काठमाडौं । राष्ट्रिय सभाअन्तर्गत दुईवटा विषयगत समितिका सभापति निर्विरोध निर्वाचित भएका छन् । दुई समितिको सभापतिका लागि शनिबार उम्मेदवारी दर्ता भएको थियो । सो क्रममा एकल उम्मेदवारी परेको हो । संघीय सबलीकरण तथा राष्ट्रिय सरोकार समितिमा एमालेका सांसद सोनाम गेल्जेन शेर्पा र विकास, आर्थिक मामिला तथा सुशासन समितिमा कांग्रेस सांसद कमला पन्तको मात्र उम्मेदवारी परेको छ । उनीहरूको उम्मेदवारीको प्रस्तावक भने फरक–फरक दलबाट रहेका छन् । एमाले सांसद शेर्पाको उम्मेदवारी प्रस्तावकमा माओवादी केन्द्रका सांसद गोपीबहादुर अछामी रहनुभएको छ भने समर्थकमा कांग्रेस सांसद दुर्गा गुरुङ र एमाले सांसद इन्दिरादेवी गौतम रहनुभएको छ । यता, सभापतिको लागि उम्मेदवारी दिनुभएकी कांग्रेस सांसद पन्तको प्रस्तावकमा कांग्रेस सांसद नारायणदत्त भट्ट रहनुभएको छ भने समर्थकमा एमाले सांसद शारदादेवी भट्ट रहनुभएको संसद् सचिवालयका सूचना अधिकारी दशरथ धमलाले जानकारी दिनुभयो । आइतबार दुवै समितिको बैठकले एक मात्रै उम्मेदवारलाई निर्विरोध निर्वाचित भएको घोषणा हुनेछ । राष्ट्रिय सभाको नियमावली, २०७५ को नियम १५० बमोजिम राष्ट्रिय सभाका विषयगत समितिका सभापतिहरूको निर्वाचन चैत ४ गतेका लागि तोकिएको थियो ।
राष्ट्रिय सभाअन्तर्गत रहेका चारवटा विषयगत समितिको सभापतिका लागि मुख्य चार राजनीतिक दलले मिलीजुली भागबण्डा गरेका हुन् । राष्ट्रिय सभामा रहेको चार विषयगत समितिमा नेपाली कांग्रेस, नेकपा एमाले, माओवादी केन्द्र र नेकपा एकीकृत समाजवादीले मिलीजुली सभापति भागबण्डा गरेका छन् । ‘चार पार्टीले मिलाएर सभापति लिएको हो । समझदारी जस्तै भएको छ ।’ समिति सभापति मनोनयनका लागि शनिबार दिउँसो १ बजेसम्म समय राखिएकोमा दुई समितिका लागि यसअघि भाग पाइसकेका दलबाहेक भाग पाउन बाँकी दुई दलबाट एक–एक जनाको उम्मेदवारी दर्ता भएको हो । एक जनाको मात्रै उम्मेदवारी दर्ता भएसँगै आइतबार समितिको बैठकमा उनीहरू निर्विरोध घोषित हुनेछन् ।
सभापति कायम रहेका अन्य दुई समितिमा माओवादी केन्द्र र एकीकृत समाजवादीका तर्फबाट सभापति छन् । विधायन व्यवस्थापन समितिमा नेकपा एकीकृत समाजवादीकी सांसद जयन्तीदेवी राई सभापति छिन् । यता, सार्वजनिक नीति तथा प्रत्यायोजित विधायन समितिमा माओवादी केन्द्रका सांसद मायाप्रसाद शर्मा सभापति रहनुभएको छ । राष्ट्रिय सभाको विषयगत समितिको सभापतिको भागबण्डा प्रमुख दलहरूबीच मिलीजुली रूपमा गरिएको माओवादी केन्द्रबाट राष्ट्रिय सभाका सांसद शर्माले जानकारी दिनुभयो । राजनीतिक दलहरूबीच राष्ट्रिय सभाका चार समितिमा भागबण्डा मिले पनि संयुक्त समितिका लागि सभापति चयन हुन सकेको छैन । दलहरूबीच भागबण्डामा कुरा नमिल्दा प्रतिनिधिसभा र राष्ट्रिय सभाका सांसदहरू सहभागी भएर बनेका संसदीय सुनुवाइ समिति र राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समिति सभापतिविहीन अवस्थामा रहेका छन् । यता, प्रतिनिधि सभाअन्तर्गत रहेको शिक्षा, स्वास्थ्य तथा सूचना प्रविधि समिति पनि सभापतिविहीन रहेको छ । सो समितिका सभापति रहेका भानुभक्त जोशी संघीय मामिला तथा सामान्य प्रशासन मन्त्री बनेपछि समितिको काम कारबाही नै प्रभावित बन्न पुगेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच