काठमाडौं । संस्कृति, पर्यटन तथा नागरिक उड्डयनमन्त्री सुदन किराँतीले नेपाल नागरिक उड्डयन प्राधिकरण(क्यान)का महानिर्देशक प्रदीप अधिकारीलाई नेपाल वायुसेवा निगमको ग्राउण्ड हृयाण्डलिङ नखोस्न चेतावनी दिनुभएको छ । क्यानको २५औँ वार्षिकोत्सव समारोहलाई सम्बोधन गर्दै उहाँले निगमको जीवन मानिएको ग्राउण्ड हृयाण्डलिङ क्यानले खोस्न नसक्ने बताउनुभयो ।
क्यानले मंसिर १५ गते निगमको ग्राउण्ड हृयाण्डलिङ खोस्ने निर्णय गरेको थियो । क्यानकोे उक्त निर्णयपछि निगम कर्मचारी आन्दोलनमा उत्रिएका थिए । निगम सुधार गर्न पनि नसक्ने, निगमका लागि दीर्घकालीन भिजन बनाएर काम गर्न नदिने र भएको सेवा पनि खोसेर राष्ट्रिय ध्वजाबाहकलाई बन्द हुन नदिने भन्दै प्राधिकरणलाई चेतावनीसहित अब निगमको विषयमा बहसै नगर्न मन्त्री किराँतीले खबरदारी गर्नुभयो ।
निगम राष्ट्रिय ध्वजाबाहक भएकाले उक्त विषय प्रधानमन्त्रीसँगको सरोकारको बनिसकेको र देशका सबै ठूला राजनीतिक दलको समेत चासोको विषय भएको उहाँको भनाइ थियो । सरकारले अर्को निर्णय नगरेसम्म उक्त विषय उठाए नीति र नेतृत्वमाथिकै हस्तक्षेप हुने भन्दै किराँतीले प्राधिकरणका कर्मचारीलाई चेतावनीसमेत दिनुभयो ।
निगमले ग्राउण्ड हृयाण्डलिङबाट वार्षिक चार अर्बभन्दा बढी आर्जन गरिरहेको छ । सो अवसरमा मन्त्री किराँतीले नेपालको पर्यटनमा भइरहेको विकासको गतिका कारण आगामी २५ वर्षमा नेपाल संसारकै नमुना हुने विश्वास व्यक्त गर्नुभएको छ ।
क्यानले गत आर्थिक वर्षमा तीन अर्ब ४९ करोड १५ लाख रुपैयाँ नाफा कमाएको छ । क्यानका महानिर्देशक प्रदीप अधिकारीले पछिल्लो एक वर्षमा क्यानको सबै खर्च कटाएर खुद सञ्चालन मुनाफा तीन अर्ब ४९ करोड १५ लाख रहेको बताउनुभएको हो । क्यानको आय एड्ओटिकलतर्फ ११ अर्ब ७२ करोड १७ लाख तथा ननएड्ओटिकलतर्फ एक अर्ब ७८ करोड ८६ लाख गरी जम्मा १३ अर्ब ५१ करोड तीन लाख आम्दानी भएको उहाँले बताउनुभयो ।
पुँजीगत खर्चतर्फ सात अर्ब ४४ करोड ३८ लाख, कार्य सञ्चालन खर्चतर्फ चार अर्ब २२ करोड ९९ लाख, आयकर तथा अन्य खर्च चार अर्ब १५ करोड पाँच लाख गरी १५ अर्ब ८२ करोड ८३ लाख खर्च भएको क्यानले जनाएको छ । क्यानका अनुसार क्यान स्थापनाको पछिल्लो २५ वर्षमा हवाई उडान एक सय ९२ प्रतिशतले वृद्धि भएको छ भने हवाई उडानमा यात्रा संख्या पनि तीन सय ६४ प्रतिशत र कार्गो शत प्रतिशतले वृद्धि भएको छ ।
क्यानको आर्थिक वर्ष २०५६/०५७ को आम्दानी ९१ करोड ८४ लाख रहेकोमा आर्थिक वर्ष २०७९/०८० मा १३ अर्ब ५१ करोड पुगेर १५ गुणाले वृद्धि भएको छ । सन् २०२३ को अन्त्यसम्म तीन अन्तर्राष्ट्रिय विमानस्थलसहित आन्तरिक विमानस्थल संख्या ५५ पुगेको छ । सन् २०२२ को नोभेम्बरसम्ममा त्रिभुवन र भैरहवा दुर्ईवटा अन्तर्राष्ट्रिय विमानस्थलबाट अन्तर्राष्ट्रिय हवाई यात्रा गर्ने यात्रुको संख्या २९ लाख ४५ हजार पाँच सय ४० रहेकोमा सन् २०२३ नोभेम्बरसम्ममा तीन अन्तर्राष्ट्रिय विमानस्थलबाट हवाई उडानमार्फत् यात्रा गर्ने यात्रुको संख्या ४१ लाख ५४ हजार तीन सय ९३ पुगेको छ ।
गत वर्षको सोही अवधिको तुलनामा यात्रु संख्या ४१.०४ प्रतिशतले वृद्धि भएको छ । आन्तरिक उडानतर्फ सन् २०२२ को नोभेम्बरसम्ममा कुल ५६ लाख ६८ हजार नौ सय ४१ हवाई यात्रुले यात्रा गरेकोमा सन् २०२३ नोभेम्बरसम्ममा ७७ लाख ९४ हजार दुई सय १७ पुगेर ३७.४८ प्रतिशतले वृद्धि भएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच