इस्लामावाद । तेहरानले पाकिस्तानी भूमिमा आक्रमण गरेको एक दिनपछि इरानस्थित ‘आतंकवादी आश्रयस्थल’लक्षित हवाई हमला गरिएको पाकिस्तानले बिहीबार जनाएको छ । इरानको दक्षिणपूर्वी क्षेत्रमा भएको विष्फोटमा परी तीन महिला र चार बालबालिकाको मृत्यु भएको इरानी सरकारी सञ्चारमाध्यमले जनाएका छन् । बिहीबार बिहान पाकिस्तानले इरानको सिस्टान-ओ-बलुचिस्तान प्रान्तमा आतंकवादी लुकेका स्थानलाई लक्षित गरी शृंखलाबद्ध सैन्य आक्रमण गरेको पाकिस्तानी विदेश मन्त्रालयद्वारा जारी विज्ञप्तिमा उल्लेख छ ।
इरानले पाकिस्तानमा मंगलबार राति ‘आतंकवादी समूह’विरुद्ध आक्रमण गरेको पुष्टि गरेपछि उक्त हमला गरिएको हो ।
पाकिस्तानको विदेश मन्त्रालयले भनेको छ, ‘ठूलो परिमाणमा आतंकवादी गतिविधि हुनलागेको विश्वसनीय गुप्तचर सूचनाको आधारमा बिहीबार हवाई आक्रमण गरिएको छ ।’ सरवन शहर वरपरका विभिन्न क्षेत्रमा विष्फोटको आवाज सुनिएको इरानको सरकारी समाचार संस्था इरनाले एक प्रान्तीय अधिकारीलाई उद्धृत गरी जनाएको छ ।
पाकिस्तानले बुधबार इरानबाट आफ्ना राजदूतलाई सोधपुछका निम्ति विदेश मन्त्रालयमा बोलाउनुअघि र तेहरानका राजदूतलाई देश फर्कनबाट रोक्नुअघि ‘पाकिस्तानको सार्वभौमिकताको अकारण र खुलमखुल्ला उल्लंघन’को निन्दा गरेको थियो । इराक र सिरियामा पनि ‘इरानविरोधी आतंवादी समूह’विरुद्ध आक्रमण गरेपछि पाकिस्तानमा जैश अल–अदल समूहलाई लक्षित गरी क्षेप्यास्त्र र ड्रोन आक्रमण गरिएको तेहरानले जनाएको थियो ।
तेहरान र इस्लामाबादले एकार्कालाई उनीहरूको भूमिबाट आक्रमण गर्न अनुमति दिएको आरोप लगाउँदै आएका छन् । तर, दुवैतर्फका आधिकारिक सेनाले आक्रमण गरेको विरलै पाइन्छ । इजरायलले गाजामा हमासविरुद्ध युद्ध लडिरहेको र यमनमा प्यालेस्टाइन समर्थक हुथी विद्रोहीले ‘रेड सी’मा कार्गो जहाजहरूमाथि आक्रमण गरेको समयमा इरानको हमलाले मध्यपूर्वमा थुप्रै संकट थपेको छ । बुधबार इरानका रक्षामन्त्री मोहम्मद रेजा अस्टियानीले तेहरानले आफ्नो सुरक्षाको कुनै सीमा नतोक्ने बताउनुभएको थियो ।
यसैबीच, इरान र पाकिस्तानको निकट साझेदार चीनले संयमित हुन आग्रह गरेको छ । विदेश मन्त्रालयका प्रवक्ता माओ निङले दुवैले ‘तनाव बढाउने खालका गतिविधिबाट बच्नुपर्ने’ बताउनुभएको छ ।
संयुक्त राज्य अमेरिकाले पाकिस्तान, इराक र सिरियामा इरानले गरेको आक्रमणको निन्दा गरेको छ । विदेश मन्त्रालयका प्रवक्ता म्याथ्यु मिलरले तेहरानले पछिल्ला केही दिनमा आफ्ना तीन छिमेकीको सार्वभौम सीमा उल्लंकन गरेको बताएका छन् ।
पाकिस्तानको आधिकारिक वक्तव्यमा बिहीबारको आक्रमण कहाँ गरिएको थियो भन्नेबारे केही उल्लेख छैन । पाकिस्तानी सञ्चारमाध्यमका अनुसार, यो आक्रमण दक्षिणपश्चिम बलुचिस्तान प्रान्तको पञ्जगुरनजिकै गरिएको थियो । आक्रमण हुनुभन्दा केही घण्टाअघि पाकिस्तानका कार्यवाहक प्रधानमन्त्री अनवर-उल-हक काकरले इरानी विदेशमन्त्रीसँग भेट गर्नुभएको थियो ।
‘पाकिस्तानको सार्वभौमिकताको यो उल्लंकन पूर्णतया अस्वीकार्य छ र यसको गम्भीर परिणाम हुनसक्छ’, पाकिस्तानको विदेश मन्त्रालयले जारी गरेको विज्ञप्तिमा भनिएको छ । आक्रमणमा दुई निर्दोष बालबालिकाको मृत्यु भएको र तीन बालिका घाइते भएको बताइएको छ ।
चीनले मध्यस्थता गर्ने
पाकिस्तान र इरानको सीमा क्षेत्रमा आतंकवादी लडाकूलाई लक्षित गरी हाले भएका आक्रमणपछि बिहीवार पाकिस्तान र इरानबीच मध्यस्थता गर्न इच्छुक रहेको बेइजिङले बताएको छ । पाकिस्तानी क्षेत्रबाट बिहीवार भएको आक्रमणमा कम्तीमा सातजना इरानी सर्वसाधारणको मृत्यु भएको तेहरानले बताएको छ । चिनियाँ विदेश मन्त्रालयकी प्रवक्ता माओ निङले नियमित पत्रकार सम्मेलनमा भन्नुभयो, ‘दुवै पक्षले शान्ति र संयमता अपनाउनेछन् र तनाव बढ्नबाट जोगिनेछन् भन्ने चीनको पूर्ण विश्वास छ ।’ उहाँले भन्नुभयो ‘यदि दुवै पक्षले चाहेमा स्थितिलाई कम गर्न रचनात्मक भूमिका निर्वाह गर्न पनि हामी तयार छौं ।’ इरान र पाकिस्तान चीनका मित्र राष्ट्र र महत्वपूर्ण प्रभाव भएका देश भएको भन्दै मध्यस्थताका लागि चीनको पहल रहने प्रवक्ता माओले भन्नुभएको छ ।
पाकिस्तानले इरानबाट राजदूत फिर्ता बोलायो
पाकिस्तानी विदेश मन्त्रालयले देशले इरानबाट आफ्नो राजदूत फिर्ता बोलाउने निर्णय गरेको छ । इरानद्वारा पाकिस्तानको सार्वभौमसत्ताको अवास्तविक र स्पष्ट उल्लंघन अन्तर्राष्ट्रिय कानून र संयुक्त राष्ट्र संघको बडापत्रको उद्देश्य र सिद्धान्तहरूको उल्लंघन भएको भन्दै आफ्नो राजदूत फिर्ता बोलाएको बताएको हो । एजेन्सी ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच