नवलपरासी । उपभोक्ता हित संरक्षण मञ्च नेपालका केन्द्रीय अध्यक्ष ज्योति बानियाँले स्थानीय सरकारले स्थानीय बजार व्यवस्थापनमा चासोका साथ काम गर्नुपर्ने बताउनुभएको छ । स्थानीय बजार व्यवस्थापन, उपभोक्ता हित संरक्षण र स्वच्छ बजार कायम गर्न तीनै तहका सरकारले प्रभावकारी भूमिका खेल्नुपर्ने उहाँले बताउनुभयो ।
उपभोक्ता हित संरक्षण मञ्च पश्चिम नवलपरासी जिल्ला समितिको आयोजनामा सदरमुकाम परासीमा आयोजित बजार व्यवस्थापनमा स्थानीय तहको भूमिका विषयक छलफल कार्यक्रममा बानियाँले नेपालको संविधानले नै तीन तहका सरकारलाई उक्त जिम्मेवारी दिएको बताउनुभयो । उपभोक्ताले स्वच्छ र गुणस्तरीय वस्तु तथा सेवा उपभोग गर्न पाउने गरी स्थानीय तहले स्थानीय बजारको व्यवस्थापन गर्नुपर्ने अध्यक्ष बानियाँको भनाइ थियो । उहाँले भन्नुभयो, ‘स्थानीय बजार व्यवस्थापनअन्तर्गत हरेक वस्तु तथा सेवा उपभोगका लागि एक स्थानमा कम्तीमा तीनवटा छुट्टाछुट्टै स्थल, जहाँ उपभोक्ताले रोज्न पाउने अधिकार कार्यान्वयन गर्न सक्छन्,त्यो किसिमको व्यवस्था हुनुपर्छ, एक स्थानीय तहमा कम्तीमा तीनवटा अस्पताल, तीनवटा बैंक, तीनवटा ग्याँस स्टेसन हुनुपर्छ, जहाँ प्रतिस्पर्धा हुन्छ र उपभोक्ताले स्वच्छ र गुणस्तरीय वस्तु तथा सेवाको उपभोग गर्न पाउछन् ।’
अध्यक्ष बानियाँले सबै स्थानीय तहले सुपथ पसल सञ्चालन तथा एकीकृत बजार स्थापना गर्न आवश्यक रहेको बताउनुभयो । स्थानीय उत्पादन प्रवद्र्धन, व्यावसायिक स्वच्छता र उपभोक्तामैत्री बजार व्यवस्थापन अहिलेको आवश्यकता रहेको उहाँको भनाइ थियो । उपभोक्तालाई मर्का पर्दा सुनुवाइ गर्न र हानि-नोक्सानीबापत क्षतिपूर्ति भराउनुपर्ने कानुनी व्यवस्था प्रभावकारीरूपमा कार्यान्वयन गर्नुपर्नेमा समेत उहाँको जोड थियो । उपभोक्ता हित संरक्षण मञ्च नवलपरासीकी अध्यक्ष अधिवक्ता सरस्वती शर्माको अध्यक्षता तथा रामग्राम नगरपालिकाकी उपप्रमुख सम्झना चौधरीको उपस्थितिमा भएको कार्यक्रममा उपमेयर चौधरीले स्थानीय बजार व्यवस्थापन, स्वच्छता तथा बजार अनुगमनका लागि स्थानीय तहहरूले पहल गरिरहेको बताउनुभयो । उहाँले उपभोक्ता सचेत हुन सके स्वच्छ बजार कायम हुने भन्दै उपभोक्ता सचेतना तथा व्यवसायिक स्वच्छताका लागि आवश्यक बजेट विनियोजन गरी कार्यान्वयन गर्ने बताउनुभयो । प्रमुख जिल्ला अधिकारी विश्वप्रकाश अर्यालले सबै क्षेत्रमा बेथिति रहेकाले सबै मिलेर समाधानमा लाग्नुपर्ने बताउनुभयो । संघीय सरकारको प्रतिनिधिका हिसाबले पनि आफूले जिल्लामा उपभोक्तामैत्री बजार कायम गर्न पहल गरिरहेको तर सबैको सहयोगको खाँचो रहेको उहाँको भनाइ थियो ।
कार्यक्रममा घरेलु तथा साना उद्योग कार्यालय नवलपरासीका प्रमुख पुरुषोत्तम पौडेल, नवलपरासी उद्योग वाणिज्य संघका उपाध्यक्ष राजेश गुप्ता, नागरिक समाजका अध्यक्ष राधेश्याम सिंह सैथवार, उपभोक्ता हित संरक्षण मञ्चका बर्दघाट नगर अध्यक्ष हुमनाथ आचार्य, पाल्हीनन्दन गाउँपालिकाकी उपाध्यक्ष फातिमा खातुन अन्सारी, सरावल गाउँपालिकाकी उपाध्यक्ष बासमती हरिजन, उपभोक्ता हित संरक्षण मञ्चका केन्द्रीय उपाध्यक्ष अजय अधिकारी, सुर्वणप्रभा गुरागाईं, केन्द्रीय महासचिव विष्णु तिमल्सिनालगायतको उपस्थिति रहेको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच