कांग्रेस र देश ठिक रूपमा नचलेको शेखर-गगन समूहको निष्कर्ष

काठमाडौं । नेपाली कांग्रेसका नेता डा. शेखर कोइराला र महामन्त्री गगन थापाले आफूहरूबीच कुनै समस्या नभएको प्रष्ट पार्नुभएको छ । बत्तीसपुतलीस्थित अनुपम फुडल्याण्डमा बुधबार बसेको इतर पक्षको भेलामा नेताहरूले पछिल्लो समय भएको विमतिको विषयमा प्रश्न उठाएपछि उहाँहरूले कुनै समस्या नभएको स्पष्टीकरण दिनुभएको हो । यस्तै, नेपाली कांग्रेसको संस्थापनइतर पक्ष डा.शेखर कोइराला र महामन्त्री गगन थापा समूहले अहिले नेपाली कांग्रेस र मुलुक ठिक ढंगले नचलेको निष्कर्ष निकालेको छ । बत्तीसपुतलीमा बुधबार बसेको इतर समूहको बैठकले उक्त निष्कर्ष निकालेको हो । राजनीतिक अराजकता बढेको, भ्रष्टाचार बढेको, विभिन्न काण्ड बाहिरिएको र भ्रष्टाचार तथा तस्करीका घटना बढ्दै गएको र सरकारले प्रभावकारी काम गर्न नसकेको उक्त समूहको निष्कर्ष छ ।

समूहमा कुनै समस्या छैन : डा. कोइराला
इतर समूहको नेतृत्व गरिरहनु भएका केन्द्रीय सदस्य डा. शेखर कोइरालाले नेपाली कांग्रेस र देशको अवस्था ठिक नरहेको टिप्पणी गर्दै भन्नुभयो, ‘अहिले नेपाली कांग्रेस र देश दुवै ठिक रूपमा चलेका छैनन् । तर, हाम्रो समूह ठिक रूपमा चलेको छ ।’ नेता डा. कोइरालाले आफ्नो नेतृत्वको समूहमा कुनै समस्या नरहेको दाबीसमेत गर्नुभयो । महामन्त्री गगनकुमार थापासँग मतभेद बढेको चर्चा भइरहेका सन्दर्भमा नेता कोइरालाले भन्नुभयो, ‘यो हाम्रो नियमित बैठक हो, केही महिनादेखि बस्न सकेको थिएन । हामीले त्यति धेरै चिन्तित हुनुपर्ने छैन । छलफल नहुँदा केही कुरा आएका थिए । तर, मिडियामा भनेजस्तो हाम्रो समूहमा कसैसँग कुनै मतभेद र विवाद छैन । नेपाली कांग्रेसको एउटा समूहले छलफल गर्दा ठूलो बनाउनु आवश्यक छैन । यो नियमित छलफल हो । यसलाई लिएर विवाद भएको, मतभेद बढेको भनेर टिप्पणी गर्नुको औचित्य छैन ।’

बैठकमा महामन्त्री गगन थापाले संवाद नहुँदा असमझदारी बढेको बताएकोप्रति लक्षित गर्दै कोइरालाले भन्नुभयो, ‘पहिले पनि त्यस्तो कुनै समस्या थिएन । म र गगनजीबीच एजेण्डामा कुनै पनि फरक मत छैन । एजेण्डामा म र महामन्त्रीबीच एक इञ्च पनि फरक छैन । उहाँको उमेर र मेरो उमेर फरक छ । उहाँको सोचाइ र मेरो सोचाइ फरक छ । कार्यशैली फरक छ । त्यसले मात्रै हो ।’

गगनको प्रस्ताव- ‘अब दलको नेता शेखरलाई बनाऔँ’
नेपाली कांग्रेसका महामन्त्री गगनकुमार थापाले अब सभापति शेरबहादुर देउवाबाट पार्टी चल्न नसक्ने बताउनुभएको छ । इतर समूहको बैठकलाई सम्बोधन गर्दै थापाले देउवाको कार्यशैली सुधार्न अझै दबाबको आवश्यकता रहेकोसमेत बताउनुभयो । देउवाबारे कडा टिप्पणी गर्नुभएका महामन्त्री थापाले अब देउवाबाट पार्टी नचल्ने निष्कर्ष सुनाउँदै भन्नुभयो, ‘संसदीय दलको नेता फेर्न आजैबाट लागौँ । अब शेखर कोइरालालाई बनाउन अघि बढौँ । देउवा नै नेतृत्वमा रहिरहने हो भने कांग्रेस योभन्दा अझै खराब अवस्थामा पुग्छ । देउवामा पार्टी चलाउने कार्यक्षमता छैन । महासमिति बैठक त समयमा गर्न नचाहने सभापतिले महाधिवेशन पनि समयमा गर्दैनन् । २०८२ मा कांग्रेसको १५औँ महाधिवेशन पनि हुँदैन ।’

बैठकपछि पनि महामन्त्री थापाले सभापति देउवालाई एउटा गुटको संरक्षकको संज्ञा दिनुभयो । पार्टीले प्रतिनिधित्व गर्ने हरेक ठाउँमा मापदण्ड नबनाई एकलौटी निर्णय गरिँदा नेता कार्यकर्तालाई अन्याय भएको जिकिर गर्दै महामन्त्री थापाले भन्नुभयो, ‘हामीले अहिलेसम्म मापदण्ड बनाउन सकेका छैनौँ । पार्टीमा एकदमै अन्याय भएको छ । पार्टीका सभापतिले सबैलाई न्यायपूर्ण व्यवहार गर्नुभएको छैन । पार्टी सभापति आफैँ एउटा समूहको संरक्षक भएका छन् । आफ्नो समूहलाई हेर्ने र अर्कोलाई हेर्ने नजर नै अर्को छ ।’ थापाले १४औँ महाधिवेशनबाट बनेको आफूहरूको समूह एकताबद्ध हुन नसकेको भन्दै असन्तुष्टिसमेत जनाउनुभयो । बैठकमा सभापतिको कार्यशैली र आगामी राष्ट्रियसभा निर्वाचनमा अपनाउनुपर्ने मापदण्डबारे छलफल गरेको जानकारी दिँदै महामन्त्री थापाले भन्नुभयो, ‘यो पटकको राष्ट्रियसभाको निर्वाचनमा दुईवटा कुरामा प्रष्ट हुनुपर्छ भन्नेमा हामी प्रष्ट छाँै । त्यो भनेको मापदण्ड र न्याय । कांग्रेसका तर्फबाट राष्ट्रियसभामा जाँदै गर्दा राष्ट्रियसभाको संविधान र राष्ट्रियसभाको जुन स्पिरिट छ, यो सबै कुराको आधारमा जो साथीहरू योग्य हुनुहुन्छ, जसले अहिलेसम्म मौका पाउनुभएको छैन, जसले यसअघि निर्वाचनमा भाग लिन पाउनुभएको छैन ती साथीहरूलाई पठाउनुपर्छ ।’

महामन्त्री थापाले आफू समूहमा बफादार रहेको स्पष्ट पार्दै भन्नुभयो, ‘समूहप्रति पूर्ण बफादार छु र शेखर दाइलाई नेता मान्ने र बनाउने कुरामा म जस्तो त्याग गर्न तयार छु । म र शेखर दाइको बीचमा कुनै मनमुटाव छैन भनेर कति भन्ने ? साथीहरूले धेरै खेल्दिनुभएन ।’

कोशीका मुख्यमन्त्री कार्कीको आलोचना
नेपाली कांग्रेसको शेखर कोइराला र महामन्त्री गगन थापा समूहको बैठकमा कोशी प्रदेशका मुख्यमन्त्री केदार कार्कीको आलोचना भएको छ । बुधबार काठमाडौंको बत्तीसपुतलीमा बसेको सो समूहको बैठकमा नेता गुरुराज घिमिरेले मुख्यमन्त्री कार्कीमाथि प्रश्न उठाउँदै भन्नुभयो, ‘कोशीमा केदार कार्कीलाई मुख्यमन्त्री बनाउने बेला महामन्त्री गगन थापा र मलाई जानकारी गराउनुभएन । त्यसले समूहमा अन्तरद्वन्द्व पैदा गरायो ।’ मुख्यमन्त्री कार्कीले पार्टीका महामन्त्रीमाथि सार्वजनिक रूपमा विरोध गरेको भन्दै आपत्ति जनाउनुभएका घिमिरेले भन्नुभयो, ‘मुख्यमन्त्री भएको दुई महिना भयो । मन्त्रिपरिषद् विस्तार गर्न सक्नुभएको छैन । काम गर्न छाडेर महामन्त्रीविरुद्ध सार्वजनिक अभिव्यक्त दिँदै हिँड्नुभएको छ । यो आपत्तिजनक छ ।’ गतसाता नेपाली कांग्रेस ओखलढुंगाको सम्मेलनमा मुख्यमन्त्री कार्कीले महामन्त्रीहरू अपरिपक्व देखिएको टिप्पणी गर्नुभएको थियो ।

महासमिति बैठक तोकिएको समयमा हुनुपर्छ : केसी
नेपाली कांग्रेसको इतर समूहका नेता जगदीश्वर नरसिंह केसीले महासमिति बैठक तोकिएको समयमा हुनुपर्ने बताउनुभएको छ । कांग्रेस नेता शेखर कोइराला–महामन्त्री गगन थापा समूहको बैठकमा केसीले महासमिति बैठक तोक्ने समयमा पुसमा जाडो हुन्छ भन्ने थाहा भएको भन्दै समयमै बैठक हुनुपर्ने बताउनुभयो । नेता केसीले राष्ट्रियसभाको चुनावमा अवसर नपाएका योग्य व्यक्तिको छनोट गर्नुपर्ने तर चुनाव हारेकालाई अवसर दियो भने स्वीकार्य नहुने चेतावनी दिनुभयो ।

राष्ट्रियसभा चुनावमा नयाँलाई अवसर दिनुपर्छ : गुरुङ
नेपाली कांग्रेस उपसभापति एवं कानुनमन्त्री धनराज गुरुङले आसन्न राष्ट्रियसभा चुनावमा कांग्रेसबाट सक्षम व्यक्तिले अवसर पाउनुपर्ने बताउनुभएको छ । शेखर कोइराला-गगन थापा पक्षका नेताहरूको भेलामा सहभागी भएर बाहिरिने क्रममा उपसभापति गुरुङले राष्ट्रियसभा चुनावमा कांग्रेसबाट सक्षम व्यक्तिले अवसर पाउनुपर्ने स्पष्ट पार्दै भन्नुभयो, ‘राष्ट्रियसभा चुनावमा पटक-पटक अवसर पाएकाले नभई कहिल्यै अवसर नपाएकाले नेतृत्व गर्न पाउनुपर्छ ।’

शेखर र गगनलाई मिल्न दबाब
इतर समूहको बैठकमा नेताहरूले डा. शेखर कोइराला र महामन्त्री गगन थापाबीच विवाद देखिएको भन्दै मिलेर अघि बढ्न सुझाव दिएका थिए । इतर समूहको बैठकमा बोलेका नेताहरूले डा. कोइराला र महामन्त्री थापाबीच दरार आएको समाचार सुनेको भन्दै मिलेर अघि बढ्न दबाब दिएका हुन् । नेताहरूले दुवैजनाको नाम लिएर यदि मिलेर अघि नबढेमा संस्थापनले अझै पेल्न सक्नेतर्फ सचेतसमेत गराएका थिए । केही समययता शेखर र गगनबीच मनमुटावको समाचार सार्वजनिक भएका थिए । त्यहीकारण गगन इतर समूहको बैठकमै आउन आनाकानी गर्नुभएको थियो । तर, डा. कोइरालाले उहाँसँग मंगलबार तीन घण्टा लामो वार्ता गरेपछि बुधबारको बैठकमा अधिकांश नेताहरू सहभागी थिए । महामन्त्री थापा पनि ढिलो गरी उक्त बैठकमा सहभागी हुनुभएको थियो ।