मालारानीमा समृद्धिको आधार निर्माण गर्दै भट्टराई

अर्घाखाँची । अर्घाखाँचीको मालारानी गाउँपालिकाले विभिन्न पूर्वाधार विकास, कृषि प्रवद्र्धन, स्वास्थ्य सुधार र प्रविधिमैत्री सेवा प्रवाहलाई मुख्य प्राथमिकता दिएको छ । गाउँपालिकाका प्रमुख प्रशासकीय अधिकृत गोविन्द भट्टराईका अनुसार योजनाबद्ध विकास निर्माणमार्फत् समृद्ध मालारानी गाउँपालिका निर्माण गर्ने लक्ष्य लिइएको छ । मालारानी गाउँपालिकाले कृषि तथा पशु उद्यमशीलता परियोजना सञ्चालन गरी कृषि र पशुपालनलाई व्यावसायिक र आधुनिक बनाउन प्रोत्साहन गर्दै आएको छ । ‘हाम्रो मुख्य उद्देश्य स्थानीय कृषकहरूको उत्पादन क्षमता र आम्दानी वृद्धि गर्नु हो । यसका लागि हामीले कृषकलाई अनुदान र सहजीकरण प्रदान गर्दै आएका छौँ,’ प्रमुख प्रशासकीय अधिकृत भट्टराईले भन्नुभयो ।

सडक तथा भवन निर्माण र खानेपानी तथा सिँचाइ क्षेत्रमा पालिकाले प्राथमिकताका साथ लगानी गरेको भट्टराईको भनाइ छ । पालिकाभित्रका मुख्य सडकहरूमध्ये केही सडक कालोपत्रे भइसकेका र केही हुने क्रममा रहेका छन् भने सहायक सडकहरूको स्तरोन्नति कार्य भइरहेको छ । सडकको अवस्था सुधार हुँदा नागरिकको दैनिकी सहज बन्दै गएको भट्टराईको कथन छ । ‘आगामी दिनमा अझै सडक नेटवर्कलाई मजबुत बनाउने योजना राखेका छौँ,’ उहाँले बताउनुभयो । ग्रामीण नागरिक आवास सुरक्षामा पनि गाउँपालिकाले महत्वपूर्ण पहल गरेको छ । ढुंगाको छाना विस्थापन गरी जस्तापाता वितरण गरिनु यो अभियानको मुख्य अंश हो । सुरक्षित र भयरहित जीवनयापनका लागि यो अभियान सुरु गरिएको भट्टराईले बताउनुभयो ।

गाउँपालिकाले आधारभूत स्वास्थ्य सेवा र सुरक्षित खानेपानी आपूर्ति विस्तार गर्न विशेष ध्यान दिएको छ । सिँचाइको विस्तार गर्दै कृषकलाई समयमै पानीको आपूर्ति गर्ने कार्यक्रम अगाडि बढाइएको छ । ‘स्वच्छ खानेपानी र भरपर्दो सिँचाइ सुविधाका माध्यमबाट नागरिकको आधारभूत आवश्यकता पूरा गर्नुका साथै आर्थिक उपार्जनमा टेवा पुर्‍याउने हाम्रो लक्ष्य हो,’ उहाँले भन्नुभयो ।

अर्को महत्वपूर्ण क्षेत्र कोल्डस्टोर निर्माण हो जसले कृषिजन्य उत्पादनको भण्डारण र बजारीकरणमा मद्दत पुर्‍याउनेछ । ‘कोल्डस्टोरका माध्यमबाट कृषकहरूले आफ्नो उत्पादनको सही मूल्य पाउनेछन् र बजारको अनिश्चिततालाई कम गर्न सकिन्छ,’ भट्टराईले थप जानकारी दिनुभयो । गाउँपालिकाले प्रशासनिक कामकाजलाई पनि प्रविधिमैत्री बनाउँदै लगेको छ । केन्द्रीकृत इ-हाजिरी प्रणाली पूर्णरूपमा लागू गरी ढड्डा विस्थापन गरिएको छ । ‘अब पुरानै ढड्डा प्रणाली हटाएर सम्पूर्ण हाजिरी डिजिटल बनाइएको छ । यसले कर्मचारीको उपस्थिति व्यवस्थापनलाई प्रभावकारी बनाएको कुशल प्रशासकीय अधिकृत भट्टराईले बताउनुभयो ।

वित्तीय स्रोतको अभावका बाबजुद गाउँपालिकाले विकास निर्माणका कामलाई तीव्रता दिएको छ । ‘हालसम्म राजस्वका लागि हामी मुख्यतः रोयल्टी, दस्तुर, सेवा शुल्क र जरिवानामा निर्भर रहनुपर्ने अवस्था छ । आगामी दिनमा भरपर्दो आर्थिक स्रोतको सुनिश्चितता गर्नका लागि वैकल्पिक उपायहरूको अध्ययन भइरहेको छ,’ उहाँले भन्नुभयो ।

सेवा प्रवाहलाई प्रविधिमैत्री बनाउने र पारदर्शिता तथा जवाफदेहिता बढाउने नीति लिइएको छ । ‘हामीले डिजिटल सेवा प्रवाहमा ध्यान दिएका छौँ । नागरिकले सहजरूपमा आफ्ना सेवाहरू प्राप्त गर्न सकून् भन्ने हाम्रो लक्ष्य हो । यसका लागि प्रविधिको उच्चतम प्रयोग भइरहेको छ,’ प्रमुख प्रशासकीय अधिकृत भट्टराईले भन्नुभयो । गाउँपालिकाले योजनाहरूमा जनसहभागिता बढाउन साझेदारी मोडेलको विकास गर्ने र सार्थक जनसहभागिता सिर्जना गर्ने नीति अपनाएको छ । ‘हामीले जनताको सक्रिय सहभागिता सुनिश्चित गर्न साझेदारी मोडेललाई लागू गर्दैछौँ । यसका माध्यमबाट जनसहभागितामा आधारित योजना निर्माण गरिनेछ,’ भट्टराईले जानकारी दिनुभयो ।

गाउँपालिकाले गुनासो र सुझावहरूको व्यवस्थापनमा पनि लचिलो र समावेशी दृष्टिकोण राखेको छ । ‘हामी तथ्यसहित आएका गुनासो र सुझावलाई गम्भीरतापूर्वक लिनेछौँ । आलोचनामा पनि तथ्यहीन आलोचनाको उचित व्यवस्थापन गरिनेछ भने रचनात्मक सुझावलाई अपनाइनेछ,’ उहाँले बताउनुभयो । भट्टराईका अनुसार भविष्यमा कृषि, पर्यटन र सहकारी क्षेत्रलाई मुख्य आर्थिक मेरुदण्ड बनाउने लक्ष्य राखिएको छ । ‘कृषि र सहकारीमार्फत् स्थानीय रोजगारको सिर्जना र पर्यटनको विकासले गाउँपालिकामा समृद्धि ल्याउनेमा हामी विश्वस्त छौँ,’ उहाँले भन्नुभयो ।

यसका अतिरिक्त दिगो विकासका लक्ष्यहरूलाई ध्यानमा राख्दै भविष्यमा समावेशी र समृद्ध गाउँपालिकाको निर्माणका लागि थप योजनाहरू तयार गरिएको प्रमुख प्रशासकीय अधिकृत भट्टराईले जानकारी दिनुभयो । ‘सम्पूर्ण योजनाहरू जनतासँगको साझेदारीमा आधारित छन् र हामी भविष्यमा अझ प्रगति गर्नेछौँ,’ उहाँले भन्नुभयो । स्थानीय तहको विकास, सेवा प्रवाह, र सुशासनको प्रभावकारिता प्रशासनिक नेतृत्वको कार्यशैलीसँग प्रत्यक्षरूपमा जोडिएको हुन्छ । अर्घाखाँचीको मालारानी गाउँपालिकामा प्रमुख प्रशासकीय अधिकृत गोविन्द भट्टराईको आगमनसँगै प्रशासनिक पारदर्शिता, प्रभावकारी सेवा प्रवाह र सुशासनको नयाँ युगको सुरुवात भएको छ ।

प्रमुख प्रशासकीय अधिकृत भट्टराई आफ्नो कुशल नेतृत्व र दूरदृष्टिपूर्ण कार्यशैलीका कारण उदाहरणीय प्रशासकीय बन्नुभएको छ । उहाँले संघ, प्रदेश र स्थानीय सरकारको नीति तथा मार्गदर्शनलाई आधार मान्दै पारदर्शिता, जवाफदेहिता र प्रभावकारी प्रशासनिक व्यवस्थापनलाई प्राथमिकता दिनुभएको छ । सेवा प्रवाहलाई सहज, द्रुत र जनमुखी बनाउन उहाँले प्रविधिमैत्री प्रणालीको प्रवद्र्धन गर्दै आउनुभएको छ । जनताको विश्वास जित्ने प्रशासनिक शैली, जनउत्तरदायी नीति कार्यान्वयन र कानुनी प्रक्रिया अनुशरण गर्दै भट्टराईले मालारानी गाउँपालिकालाई सुशासनको उदाहरणीय मोडेल बनाउने दिशामा अघि बढाइरहनुभएको छ ।