युथ अफ टीकापुर र धनगढी स्पोर्ट्स क्लब विजयी

धनगढी । कैलालीको धनगढीमा जारी लिटल फ्लावर प्रिमियर लिग (एलपिएल)को आठौं संस्करणअन्तर्गत छैटौं दिन शुक्रबार सम्पन्न दुई खेलमा युथ अफ टीकापुर र धनगढी स्पोर्ट्स क्लब विजयी भएका छन् । समूह ‘बी’अन्तर्गतको खेलमा युथ अफ टीकापुरले दोस्रो जित दर्ता गर्ने क्रममा धनगढी क्रिकेट एकेडेमीलाई पराजित गर्‍यो । समूह ‘ए’अन्तर्गतको खेलमा धनगढी स्पोर्ट्स क्लबले शुक्लाफाँटा ब्ल्याकबक्स फाउण्डेशनलाई पराजित गर्दै दोस्रो जित दर्ता गर्दै युथ अफ टीकापुर र धनगढी स्पोर्ट्स क्लबले सेमिफाइनल पुग्ने सम्भावना बलियो बनाएको छ ।

पहिलो खेलमा युथ अफ टीकापुरले धनगढी क्रिकेट एकेडेमीलाई ३३ रनले पराजित गर्‍यो । युथ अफ टीकापुरले दिएको १३६ रनको लक्ष्य पछ्याएको धनगढीले २० ओभर ब्याटिङ गरे तापनि आठ विकेट गुमाएर १०२ रनमात्र बनाउन सक्यो ।

धनगढीका लागि शार्थक धितालले सर्वाधिक ३७ रन बनाउनुभयो । मान साउदले १८ तथा विजय रानाले १२ रनको योगदान दिनुभयो । युथ अफ टीकापुरको बलिङमा प्लेयर अफ द म्याच घोषित गौतम केसीले तीन विकेट लिनुभयो । जुन क्रममा चार ओभरमा ३० रन खर्चिनुभयो । सुमित महर्जनले दुई तथा मोहम्मद हुसेन र प्रकाश जैसीले एक-एक विकेट लिनुभयो ।

यसअघि टस जितेर ब्याटिङ गरेको युथ अफ टीकापुरले निर्धारित २० ओभरमा नौ विकेट गुमाएर १३५ रन बनायो । युथ अफ टीकापुरका लागि हरि चौहानले सर्वाधिक २९ रन योगदान दिनुभयो भने गौतम केसीले २६, प्रदीप ऐरीले १४, प्रकाश जैसीले १३ रन बनाउनुभयो । अतिरिक्तको रूपमा धनगढी क्रिकेट एकेडेमीले २६ रन खर्चियो ।

धनगढी क्रिकेट एकेडेमीको बलिङमा लेग स्पिनर युवराज खत्री एक्लैले चार विकेट लिनुभयो । जुन क्रममा उहाँले चार ओभरमा मात्र आठ रन खर्चिनुभयो । निरज ऐरले दुई तथा हिक्मत महरा र मान साउदले एक-एक विकेट लिनुभयो । दोस्रो खेलमा धनगढी स्पोर्ट्स क्लबले शुक्लाफाँटा ब्ल्याकबक्स फाउण्डेशनलाई ६ विकेटले पराजित गर्‍यो । शुक्लाफाँटाले दिएको ११० रनको लक्ष्य धनगढीले १३.२ ओभरमा चार विकेट गुमाएर भेटायो ।

धनगढी स्पोर्ट्स क्लबको लागि प्रनित थापाले अविजित अर्धशतकीय योगदान दिनुभयो । प्लेयर अफ द म्याचसमेत घोषित हुनुभएका थापाले ३४ बलमा तीन चौका र पाँच छक्का प्रहार गर्नुभयो । वसन्त कार्कीले अविजित २७ रन बनाउनुभयो । ३२ रनमा चार विकेट गुमेको अवस्थामा थापा र कार्कीले पाँचांै विकेटका लागि अविजित ७८ रनको साझेदारी गर्नुभयो ।

शुक्लाफाँटाको बलिङमा सुशील रावलले दुई तथा कैलाश ऐर र वसन्त खत्रीले एक-एक विकेट लिनुभयो । यसअघि टस जितेर ब्याटिङ गरेको शुक्लाफाँटा ब्ल्याकबक्स फाउण्डेशनले २० ओभरमा सात विकेट गुमाएर १०९ रन बनायो । शुक्लाफाँटाका लागि किरण ठगुन्नाले सर्वाधिक २९ रन बनाउनुभयो भने विशाल ऐरले २३, रोशन साउदले १७ तथा बसन्त खत्रीले १३ रन योगदान दिनुभयो ।

धनगढी स्पोर्ट्स क्लबका बलर अमरसिंह रौटेलाले तीन विकेट लिनुभयो जुन क्रममा चार ओभरमा मात्र १० रन खर्चिनुभयो । भोजराज भट्टले दुई विकेट तथा दीपक ठकुरी र भुवन कार्कीले एक-एक विकेट लिनुभयो । प्रतियोगिता अन्तर्गत सातौं दिन शनिकार दुई खेल हुनेछन् ।

विहान ९ बजे युथ अफ टिकापुर र कैलाली मल्टिपल क्याम्पस तथा दिउँसो १ बजे सुदूरपश्चिमाञ्चल एकेडेमी र गरुडा नगरपालिकाबीच खेल हुनेछ ।

प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार रुपैयाँ पुरस्कार पाउनेछन् । प्रतियोगितामा काठमाडौं, रौतहट, दाङ, कैलाली र कञ्चनपुरका गरी १६ वटा टिमको सहभागिता छ ।