कालीकोट । कालीकोटमा रहेको एकमात्र सरुवा रोग अस्पताललाई अन्यत्र सार्ने योजनाविरुद्ध उच्च अदालत सुर्खेत जुम्ला इजलासमा परेको रिट खारेज भएको छ । अघिल्लो कर्णाली प्रदेश सरकारले स्थापना गरेको सरुवा रोग अस्पताल वर्तमान सरकारले अन्यत्र सार्ने षड्यन्त्र गरेको भन्दै परेको रिट खारेज भएको हो ।
गत साउन ३० गते प्रतिवादी सरकारविरुद्ध परेको रिटमा अधिवक्ता खडानन्द चौलागाईंले बहस गर्नुभएको थियो । कालीकोटमा स्थापित भई भवन र दरबन्दीसहित सञ्चालनमा आएको अस्पताल राजनीतिक चलखेलका कारण जिल्लाबाहिर सार्ने षड्यन्त्र भइरहेको भन्दै कालीकोटको खाँडाचक्र नगरपालिका-८ निवासी युवा समाजसेवी हिक्मतजंग मल्लले जुम्ला पुगेर रिट निवेदन दर्ता गराउनुभएको थियो ।
उहाँले मुख्यमन्त्री कार्यालय, सामाजिक विकास कार्यालय, अस्पताल विकास समिति कालीकोट र सरुवा रोग अस्पताल कालीकोटलाई विपक्षी बनाएर रिट निवेदन दर्ता गराएको समाचार पनि हिमालय टाइम्समा प्रकाशित भएको थियो । मंसिर २४ मा न्यायाधीश नवराज थपलियाको इजलासले सरुवा रोग अस्पतालविरुद्ध परेको रिट खारेजको निर्णय सुनाएको छ । वर्तमान प्रदेश सरकारले खारेज गर्ने निर्णय नभेटिएको र सरकारले उल्टै अर्थमन्त्रालयसँग एक करोड बजेट व्यवस्थापनका लागि माग गरेको भन्दै रिट खारेज गरिदिएको हो ।
रिट दर्ता गराएका मल्लले कर्णाली प्रदेश सामाजिक विकास मन्त्रालयले सरुवा रोग अस्पताल कालीकोटका लागि निर्णयसहित एक करोड बजेट अर्थमन्त्रालयलाई माग गरेको परिपत्रले अस्पताल खारेज नभएको र परिपत्रअनुसार बजेट नआएमा पुनः विकल्प खोज्न न्यायाधीश नवराज थपलियाको एकल इजलासले फैसला सुनाएको जानकारी दिनुभयो ।
कर्णाली प्रदेश सामाजिक विकास मन्त्रालयले कालीकोटको सरुवा रोग अस्पतालका लागि अर्थमन्त्रालयसँग माग गरेको बजेट आएको सन्दर्भमा कालीकोटवासीलाई स्वास्थ्य क्षेत्रमा राहत हुनेछ । विसं २०७८ देखि सञ्चालित उक्त अस्पतालका लागि कर्णाली प्रदेश सरकारले चालु आर्थिक वर्षमा दरबन्दीरत चिकित्सकको सेवासुविधाका लागि बजेट व्यवस्था नगरेको भन्दै चौतर्फी आलोचनासमेत भएको थियो ।
अस्पतालमा कालाजार, मलेरिया, एचआइभी एड्स, क्षयरोग, कोभिड-१९ र सर्ने खालका श्वासप्रश्वाससम्बन्धी रोगको उपचार हुँदै आएको अस्पताल व्यवस्थापन समितिका सदस्य रतनबहादुर शाहीले जानकारी दिनुभयो । ‘१५ शैय्याबाट सञ्चालन गरिएको अस्पताललाई ५० शैय्यामा स्तरोन्नति गरी सञ्चालनको तयारी गरिएको छ । अस्पतालमा वरिष्ठ जनरल फिजिसियन एक, मेडिकल अधिकृत एक, हाउसकिपर, फार्मेसी सहायकलगायतको दरबन्दी रहेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच