मुम्बई । चलचित्र अभिनेत्री कंगना रनौट हिमाचल प्रदेशको मण्डी लोकसभा निर्वाचन क्षेत्रबाट भारतीय जनता पार्टीको उम्मेदवार बन्ने भएकी छन् । आइतबार साँझ भाजपाले उम्मेदवारहरूको पाँचौं सूची जारी गरेको छ जसमा कंगनालाई मण्डीबाट टिकट दिइएको हो । कंगनाले एक दिन अगाडिमात्र चुनाव लड्ने संकेत दिनुभएको थियो । हिमाचल प्रदेशको कांगडास्थित बगलामुखी मन्दिरको दर्शन गर्न गएकी कंगनाले पत्रकारको प्रश्नको जवाफमा भन्नुभएको थियो, ‘माताको कृपा रहृयो भने मण्डी संसदीय सिटबाट अवश्य चुनाव लड्छु ।’
टिकट पाएपछि कंगनाले ट्वीट गर्दै भन्नुभयो, ‘मेरो प्यारो भारत र भारतीय जनता, मैले सधैं मेरो भारतीय जनता पार्टीलाई बिना सर्त समर्थन गरेको छु । भाजपाको राष्ट्रिय नेतृत्वले मलाई मेरो जन्मभूमि हिमाचल प्रदेशको मण्डीबाट लोकसभाको उम्मेदवार बनाएको छ ।’ पार्टीमा औपचारिक रूपमा सामेल हुन पाउँदा आफू सम्मानित र उत्साहित भएको उहाँले लेख्नुभएको छ ।
भाजपाले आइतबार लोकसभा चुनाव २०२४ का लागि उम्मेदवारहरूको पाँचौं सूची घोषणा गर्यो । यो सूचीमा १११ सिटका उम्मेदवारको नाम समावेश छ । पाँचौं सूचीमा विजेपीले उत्तर प्रदेशका १३ सिटका लागि उम्मेदवारको नाम पनि घोषणा गरेको छ । भाजपाले लोकप्रिय टेलिसिरियल रामायणमा रामको भूमिका निभाउनुभएका कलाकार अरुण गोविललाई मेरठ निर्वाचन क्षेत्रमा उम्मेदवार घोषणा गरेको छ ।
यस्तै, चर्चित नायिका हेमा मालिनी पनि निर्वाचनको मैदानमा उत्रिनु भएको छ । भाजपा सांसद एवं बलिउडकी ड्रिम गर्ल भनिने हेमा मालिनी उत्तर प्रदेशको मथुराबाट चुनाव लड्ने हुनुभएको हो ।
यस्तै, मेनका गान्धीलाई पनि उत्तर प्रदेशकै सुल्तानपुरबाट टिकट दिइएको छ । अभिनेता रवि किशन गोरखपुर लोकसभा निर्वाचन क्षेत्रबाट चुनाव लड्ने हुनुभएको छ । उहाँ गोरखपुरबाटै बीजेपी सांसद हुनुहुन्छ । भारतमा आउँदो अप्रिल १९ देखि जुन १ सम्म आमचुनाव हुँदैछ । चुनावबाट लोकसभाका ५४३ सदस्य छानिनेछन् । सात चरणमा चुनाव भएर जुन ४ मा नतिजा सार्वजनिक हुने यो विश्वकै सबैभन्दा ठूलो निर्वाचन हो ।
भारतको एक अर्ब ४० करोड जनसंख्यामध्ये ४४ दिन चल्ने चुनावमा ९६ करोड नागरिक मतदान गर्न योग्य छन् । भारतको संसद् (लोकसभा)को चुनावले नै नयाँ सरकार नेतृत्वमा ल्याउनेछ । चुनावमा भारतीय जनता पार्टी र कांग्रेस नेतृत्वको ४० पार्टी मिलेर बनेको गठबन्धन ‘आईएनडीआईए अर्थात् इण्डिया’ प्रमुख प्रतिस्पर्धी छन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच