पार्टी बैठक सानेपामा मात्र गर्ने निर्णयबाट पछि हट्यो कांग्रेस, फेरि बालुवाटारमा बस्न थाल्यो बैठक

२३ श्रावण २०७९, सोमबार १६:३७

Read Time = 2 mins

राजनीति

A A- A+

काठमाडौं । पार्टीको १४औं महाधिवेशनलगत्तै कांग्रेस महामन्त्रीद्वय गगन थापा र विश्वप्रकाश शर्माले प्रधानमन्त्रीको सरकारी निवास बालुवाटारमा पार्टीको कुनै पनि बैठक नराख्ने निर्णय गर्नुभएको थियो । सो निर्णलगत्तै कांग्रेसको पदाधिकारीदेखि केन्द्रीय समिति बैठकसमेत पार्टी कार्यालय सानेपामा बस्न थालेको थियो ।

असारसम्म पार्टी सभापति शेरबहादुर देउवा केन्द्रीय कार्यालयमा हुने बैठकमा सहभागी हुने गर्नुभएको थियो। प्रायः बैठक उहाँले सानेपामै बस्ने गरी डाक्नुभएको थियो । तर, अहिले फेरि उहाँ पुरानै बाटोमा फर्किनु भएको छ । अर्थात् पार्टीको बैठक बालुवाटारमै डाक्न थाल्नुभएको छ । जसअनुसार सोमबार कांग्रेस पदाधिकारी बैठक प्रधानमन्त्रीको सरकारी निवास बालुवाटारमा बसेको थियो ।

अघिल्लो सरकारका प्रधानमन्त्री केपी ओलीले एमाले र तत्कालीन नेकपाको प्रायः सबै बैठक बालुवाटारमै राख्ने गर्नुहुन्थ्यो। जसकारण राज्यलाई अतिरिक्त आर्थिक भार थपिने गरेको थियो । बालुवाटारबाटै सरकार र पार्टी चलाएको भन्दै ओली निकै आलोचित हुनु भएको थियो। कांग्रेस मात्र होइन सर्वसाधारण जनताले पनि त्यो बेला ओलीको सो निर्णयबाट निकै रुष्ट बनेका थिए ।

ओली यसरी आलोचित बनेको देखेपछि कांग्रेसका महामन्त्रीद्वय थापा र शर्माले पार्टीको बैठक सानेपास्थित केन्द्रीय कार्यालयमा बोलाउने निर्णय गर्नुभएको थियो। तर, पार्टी सभापति देउवाले सोमबार पहिलेको निर्णय लत्याउनु भएको छ।

यो खबर पढेर तपाईलाई कस्तो महसुस भयो ?