हिउँदमा धुलाम्मे र वर्षातमा हिलाम्मेको समस्यामा रामपुर बसपार्क

हिमालय टाइम्स
Read Time = 9 mins
A A- A+

पाल्पा । पाल्पाको रामपुर नगर बसपार्कमा प्रवेश गर्ने सबै यात्रुको एउटै प्रश्न मनमा उब्जन्छ कि यहाँको बसपार्क कहिले सुधार होला ? चारैतिर खुला ठाउँ, वर्षायाममा हिलाम्मे र हिउँदमा धुलाम्मे हुने बसपार्कभित्र यात्रु तथा सवारी चालकलाई भरसक जान नपरोस् भन्ने हुन्छ ।
खाल्डाखुल्डी, हिलाम्मे र धुलाम्मे ठाउँमा आवतजावतमा समस्या, अर्कोतर्फ चारै दिशा खुला रहँदा यहाँको बसपार्क असुरक्षित बनेको छ । शहरीकरणतर्फ उन्मुख हुँदै गरेको रामपुरमा बसपार्कको अहिलेको कुरूप अवस्था देख्दा यहाँको सुन्दरतामा बाधक बनेको छ । चार जिल्ला (पाल्पा, स्याङ्जा, तनहुँ र नवलपरासी सुस्तापूर्व नवलपुर) को मुटु भनेर चिनिने रामपुर बसपार्क व्यवस्थित नहुँदा यात्रुलाई सकस भएको बताउनुहुन्छ, निस्दी गाउँपालिका-४ मित्यालस्थित खोप्लाकका ७४ वर्षीय रनबहादुर गाहा ।

‘सवारीसाधन थपिँदै गएका छन्, बजार विस्तार भइरहेको छ तर रामपुरको बसपार्क राम्रो बन्न सकेन,’ उहाँले भन्नुभयो, ‘स्थानीय सरकारले यसतर्फ ध्यान दिएर काम गर्नुप¥यो, हामी यात्रुले सधैं बसपार्कमा धुलो र हिलोको सामना कतिञ्जेलसम्म खेपिराख्ने ।’ बसपार्क व्यवस्थित नभएपछि सवारी धनीले यहाँ गाडी खासै पार्किङ गरेर राख्दैनन् । चारैतिर खुला रहेको हुँदा बजारका छेउ, होटल तथा घरमा लगेर पार्किङ गर्न व्यवसायी बाध्य छन् । रातको समयमा सुरक्षितरूपमा पार्किङ गरेर राख्ने अवस्था नभएको हुँदा अन्यत्र लगेर गाडी पार्किङ गर्दै आइरहेको जिपचालक शेरबहादुर खाम्चाले बताउनुभयो ।

‘गाडी पार्किङ गरेर राख्यो भने केही क्षति हुने हो कि भन्ने चिन्ताले राती ढुक्कले निद्रा लाग्दैन, चारैतिर बारबन्देज, गाडी निस्कने र भित्रने प्रवेशद्वार, निगरानीका लागि सिसी क्यामेराको व्यवस्था हुनुपर्‍यो नत्र गाडी यहाँ राख्ने परिस्थिति व्यवसायीलाई बन्दैन,’ उहाँले भन्नुभयो । बसपार्कलाई व्यवस्थित गर्न समयमा नै पर्याप्त बजेट सम्बन्धित निकायबाट नपाउँदा व्यवस्थापनमा चुनौती देखिएको नगर बसपार्क समितिका अध्यक्ष विनोद श्रेष्ठले बताउनुभयो । नगरपालिकाले बसपार्क व्यवस्थापनमा कनिका छरेजस्तो सानो बजेट उपलब्ध गराउँदा देखिने गरी काम गर्न समितिलाई कठिनाइ परेको उहाँको भनाइ छ ।

बस बिसौनी ठाउँ राम्रो नहँुदा वर्षायामका बेलामा हिलाम्मे भएर गाडी डोजर लगाएर तान्नुपर्ने अवस्थासमेत व्यवसायीले खेप्नुपरेको पश्चिम नेपाल बस व्यवसायी समितिका कर्मचारी नारायण रेग्मी बताउनुहुन्छ । उहाँ भन्नुहुन्छ, ‘पार्किङका लागि सुरक्षित ठाउँ नबन्दासम्म व्यवसायीलाई ढुक्कले पार्किङ गर्नुहोस् भन्ने अवस्था छैन, नयाँ ठाउँबाट रामपुर आउने यात्रु बसपार्कको बिजोग अवस्था देखेर तर्सने गर्दछन्, हामीले व्यवस्थापनका लागि वडा तथा नगरपालिका कार्यालयमा जानकारी गराए पनि सुनुवाइ भएको छैन’ ।

उहाँका अनुसार रामपुर बसपार्कबाट दैनिकजसो करिब दुई सय यात्रु अन्यत्र जाने गरेको पाइएको छ । बिहान ५ः३० देखि साँझ ६ बजेसम्म नम्बरअनुसार दैनिक सवारीसाधन यहाँबाट लामो तथा छोटो दूरीका लागि छुट्ने गर्दछन् । बसपार्कमा बसको ६० र जिपको ४० पार्किङ शुल्क तोकिएको छ । लामो दूरीका ठूला गाडी काउन्टरबाटै छुट्ने गरे पनि साना गाडी मनपरी ढंगले बेझाड बजारका चोकबाट छुट्ने गर्दछन् । ठाउँ–ठाउँबाट चालकले मनोमानी ढंगले यात्रु ओसार्ने हुँदा सबै गाडी बसपार्कमा ल्याउन कठिन भएको नमस्ते रामपुर यातायात प्रालिका कर्मचारी दामोदर भण्डारीले बताउनुभयो ।

रामपुरबाट दैनिक छुट्ने १८ जिपमध्ये १५ जिपले बेझाड बजारका विभिन्न ठाउँबाट यात्रु चढाउँदै छुट्ने गर्दछन् भने तीनवटा जिप र ११ बस नियमितरूपमा बसपार्क क्षेत्रबाटै छुटिरहेका छन् । रामपुरबाट अन्यत्र जाने र यहाँ भित्रने सबै सवारीसाधन अबको केही दिनभित्रमा नै बसपार्कबाटै छुट्ने व्यवस्था मिलाइने तयारी भइरहेको बताउनुहुन्छ नमस्ते रामपुर यातायात प्रालिका अध्यक्ष राजन पोखरेल । बेझाड बजारको मुख्य चोकमा अस्तव्यस्तरूपमा सवारीसाधन पार्किङ गरेर राखिन्थ्यो । जनघनत्व बढ्दै जाँदा यहाँ बसपार्कको अवधारणा ल्याएर सिमलीघारी क्षेत्रमा बसपार्क राख्ने सर्वपक्षीय निर्णय भएपश्चात् २०६९ देखि यहाँबाट सवारीसाधन पार्किङ गरी छुटाउन थालिएको हो ।
रामपुरमा बसपार्क सञ्चालन गर्नका लागि विसं २०६७ मा तत्कालीन नगर विकास समितिले एक लाख ५० हजार रकम उपलब्ध गराएपछि हालको रामपुर नगरपालिका-५ स्थित सिमलीघारी क्षेत्रमा काम थालनी गरी क्रमिकरूपमा बसपार्क निर्माणको काम थालनी गरियो । समितिले पहिलो चरणमा दुई लाख २० हजारको काम ग¥यो भने दोस्रो चरणमा तत्कालीन वडा नागरिक मञ्चको जिम्मेवारीमा ७५ हजार उपलब्ध भई काम गरियो ।

त्यसपश्चात् २०७४ को स्थानीय तहको निर्वाचन सकिएपछि नगरपालिकाबाट पाँच लाख रकम विनियोजन गरिए पनि उपभोक्ता समितिले काम नगरेपछि रकम फिर्ता भयो । विसं ०७६ मा नगरपालिकाबाट प्राप्त आठ लाख रकमले बसपार्कको जग्गा वर्गीकरण, झाडी फँडानी, रुखबिरुवा कटान तथा गिट्टी बिछ्याउनेजस्ता काम गरियो । आर्थिक वर्ष २०७७/०७८ मा नगरपालिकाबाट प्राप्त पाँच लाख रकमले करिब एक सय ५० मानिस अट्ने क्षमताको ट्रष्ट भवन, एउटा पक्की शौचालय निर्माणको काम गरिएको छ ।

बसपार्क व्यवस्थापनका लागि रामपुर नगरपालिकामा क्रमागतरूपमा पाँच करोड बजेट प्राप्त भएकाले अबको पाँच वर्षभित्रमा व्यवस्थित संरचनासहितको बसपार्क तयार हुने रामपुर–५ का वडाध्यक्ष दुर्गाप्रसाद पोखरेल बताउनुहुन्छ । रामपुरबाट दैनिकरूपमा सदरमुकाम तानसेन, बुटवल, कावासोती, नारायणघाट, पोखरा, मुग्लिङ, काठमाडौंलगायतका स्थानमा सवारीसाधन छुट्ने गर्दछन् । पश्चिम नेपाल यातायात प्रालि, नमस्ते रामपुर यातायात प्रालि, शृंगा तथा स्थानीय यातायात कम्पनी, गण्डकी यातायात गल्याङ, लेकबेंसी यातायात प्रालि र श्रीनगर यातायात कम्पनीका सवारीसाधन यहाँ ओहोरदोहोर गर्दछन् ।

यो खबर पढेर तपाईलाई कस्तो महसुस भयो?

guest
0 Comments
Inline Feedbacks
View all comments

छुटाउनुभयो कि ?