-नन्दराम जैशी
सुर्खेत । जरायो मारेको आरोपमा सुर्खेतका पाँच जना पक्राउ परेका छन् । संरक्षित वन क्षेत्र काँक्रेविहारमा जरायो मारेको आरोपमा पाँच जनालाई प्रहरीले पक्राउ गरेको हो ।
प्रहरीका अनुसार वीरेन्द्रनगर–९ स्थित नयाँगाउँ क्षेत्रमा जरायो मारेर मासु भागबण्डा गरिरहेको अवस्थामा प्रहरीले उनीहरूलाई पक्राउ गरेको थियो । गोप्य सूचनाका आधारमा बुधबार बिहान पासोमा पारेर जरायो मारेको पत्ता लागेको हो ।
जिल्ला प्रहरी कार्यालय सुर्खेतका प्रवक्ता एवम् प्रहरी नायब उपरीक्षक लक्ष्मणबहादुर शाहीले घटनाबारे थप अनुसन्धान भइरहेको बताउनु भयो । उहाँका अनुसार पक्राउ पर्नेमा वीरेन्द्रनगर–१० का ५२ वर्षीय डम्मरबहादुर थारु, उनका छोरा अन्दाजी २१ वर्षीय सुशील चौधरी, २८ वर्षीय आशाराम चौधरी र वीरेन्द्रनगर–११ का ४१ वर्षीय मिनबहादुर वली रहेका छन् ।
उनीहरूलाई राष्ट्रिय निकुञ्ज तथा वन्यजन्तु संरक्षण ऐन, २०२९ अनुसार कारबाही हुने जिल्ला वन कर्यालय सुर्खेतले जनाएको छ । उक्त ऐनको उपदफा ३ मा राष्ट्रिय निकुञ्ज, प्राकृतिक आरक्ष, वन्यजन्तु आरक्ष, संरक्षण क्षेत्र वा मध्यवर्ती क्षेत्रभित्र अनुज्ञापत्र नलिई पन्छी र माछाबाहेक अन्य वन्यजन्तु शिकार गरी मारेमा वा घाइते बनाएमा २० हजारदेखि ५० हजार रुपैयाँसम्म जरिवाना वा ६ महिनादेखि एक वर्ष कैद वा दुवै सजाय हुने उल्लेख छ ।
एक सय ७५ हेक्टर क्षेत्रफलमा फैलिएको काँक्रेविहारको वन क्षेत्रलाई २०५९ सालमा पहिलो संरक्षित वन क्षेत्र घोषणा गरिएको थियो । काँक्रेविहार वन क्षेत्रमा बासस्थान भएका दुर्लभ वन्यजन्तु जरायो, बँदेल, खरायो, मृग, स्यालजस्ता जनावर र मयुर, कालिजलगायतका चराचुरुङ्गी छन् ।
संरक्षणका लागि सशस्त्र वन रक्षकको पोष्ट खडा गरिएको छ भने टोलटोलमा संरक्षण समिति पनि बनाइएको छ । तर, वन क्षेत्रको उचित घेराबार तथा संरक्षणको जिम्मेवारी पाएका निकाय चनाखो नहुँदा वन्यजन्तु र चराचुरुङ्गीको चोरी शिकार बढिरहेको स्थानीय बताउँछन् । वन्यजन्तु चोरी शिकारी बढेको सूचना आउन थालेपछि प्रहरीले पनि निगरानी बढाएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच