अभिनय गर्दा पात्रलाई हदैसम्म न्याय गर्न खोज्छु : विराज बास्कोटा, कलाकार

निकै संघर्ष र विभिन्न उतारचढावबीच आफूलाई निरन्तर कला क्षेत्रमा प्रस्तुत गरिरहनुभएको नाम हो विराज बास्कोटा । तेह्रथुमको चुहानडाँडामा जन्मिएर र झापामा बसोबास गर्दै आउनुभएका उहाँ पछिल्लो समय काठमाडौंलाई कर्मथलो बनाएर आफ्ना क्रियशन श्रोता/दर्शकमाझ पस्किरहनुभएको छ । बुबा खडानन्द बास्कोटा र आमा राधिका बास्कोटाको कोखबाट जन्मिनुभएका उहाँले झापामै रहँदा दुई दर्जनभन्दा बढी गीतमा अभिनय कौशल प्रदर्शन गर्नुभएको थियो भने पछिल्ला दुई वर्षदेखि काठमाडौंमा रहेर आफ्नो कला प्रस्तुत गरिरहनुभएको छ । म्युजिक भिडियो र नाटकमा अभियन गरिरहनुभएका विराजले गायनमा पनि आफूलाई प्रस्तुत गर्नुभएको छ । गायनभन्दा पनि अभिनयमा आफूलाई समर्पित गरेको बताउनुहुने उहाँले थिएटरको सुरुको स्कुलिङ पनि झापाबाटै लिनुभएको थियो । सुरुमा मण्डला थिएटरका प्रकाश दाहालसँग अभिनय सिक्नुभएका उहाँले विपिन कार्की, राजन खतिवडा, सुदीपसिंह कार्कीलगायतसँग अभिनय कौशल सिक्नुभएको छ । प्रमोद खरेल, अञ्जु पन्त, सिडी विजय अधिकारीलगायतका थुप्रै गायकगायिकाका गीतमा अभिनय गर्नुभएका विराजले बितामोर्डको सरगम संगीतालयबाट संगीतको कक्षा पनि लिनुभएको थियो । उहाँले गाएको गीत ‘तिहारै हाम्रो’ले फेष्टिबल अवार्डसमेत चुम्न सफल भएको छ । अभिनय सुरु-सुरुका दिनमा सजिलो लागे पनि जति बुझ्दै गयो त्यति गाह्रो लाग्ने उहाँको अनुभव छ । जहिले पनि अझै राम्रो गर्न पाए हुन्थ्यो भन्ने मनमा रहिरहने उहाँ बताउनुहुन्छ । अभिनयमा नै आफूलाई पूर्णरूपमा समर्पित गरेर यसैमा लागेको बताउनुहुने उहाँ आफ्नो अभिनयमा दुःखान्त, वियोगान्त, दीनदुःखी चरित्रदेखि हिरोइक तवरको फरक-फरक स्वाद प्रस्तुत गर्नुहुन्छ । कलाकार भएपछि सबै प्रकारको अभियन गर्न सक्नुपर्छ भन्ने मान्यता राख्ने विराजले आफूलाई भर्सटाइल कलाकारका रूपमा प्रस्तुत गर्दै आउनुभएको छ । अभिनय गर्दा पात्रलाई हदैसम्म न्याय गर्न खोज्छु भन्नुहुने कलाकार विराज बास्कोटासँग हिमालय टाइम्सका लागि गीता अधिकारीले गर्नुभएको संवादको संक्षिप्त अंशः-

यतिबेला के गर्दै हुनुहुन्छ ?
विभिन्न प्रस्तुतिका अभिनयमा नै आफूलाई प्रस्तुत गर्दै आइरहेको छु । यतिबेला पनि यसैसँग सम्बन्धित कार्यहरूमा नै आफूलाई व्यस्त बनाउने कोसिस गरिरहेको छु ।

यहाँले मोफसल अर्थात् झापाबाट पनि थुप्रै गीतका भिडियोमा अभिनय गर्नुभयो होइन ?
हो मैले झापाबाट नै धेरै गीतका भिडियोमा अभिनय गरेँ । मैले दुई दर्जनभन्दा बढी गीतमा त झापामै रहेर अभिनय गरेको छु ।

म नाटकबाटै उदाएको हुँ । म आफ्नो धरातल बिर्सन सक्दिनँ । म जहाँ पुगे पनि आफू कहाँबाट आएको थिएँ भन्ने कुरा नबिर्सिऊँ भन्ने लाग्छ । नाटकले मेरो हरेक क्षमतामा निखार ल्याएको हो । यसले गर्दा अहिले पनि निकै मस्त अनुभव गर्छु । मेरो प्यासन भनेकै अभिनय हो । यसमा आफैंलाई चुर्लुम्मै डुबाउन सकूँ भन्ने लाग्छ ।

कति भयो काठमाडौं आउनुभएको ?
आउनेजाने क्रम त रहिरहेको थियो तर पछिल्ला दुई वर्षदेखि यहीँ नै रहेर काम गरिरहेको छु ।

अहिलेसम्म को-को गायकगायिकाका गीतमा अभिनय गर्नुभयो ?
थुप्रै हुनुहुन्छ, केहीको नाम लिनुपर्दा प्रमोद खरेल, अञ्जु पन्त, सिडी विजय अधिकारीलगायत हुनुहुन्छ । यस्तै, मैले ‘सक्किगो नि’ सिरिजमा पनि काम गरेँ । नियमितरूपमै केही एपिसोडमा मैले अभिनय गरँे । त्यस्तै, धुर्मुस-सुन्तली फाउण्डेसनका विभिन्न कार्यक्रममा अभिनय गरेको छु ।

अहिलेसम्म आउँदा कतिजति गीतका भिडियोमा अभिनय गर्नुभयो होला ?
मैले तीन दर्जन बढी गीतका भिडियोमा काम गरेको छु । केही महिनाअघि सार्वजनिक भएको चलचित्र ‘लुंगा’मा र केही छोटो चलचित्रमा पनि अभिनय गरेको छु । त्यस्तै, दर्जन बढी नाटकमा मेरो अभिनय रहेको छ ।

अभिनय सिक्नुभयो कि ?
सिके नि । हुन त जहिले सिक्नुपर्छ । अध्ययन गरिरहनुपर्छ आफूमा अझ निखारता ल्याऊँ भन्ने लाग्छ । मैले सुरुमा मण्डला थिएटरका प्रकाश दाहालसँग अभिनय सिकेँ भने पछि विपिन कार्की, राजन खतिवडा, सुदीपसिंह कार्कीलगायतसँग अभिनय कौशल सिक्ने अवसर जुट्यो । यस्तै, हालै धुर्मुस-सुन्तली फाउण्डेसनका वर्कसपमा सहभागी भएको छु ।

गीत पनि गाउनुहुन्छ होइन ?
हो, गीत गाएको छु । तर पनि गायकभन्दा पनि आफूलाई अभिनयमा नै बढी संलग्न गराउन रुचाउँछु । बिर्तामोडको सरगम संगीतालयबाट संगीतको कक्षा पनि लिएँ । गायनमा पनि आफूलाई संलग्न गराउँदै आएको छु तर पनि अभिनयमा नै अझ बढी लाग्ने कोसिसमा हुन्छु । मेरो गायन र अभिनय रहेको चाडपर्व गीत ‘तिहारै हाम्रो’ले फेष्टिबल अवार्डसमेत प्राप्त गर्न सफल भएको छ ।

कस्तो अनुभव भयो अवार्ड उचाल्दै गर्दा ?
मैले अवार्ड पाउनकै लागि काम गरेको छैन । मेरो प्यासन भनेकै अभिनय नै हो । यसमा आफैंलाई चुर्लुम्मै डुबाउन सकूँँ भन्ने लाग्छ । यद्यपि आफूले गरेको कर्मको प्रतिफल कसैबाट पाउँदा झन् ऊर्जा मिल्ने र काम गर्न थप प्रेरणा मिल्ने रहेछ । केही पाउँछु भनेर मैले कहिल्यै अभिनय गरिनँ । म आफूले पाएको काममा आफूलाई शतप्रतिशत समर्पित गर्छु । अभिनय गर्दा पात्रलाई हदैसम्म न्याय गर्न खोज्छु ।

यहाँको पछिल्लो अभिनय रहेको गीतको भिडियो ‘छाती चरर’लाई दर्शकले औधी मन पराए नि ?
मेरा अन्य गीतजस्तै ‘छाती चरर’लाई दर्शकले औधी मन पराइदिनुभयो । सबैप्रति आभारी छु । गायिका शान्तिश्री परियार र तिलक बस्नेतको स्वर रहेको यस गीतले प्रेमको दुःखान्त अवस्था देखाएको छ । यस गीतमा मेरो अभिनयलाई मन पराइदिनुभएको छ, खुसी छु । अझै राम्रो गर्ने बाचा गर्दछु आमदर्शकमाझ ।

नाटकलाई निरन्तरता दिनुहुन्छ ?
म नाटकबाटै उदाएको हुँ । म आफ्नो धरातल बिर्सन सक्दिनँ । म जहाँ पुगे पनि आफू कहाँबाट आएको थिएँ भन्ने कुरा नबिर्सिऊँ भन्ने लाग्छ । नाटकले मेरो हरेक क्षमतामा निखारता ल्याएको हो । यसले गर्दा अहिले पनि निकै मस्त अनुभव गर्छु ।