञ्जीवनी अक्षयकोष स्थापनाको अभियान सञ्चालन भइरहेको छ । यो अभियानमा आफ्नो क्षमता अनुसार सहयोग गर्न समेत विद्यालयले अपिल गरेको छ ।

व्यावसायिक कृषितर्फ उन्मुख क्षेत्रमा बाली विज्ञान, पशु चिकित्सा (भेटेरिनरी) विषयमा पढाइ हुने यस शिक्षालयमा विद्यार्थीको आकर्षण पनि बढेको छ । बिममा २०६८ सालमा सिटिइभिटीबाट सम्बन्धन प्राप्त गरी २९ महिने जेटिए, २०७२ सालदेखि तीनवर्षे डिप्लोमा इन एग्रिकल्चर (बाली विज्ञान) र तीनवर्षे पशुविज्ञान तहको पठनपाठन सुरु भएको थियो । अहिले यहाँ २१ जिल्लाका विद्यार्थी अध्ययनरत रहेका छन् ।
कृषि विषयको प्राविधिक शिक्षा सामुदायिक विद्यालयमै पठनपाठन हुन थालेपछि विद्यार्थी अध्ययनसँगै खेतीको अभ्यासमा पनि लाग्न थालेका छन् । देशका विभिन्न जिल्लामा सञ्चालन खर्च समेत जुटाउन नसकिरहेको कृषि प्राविधिक शिक्षालयका बिच पश्चिम म्याग्दीमा रहेका किसानी कृषि प्राविधिक शिक्षालयमा भने देशभरबाट पढ्न आउने र रोजगारीका लागि समेत धमाधम सिफारिस भइरहेका छन् ।

कृषि पढ्ने विद्यार्थीलाई उत्पादन र आम्दानीसँग जोड्ने उद्देश्यले किसानका खेतबारीमा नै पुगेर प्रयोगात्मक अभ्यास गराउनाका साथै फलफूल खेती, तरकारी खेती, दलहन बाली र रैथाने जातका कृषि उपजहरु उत्पादन गरी बजारमा लगेर बिक्री समेत गर्ने गरिएको छ।
कृषि प्राविधिक शिक्षालयको स्थापना भएपछि बिम गाउँ समेत नेपालभित्र चर्चामा छ । यहाँ विद्यार्थी र शिक्षकहरुकै प्रयासमा उत्पादन भएको बस्तु बिक्री गरी विद्यार्थीले आफ्नो खर्च चलाउने गरेका छन् ।

सरोकार

यो खबर पढेर तपाईलाई कस्तो महसुस भयो ?