काठमाडौं । आर्मीका सिर्जना पाण्डे, गजेन्द्र राई, पूर्णलक्ष्मी न्यौपाने र मुकेश पालको टिमले राष्ट्रिय मिक्स रिले दौडमा स्वर्ण जितेको छ । कीर्तिमानी धावक बैकुण्ठ मानन्धरको सम्मानमा एथलेटिक्स परिवार नेपालद्वारा आयोजित प्रतियोगिताको निर्धारित १० किलोमिटर दूरी आर्मीले ३२ मिनेट ५८.८६ सेकेण्डमा पूरा गर्यो । एक टिमबाट समान २-२ पुरुष÷महिला गरी खेलाडी दौडिएका थिए । प्रत्येक खेलाडीले २.५ किलोमिटर तय गर्नुपर्ने थियो ।
नेपाल प्रहरीका राममाया बुढा, सन्तोषनाथ योगी, सुमित्रा चौधरी र नागेश्वर अहिर ३३ मिनेट ४५.५६ सेकेण्ड समयमा दौड पूरा गर्दै दोस्रो हुनुभयो । ३४ मिनेट २२.७३ सेकेण्डमा दौड पूरा गरेका फूलमती राना, सञ्जीव नेपाली, सीमा चौधरी र राजेन्द्र तामाङ एपिएफको टोली तेस्रो भयो । शीर्ष तीन स्थान हात पार्नेले क्रमशः ३२ हजार, २४ हजार र १६ हजार नगद पुरस्कार पाउनुभयो ।
आर्मीका गजेन्द्र पुरुष खुला पाँच किलोमिटर दौडमा पनि स्वर्ण जित्न सफल हुनुभयो । उहाँले निर्धारित दूरी १६ मिनेट १०.९२ सेकेण्डमा तय गर्नुभयो । रजत र कांस्य पनि आर्मीकै खेलाडीले जिते । मुकेश पाल १६ मिनेट १२.४२ सेकेण्ड समयमा दोस्रो तथा सञ्जय श्रेष्ठ १६ मिनेट १६.८३ सेकेण्ड समयमा तेस्रो बन्नुभयो । सो स्पर्धाको महिलामा प्रहरीकी राममाया बुढा पहिलो हुनुभयो । राममायाले १८ मिनेट ५६.३५ सेकेण्ड समय निकाल्नुभयो ।
आर्मीकी पूर्णलक्ष्मी (१९ मिनेट १५.४८ सेकेण्ड) दोस्रो तथा आर्मीकै सिर्जना (१९ मिनेट ४०.८५ सेकेण्ड) तेस्रो हुनुभयो । पुरुष/महिला दुवैमा पहिलो हुनेले १० हजार, दोस्रोले सात हजार र तेस्रोले पाँच हजार नगद पुरस्कार हात पारे । खुलासहित मिक्स रिलेमा चौथोदेखि दसौँ स्थानमा आउनेलाई नगदबाट पुरस्कृत गरिएको थियो ।
भेट्रान पुरुष ४१ देखि ५० वर्ष उमेर समूहको पाँच किलोमिटर दौडमा च्यासलका राकेश महर्जन पहिलो, चापागाउँका नारायण देशार दोस्रो र काठमाडौंका मनिनकुमार महर्जन तेस्रो बन्नुभयो । पुरुष ५१ वर्षमाथि पाँच किलोमिटर दौडमा कीर्तिपुरका धर्म महर्जनले स्वर्ण, दाङका भीमबहादुर गुरुङले रजत र काठमाडौंका रेवतबहादुर दाहालले कांस्य हात पार्नुभयो । भेट्रान महिला ३५ वर्षमाथि पाँच किलोमिटर दौडमा एपिएफकी कृष्णश्वरी सिन्तकला पहिलो, थानकोटकी सर्मिला बस्नेत दोस्रो र बालाजुकी विनिता महर्जन तेस्रो स्थानमा रहनुभयो ।
विजयी खेलाडीलाई राष्ट्रिय खेलकुद परिषद् (राखेप) का उपाध्यक्ष शिव कोइराला, राखेपअन्तर्गत प्रशासन विभागका प्रमुख प्रेमबहादुर मल्ललगायतले एक कार्यक्रमबीच पुरस्कृत गर्नुभयो । सो अवसरमा एथलेटिक्स परिवार नेपालले दक्षिण एसियाली खेलकुदका कीर्तिमानी म्याराथन धावक बैकुण्ठ मानन्धरलाई एक लाख ११ हजार १११ रुपैयाँ नगदसहित प्रशंसा पत्रबाट सम्मान गरेको थियो । त्यसै अवसरमा एसियाली क्रसकन्ट्री एथलेटिक्सका स्वर्ण विजेता दीपक अधिकारीलाई पनि एथलेटिक्स परिवार नेपाल र बैकुण्ठ मानन्धर खेलकुद नेपालले समान १०-१० हजार नगदसहित प्रशंसा पत्र प्रदान गरी सम्मान गरेको थियो ।
प्रतियोगितामा ६ स्पर्धामा २५० खेलाडीले प्रतिस्पर्धा गरेको एथलेटिक्स परिवार नेपालका अध्यक्ष राजन खत्रीले जनाउनुभएको छ । सबै स्पर्धामा नगद पुरस्कार राखिएको थियो । आयोजकका अनुसार जम्मा दुई लाख ८० हजार नगद पुरस्कार वितरण गरियो । मिक्स रिले नेपालमै पहिलोपटक आयोजना गरिएको अध्यक्ष खत्रीले बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच