राजावादीको प्रदर्शनका क्रममा भएको घटनाकाे कारक सरकार : राप्रपा

सरकार नै हिंसा भड्काउन उद्धत रहेको राप्रपाको निस्कर्ष

हिमालय टाइम्स

१६ चैत्र २०८१, शनिबार १९:०६

Read Time = 4 mins

डिजिटल संस्करण

समाचार

A A- A+

काठमाडौं । राष्ट्रिय प्रजातन्त्र पार्टीले शुक्रवारको जनप्रदर्शनका क्रममा भएको घटनामा सरकारले जिम्मेवारी लिनुपर्ने निस्कर्ष निकालेको छ ।

शनिवार पार्टी केन्द्रिय कार्यालय धुम्बाराहीमा बसेको पार्टीको केन्द्रिय कार्यसम्पादन समितिको बैठकले यस्तो निर्णय गरेको हो । बैठकपछि सञ्चारकर्मीहरुसँग कुरा गर्दै पार्टीका अध्यक्ष राजेन्द्रप्रसाद लिङदेनले राप्रपा हिंसात्मक गतिविधिको सधैँ विपक्षमा रहेको बताउनु भयो ।

उहाँले हिंसात्मक घटनामा सरकारको संलग्नता र सरकार नै हिंसा भड्काउन उद्धत रहेको राप्रपाको निस्कर्ष रहेको बताउनु भयो ।

शान्ति पूर्ण ढंगले सभा भइरहेको मञ्चमा जुन ढंगले सुनियोजित रुपमा अश्रु ग्यास प्रहार भएको भन्दै आपत्ति जनाउनु भयो । पत्रकार सुरेश रजकलाई बचाउनसक्ने प्रशस्त सम्भावना हुँदा पनि सरकार उदासिन रहेको आरोप लगाउनु भयो । सरकारले घटनको निष्पक्ष छानविनका लागि निष्पक्ष न्यायिक आयोग गठन गर्न माग गर्नुभयो । शान्तिपूर्ण प्रदर्शनमा सहभागी पार्टीका नेताहरु रविन्द्र मिश्र, धवल समशेर जबरा र अधिवक्ता स्वागत नेपाल लगायत निर्दोषलाई २४ घण्टाभित्र बिना शर्त रिहा गर्न माग गर्नुभयो । २४ घण्टाभित्र बिना शर्त रिहाइ नगरे राप्रपाले बिरोधका कार्यक्रम गर्ने निर्णय गरेको बताउनु भयो ।

उहाँले भन्नुभयो, ‘जसले जे उद्देश्यका लागि गरेको भएपनि राप्रपा हिंसात्मक गतिविधिको सधैँ विपक्षमा छ । र हिंसा रहित कार्यक्रम हुनुपर्छ । हिजो जुन हिंसात्मक घटना भयो त्यसमा सरकारको संलग्नता र सरकार नै हिंसा भड्काउन उद्धत रहेको भन्ने राप्रपाको निस्कर्ष छ । प्रधानमन्त्रीले अघिल्लो दिन प्रतिकार गर्न आह्वान गर्नुभयो, हौसला दिनुभयो । बाघे झाप्पु दिनुपर्छ भनेर हौसला दिनुभयो । त्यसबाट पनि उहाँ हिंसा भड्काउने पक्षमा हुनुहुन्छ भनेर स्पष्ट हुन्छ । शान्ति पूर्ण ढंगले सभा भइरहेको मञ्चमा जुन ढंगले सुनियोजित रुपमा अश्रु ग्यास फ्याँकियो । घरबाट पहिला नै सुरक्षाकर्मी बसेर ताकेर ग्यास फ्याँकिएको छ । त्यसबाट पनि सरकार बिथोल्न चाहन्थ्यो, त्यो प्रदर्शनलाई भड्काउन चाहन्थ्यो । पत्रकार सुरेश रजकलाई बचाउनसक्ने प्रशस्त सम्भावना हुँदा पनि सरकार उदासिन रहेको देखिन्छ । कतिपय व्यवसायिक भवनहरुमा सरकारले सुरक्षा दिनसक्ने देखिँदा पनि लुटपाट हुँदा सुरक्षा दिएको छैन । प्रहरीले गोली चलाउनै नपर्ने ठाउँमा ताकी ताकी गोली हानेको छ । आफ्नो बचाउमा पनि सामान्य नियम भन्दा बाहिर गएर ताकेर गोली हानेको छ । हिजोको सम्पूर्ण घटनाको जिम्मेवार सरकार हो भन्ने निस्कर्ष छ । निष्पक्ष नागरिक छानविन आयोग पनि गठन होस् ।’

शुक्रवारको घटनालाई लिएर पूर्वराजा शाहलाई राजनीतिमा तान्ने काम भएको भन्दै त्यसलाई रोक्न आग्रह गर्नुभयो । आन्दोलनका क्रममा निधन भएका सुरेश रजक र सविन महर्जनलाई शहीद घोषणा गर्न र उचित क्षतिपूर्ति दिन माग गर्ने निर्णय गरेको छ ।

सरोकार

यो खबर पढेर तपाईलाई कस्तो महसुस भयो ?