धनगढी । कैलालीको धनगढीमा जारी लिटल फ्लावर प्रिमियर लिग (एलपिएल) को आठौँ संस्करणअन्तर्गत तेस्रो दिन सम्पन्न दुई खेलमा घोडाघोडी क्रिकेट एकेडेमी र शुक्लाफाँटा ब्ल्याकबक्स फाउण्डेसन विजयी भएका छन् । समूह ‘सी’ अन्तर्गतको आजको पहिलो खेलमा कैलालीको घोडाघोडी क्रिकेट एकेडेमीले सुदूरपश्चिमाञ्चल एकेडेमीलाई ४ विकेटले पराजित गर्दै विजयी सुरुवात गर्यो । प्रतियोगितामा सुदूरपश्चिमाञ्चलको यो दोस्रो हार हो ।
सुदूरपश्चिमाञ्चलले दिएको १११ रनको लक्ष्य घोडाघोडीले १६.५ ओभरमा ६ विकेट गुमाएर पूरा गर्यो । घोडाघोडीको ब्याटिङमा ओपनर विपिनविक्रम शाहीले सर्वाधिक ३१ रन योगदान दिनुभयो । सञ्जय बोहराले २२ तथा कृष कार्कीले २० रन बनाउनुभयो । ८१ रनमा ६ विकेट गुमेको अवस्थामा सञ्जय र कृषले अविजित ३२ रनको साझेदारी गर्दै जितसम्म पुर्याउनुभयो । सुदूरपश्चिमाञ्चलको बलिङमा वीरेन्द्र चन्द र पारस सुनारले दुई/दुई तथा सौर्य श्रेष्ठ र निसान रेग्मीले एक/एक विकेट लिनुभयो । यसअघि टस जितेर ब्याटिङ गरेको सुदूरपश्चिमाञ्चल एकेडेमीले १८.५ ओभरमा ११० रनमा सबै विकेट गुमायो ।
सुदूरपश्चिमाञ्चलका लागि आशिष लुहारले सर्वाधिक ४२ रन योगदान दिनुभयो । उहाँले ३६ बलमा १ चौका र ४ छक्का प्रहार गर्नुभयो । सन्दिप विष्टले २७ तथा किरण कार्कीले १४ रन बनाउनुभयो । घोडाघोडी क्रिकेट एकेडेमीका हरिश बस्नेत एक्लैले ४ विकेट लिनुभयो । जुन क्रममा ४ ओभरमा २२ रन खर्चिनुभयो । यस्तै सञ्जय बोहराले ३ विकेट लिनुभयो भने कृष कार्कीले २ तथा भुपेश जोशीले १ विकेट लिनुभयो । खेलको प्लेयर अफ द म्याच अलराउण्ड योगदान दिनुभएका सञ्जय बोहरा घोषित हुनुभयो ।
यस्तै दोस्रो खेलमा समूह ‘ए’ अन्तर्गत शुक्लाफाँटा ब्ल्याकबक्स फाउण्डेसनले विजयी सुरुवात गर्ने क्रममा खप्तड इण्डोर स्पोर्ट्स ट्रेनिङ सेन्टरलाई ११२ रनको विशाल अन्तरले पराजित गरेको छ । शुक्लाफाँटाले दिएको १७७ रनको लक्ष्य पछ्याएको खप्तड इण्डोरले १५.१ ओभरमा ६४ रनमात्र बनायो । खप्तडका लागि पुकार चन्दले १३ तथा प्रकाश पाण्डेले १२ रन बनाउनुबाहेक अन्य ब्याटरले दोहोरो अंकमा रन बनाउन सकेनन् । खप्तडलाई सस्तैमा सीमित गर्न शुक्लाफाँटाका दायाँ हाते पेसर कैलाश ऐर एक्लैले ५ विकेट लिनुभयो । प्लेयर अफ द म्याच घोषित ऐरले ३.१ ओभरमा १५ रन खर्चिनुभयो । सुशील रावल, भरत चन्द, वसन्त खत्री र सुरज तिरुवाले एक/एक विकेट लिनुभयो ।
यसअघि टस हारेर ब्याटिङ गरेको शुक्लाफाँटा ब्ल्याकबक्स फाउण्डेसनले २० ओभरमा ९ विकेट गुमाएर १७६ रन बनायो । शुक्लाफाँटाका लागि ओपनर अशोक विष्टले सर्वाधिक ४१ रन योगदान दिनुभयो । जुन क्रममा उहाँले ३५ बलमा ६ चौका प्रहार गर्नुभयो । किरण ठगुन्नाले २२ बलमा ४ चौका र २ छक्का मद्दतले ३५ रन बनाउनुभयो । वसन्त खत्रीले २३ तथा लोकेश जोशीले २० रन बनाउनुभयो ।
खप्तड इण्डोर स्पोर्ट्सको बलिङमा रवि विष्टले सर्वाधिक ३ विकेट लिनुभयो । जुन क्रममा ३ ओभरमा २१ रन खर्चिनुभयो । प्रकाश पाण्डेले २ तथा मुकेश विष्ट, नगेन्द्र उपाध्याय र दिपक टमाटाले एक/एक विकेट लिनुभयो । प्रतियोगिताअन्तर्गत चौथो दिन बुधबार पनि दुई खेल हुनेछन् । पहिलो खेल बिहान ९ बजे आयोजक लिटल फ्लावर र घोडाघोडी क्रिकेट एकेडेमीबीच तथा दोस्रो खेल १ बजे कैलाली जिल्ला क्रिकेट क्लब र खप्तड इण्डोर स्पोर्ट्स ट्रेनिङ सेन्टरबीच हुनेछ ।
लिटल फ्लावर स्पोर्ट्स क्लबको आयोजनामा सुरु भएको प्रतियोगिताको यो आठौँ संस्करण हो । प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउनेछन् । प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ वटा टिमको सहभागिता रहेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच