अख्तियारद्वारा दुई खरिदारविरुद्ध विशेष अदालतमा मुद्दा दायर

हिमालय टाइम्स

२९ जेठ २०८०, सोमबार १७:००

Read Time = 3 mins

डिजिटल संस्करण

सुशासन

A A- A+

काठमाडौं । अख्तियार दुरुपयोग अनुसन्धान आयोगले १५ हजार घुससहित पक्राउ परेका जिल्ला मालपोत कार्यालय बारामा कार्यरत दुई खरिदारविरुद्ध विशेष अदालतमा मुद्दा दायर गरेको छ । जग्गा रजिष्ट्रेसन पास गर्न सेवाग्राहीसँग घुस मागेको भन्ने सूचनाका आधारमा अख्तियार दुरुपयोग अनुसन्धान आयोगको कार्यालय हेटौडाबाट खटिएको टोलीले घुससहित पक्राउ गरेका खरिदारद्वय रामविश्वास साह र गौरीशंकर कुमार कुशवाहा विरुद्धसोमवार १५ हजार बिगो दाबीसहित अदालतमा मुद्दा दायर गरेको हो ।

अख्तियारका प्रवक्ता भोला दाहालका अनुसार अनुसन्धानको सिलसिलामा भूमिसुधार तथा मालपोत कार्यालय, कलैया, बाराका खरिदार रामविश्वास साहले १५ हजार घुस मागगरी प्रतिवादी गौरीशंकर कुमार कुशवाहलाई लिन लगाएको खुलेको छ ।

प्रधानाध्यापकविरुद्ध भ्रष्टाचार मुद्दा दायर
यस्तै, आयोगले प्रधानाध्यापक नारायणप्रसाद पौडेलविरुद्ध भ्रष्टाचार मुद्दा दायर गरेको छ । सार्वजनिक सम्पत्ति हानि नोक्सानी गरी भ्रष्टाचार गरेको आरोपमा कास्कीको कैलाश टेत्सुओ प्राथमिक विद्यालयका तत्कालीन प्रधानाध्यापक पौडेलविरुद्ध विशेष अदालत काठमाडौंमा मुद्दा दायर गरिएको हो ।

विद्यालयको शौचालय निर्माण गर्नका लागि जिल्ला शिक्षा कार्यालय, कास्कीबाट आव २०६७/०६८ मा रकम निकासा भएकोमा, सो कामका लागि तत्कालीन प्रधानाध्यापक पौडेलले उक्त रकम बैंकबाट झिकेको तर शौचालय निर्माणको लागि कुनै पहल नगरेको, उक्त रकम बेरुजु खातामा दाखिला गर्न पटक–पटक निर्देशन दिइएकोमा दाखिलासमेत नगरी निजले शौचालय निर्माणको लागि आएको दुई लाख रुपैयाँ र विद्यालयको नाममा रहेको अक्षय कोषको एक लाख १२ हजार गरी जम्मा तीन लाख, १२ हजार रुपैयाँ हिनामिना गरी सार्वजनिक सम्पत्तिको हानि नोक्सानी गरेको अख्तियारको ठहर छ ।

भ्रष्टाचार

मुद्दा

अख्तियार

यो खबर पढेर तपाईलाई कस्तो महसुस भयो ?