काठमाडौं । नेकपा (एमाले)का अध्यक्ष केपी शर्मा ओलीले मुलुकमा समस्याहरू रहेकाले त्यसको समाधानका लागि एमाले क्रियाशील भइरहेको बताउनुभएको छ । पार्टी निकट नेपाल राष्ट्रिय भूतपूर्व सैनिक तथा प्रहरी संगठनले काठमाडौंमा दशैँ-तिहारलगायत चाडपर्वको अवसर पारेर आयोजना गरेको शुभकामना आदानप्रदान कार्यक्रममा बोल्दै उहाँले यस्तो बताउनुभएको हो । एमालेले मुलुकको समस्या समाधानका लागि सिंगो शक्तिलाई परिचालन गरिरहेको उहाँको जिकिर थियो ।
अध्यक्ष ओलीले पार्टीका नेता, कार्यकर्तालाई अनुशासित हुन निर्देशन पनि दिनुभएको छ । पार्टी सदस्यता लिएकै भोलिपल्ट माथिल्लो पदमा पुग्ने जस्ता उच्छृंखल, अराजक गतिविधि भइरहेको उल्लेख गर्दै अध्यक्ष ओलीले पार्टीका नेता, कार्यकर्ताले अनुशासन पालना गरेर अघि बढ्नुपर्ने बताउनुभयो ।
उहाँले पार्टीभित्र आफूलाई केही देखाउनका लागि अनुशासनहिनताको सहारा लिने, उच्छृंखलताको सहारा लिने प्रवृत्ति बढिराखेको उल्लेख गर्दै त्यसलाई नियन्त्रण गरेर अघि बढ्ने बताउनुभयो । उहाँले भन्नुभयो, ‘जति अनुशासनहीन भयो, जति उछृंखल भयो, जति जथाभावी बोल्यो, त्यति के हुने हो, थाहा छैन । महान् हुन खोजेको होला । त्यो प्रवृत्ति छ एउटा । आफूलाई कुछ देखाउनका लागि अनुशासनहिनताको सहारा लिने, उछृंखलताको सहारा लिने प्रवृत्ति बढिराखेको छ । आफूलाई अरूभन्दा केही पृथक देखाउने । त्यसप्रकारका प्रयासहरू भइरहेका छन् । त्यसलाई हामीले नियन्त्रण गर्नुछ । अनिमात्रै सभ्य समाज, अनुशासित समाज बनाउन सकिन्छ । प्रकृति अनुशासन हो ।’
ओलीले देशमा, समाजमा अराजकता फैलिएकाले त्यसलाई नियन्त्रण गर्न र अनुशासनको पाठ सिकाउने काममा भुतपूर्व सैनिक तथा प्रहरीहरूको भूमिका महत्वपूर्ण हुनेसमेत बताउनुभयो । उहाँले भन्नुभयो, ‘अहिले समाजमा एउटा अराजकता बढेको छ, असहिष्णुता बढेको छ । त्यसले समाजलाई परस्परमा घृणा फैलाउने कामहरू भइराखेको छ । त्यसले एकातिर राष्ट्रिय एकतालाई कमजोर बनाउने काम भइराखेको छ । विभिन्न खालको संकीर्णता, विभिन्न गैरजिम्मेवार खालका अभिव्यक्तिहरू, तरिकाहरू, शैलीहरू यिनीहरूले ।
अर्कातिर, समाज विकृति, गैरजिम्मेवार भइराखेको छ । यस्तो अवस्थामा जिम्मेवारीबोध कसरी गराउने ? मान्छेलाई अनुशासित ढंगले कर्तव्य पालनामा लाग्नुपर्छ भन्ने कुरा कसले बुझाउने, कसरी बुझाउने ? यस कुरामा अनुशासन सिकेर, अनुशासनको पालना गरेर, अनुशासन व्यवहारमा कार्यान्वयन गरेर आएका भूतपूर्व सैनिक र प्रहरी जति यो कुरा सिकाउनका लागि उपयुक्त अरू कोही हुन सक्दैन ।’
माघभित्र जिल्ला र पालिका अधिवेशन
नेकपा एमालेले आगामी माघ मसान्तभित्र पार्टीका जिल्ला तथा पालिका तहका अधिवेशनहरू सम्पन्न गर्नेगरी योजना बनाउन सम्बन्धित कमिटीलाई परिपत्र गर्ने भएको छ । पार्टीको केन्द्रीय संगठन विभागको असोज ३० गते बसेको बैठकले प्रदेश कमिटीहरूका अधिवेशन निर्धारित समयमा सम्पन्न भइसकेकाले जिल्ला, स्थानीय तह र वडा तहका कमिटीका अधिवेशन सम्बन्धमा निर्णय लिएको हो । बैठकले फागुन र चैत महिनामा पार्टी सदस्यता नवीकरणसँगै वडा र टोल कमिटीका अधिवेशन सम्पन्न गर्ने निर्णय गरेको एमालेले जनाएको छ ।
पार्टीका स्थायी कमिटी सदस्य तथा संगठन विभाग प्रमुख काशीनाथ अधिकारीको अध्यक्षतामा बसेको बैठकले सदस्यता प्रमाणीकरण प्रतिवेदन अनुमोदन गरेको छ । सोअनुसार भारत प्रवास र अन्तर्राष्ट्रिय कमिटी मातहतका सदस्यबाहेक पार्टीका साढे पाँच लाख सदस्यहरूको सदस्यता प्रमाणीकरण भएको छ । बैठकले सदस्यता स्थानान्तरण पनि खुला गरेको पार्टीका केन्द्रीय सदस्य तथा संगठन विभाग सचिव माधव ढुंगेलद्वारा जारी विज्ञप्तिमा उल्लेख गरिएको छ ।
आत्मालोचना गरेमा उपयुक्त जिम्मेवारी
एमालेले विभिन्न समयमा पार्टीको कारबाहीमा परेका नेता तथा कार्यकर्ताप्रति लचिलो बन्ने भएको छ । नेकपा एमाले संगठन विभागको हालै सम्पन्न बैठकले सम्बन्धित पार्टी कमिटीको कारबाहीमा परेका तर कमजोरी स्वीकार गर्दै लिखित आत्मालोचना गरे पार्टीमा उपयुक्त जिम्मेवारी दिने निर्णय भएको संगठन विभाग प्रमुख काशीनाथ अधिकारीले जानकारी दिनुभयो । ‘विभिन्न कारणले सम्बन्धित कमिटीको कारबाहीमा परेका तर आफ्नो कमजोरी आत्मसात् गरी लिखित आत्मालोचना गरेका र व्यवहारबाट विश्वास जितेका कमरेडहरूलाई उपयुक्त जिम्मेवारी दिएर परिचालन गर्न उदारता अपनाउन निर्देशन गर्ने निर्णय गरिएको छ’, अधिकारीले बैठकको निर्णय उद्धृत गर्दै भन्नुभयोे, ‘आत्मालोचना गर्नेलाई पार्टीले पुनः अवसर दिन्छ भन्ने यसको सन्देश हो ।’
खासगरी एमालेले गत-२०७९ को निर्वाचनमा अन्तर्घात गर्ने तथा बागी-विद्रोही उम्मेदवारी दिनेलाई कारबाही गरेको थियो । तर कति सदस्यलाई कारबाही भएको छ भन्ने विवरण एमालेले गोप्य नै राखेको छ । असोज ३० मा बसेको संगठन विभागको बैठकले गरेको निर्णयहरूलाई एकीकृत गर्दै पार्टी मातहत सर्कुलर पठाउने एमालेले जनाएको छ । ‘मिसन-८४ अभियान’ चलाएको एमालेले-०८४ को निर्वाचनमा एक्लै ५१ प्रतिशत मत ल्याउने दाबी गर्दै आएको छ ।
कात्तिक १४ मा चियापान
नेकपा एमालेले कात्तिक १४ गते पार्टीको केन्द्रीय कार्यालय च्यासलमा चियापना कार्यक्रम गर्ने भएको छ । विगत वर्ष झैँ बडादशैँ, तिहार र छठपर्वका अवसरमा चियापान कार्यक्रम राखिएको हो । चाडपर्वको अवसरमा शुभकामना आदान-प्रदान गर्नका लागि पार्टी अध्यक्ष केपी शर्मा ओलीको आयोजनामा चियापान गर्न राखिएको एमालेले जनाएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच