सुवासलाई भारतमा प्रतिष्ठित गल्फ उपाधि

हिमालय टाइम्स

Monday December 18, 2023

Read Time = 2 mins

प्रिन्ट संस्करण

खेलकुद

खेलकुद बिविध

A A- A+

काठमाडौं । नेपालका शीर्ष एमेच्योर गल्फर सुवास तामाङले भारतको प्रतिष्ठित आइजियु एमेच्योर गल्फ च्याम्पियनसिपको १२२औँ संस्करणको उपाधि जित्नुभएको छ । म्याच प्ले फम्र्याटमा भएको प्रतियोगिताको फाइनलमा सुवासले भारतका रोहितलाई पराजित गर्दै उपाधि जित्नुभएको हो ।

उहाँले नौ एण्ड सातको स्कोरका साथ भारतमा उपाधि जित्नुभयो । ३६ होलमा खेलिएको फाइनल खेलको २९औँ होलमा नौ होलको अग्रता बनाएपछि सुवासले उपाधि पक्का गर्नुभयो ।

१३औँ दक्षिण एसियाली खेलकुदमा दोहोरो स्वर्णपदक विजेता सुवासले यसअघि शनिबार दक्षिण अफ्रिकाका एल्टिन भान डर मर्वलाई हराउनुभएको थियो । त्यसअघि उहाँले पहिलो चरणमा भारतका कानव चौहान, प्रि-क्वाटरफाइनलमा विशेष शर्मा र क्वाटरफाइनलमा ध्रुव शुरीलाई पराजित गर्नुभएको थियो । उपाधि जितेपछि सुवासले आफूमा थप आत्मविश्वास बढेको प्रतिक्रिया दिनुभयो । उहाँले माथिल्लोस्तरको व्यावसायिक प्रतियोगिताले आफ्नो क्षमता तिखारिएको बताउनुभयो ।

सुवासले अघिल्लो वर्षदेखि भारतको बेंगलोरस्थित तरुण सर्देशाई गल्फ एकेडेमीमा प्रशिक्षण गर्दै आउनुभएको छ । नेपालका लागि एसियाली खेलकुदमा सहभागिता जनाउनुभएका उहाँले भारतमै खेल्न यसपटक सूर्य नेपाल गल्फ टुरको पहिलो प्रतियोगितासमेत गुमाउनुभएको थियो ।

उपाधि

गल्फ

खेलकुद

यो खबर पढेर तपाईलाई कस्तो महसुस भयो ?