प्रतिगमनलाई परास्त गर्न कांग्रेससँग गठबन्धन गरेको हो : प्रचण्ड

हिमालय टाइम्स
Read Time = 3 mins
A A- A+

दार्चुला । माओवादी केन्द्रका अध्यक्ष पुष्पकमल दाहाल प्रचण्डले मुलुकको परिवर्तन, लोकतन्त्र, शान्ति र संविधानलाई बचाउन नेपाली कांग्रेससँग गठबन्धन गरेको बताउनु भएको छ ।

दार्चुलाको गोकुलेश्वरमा बुधबार आयोजित वाम–लोकतान्त्रिक गठबन्धनको चुनावी सभालाई सम्बोधन गर्दै उहाँले विगतमा सात राजनीतिक दलको तर्फबाट कांग्रेसका सभापति एवं तत्कालीन प्रधानमन्त्री गिरिजाप्रसाद कोइराला र आफूले विस्तृत शान्ति सम्झौतामा हस्ताक्षर गरेपछि नै देशको राजनीतिक परिवर्तनको प्रक्रिया सुरु भएको स्मरण गर्नुभयो ।

अहिले मुलुकमा व्याप्त परिवर्तन विरोधी, संघीय लोकतन्त्र विरोधी, संविधान विरोधीलाई परास्त गर्न कांग्रेसलगायत परिवर्तन पक्षधर पार्टीहरूसँग गठबन्धन गरेको उहाँको भनाइ थियो । ‘अहिले मुलुकमा दुई खाले गठबन्धन छ,’ प्रचण्डले भन्नुभयो, ‘ठूलो संघर्षबाट प्राप्त नेपाली जनताको अधिकारको संरक्षण, संविधानको रक्षा, संघीयता, लोकतन्त्र र नेपाली जनताको पक्षमा हाम्रो गठबन्धन बनेको छ ।’

अर्को गठबन्धन केपी ओली नेतृत्वमा बनेको र त्यसले ठूलो संघर्ष, त्याग र बलिदानबाट प्राप्त उपलब्धिहरूलाई उल्टाउन, संविधानलाई च्यात्न चाहने, मुलुकमा राजतन्त्र फर्काउन खोजेको आरोप उहाँले लगाउनु भयो। ४ मंसिरमा यी दुई गठबन्धनबीच ठूलो रणसंग्राम हुने भन्दै प्रचण्डले त्यसको निर्णय नेपाली जनताको हातमा भएको उल्लेख गर्नुभयो ।

सभालाई प्रधानमन्त्री एवं कांग्रेस सभापति शेरबहादुर देउवा पनि सम्बोधन गर्नुभएको थियो। वाम लोकतान्त्रिक गठबन्धनले बुधबार नै डडेल्धुरा र कैलालीमा पनि चुनावी सभा आयोजना गरेको छ । दुवै सभालाई प्रधानमन्त्री देउवा र प्रचण्डले सम्बोधन गर्ने कार्यक्रम छ ।

यो खबर पढेर तपाईलाई कस्तो महसुस भयो?

guest
0 Comments
Inline Feedbacks
View all comments

छुटाउनुभयो कि ?