प्रो भुवन र एमेच्योर राहुल शीर्ष स्थानमा

काठमाडौं । सूर्य नेपाल गल्फ टुर २०२३-२४ अन्तर्गत छैटौँ प्रतियोगिता, सूर्य नेपाल एनपिजिए टुर च्याम्पियनसिपको पहिलो दिन प्रो भुवन नगरकोटी र एमेच्योर राहुल विश्वकर्मा संयुक्तरूपमा शीर्ष स्थानमा रहनुभएको छ । उहाँहरूले ३-अण्डर ६९ को स्कोरमा पहिलो दिनको खेल पूरा गर्नुभयो ।

भुवन र राहुलले १८ होलको समाप्तिमा तीन प्रोफेसनल खेलाडीहरू रमेश अधिकारी, रवि खड्का र निरज तामाङ तथा एमेच्योर विजय श्रेष्ठ आइन्हाउसलाई १ स्ट्रोकले पछि पार्नुभयो । रमेश, रवि, निरज र विजयले आज २-अण्डर ७० को स्कोर दर्ज गर्नुभयो ।

एमेच्योर सद्भाव आचार्य १-अण्डर ७१ सहित सातौँ स्थानमा रहनुभएको छ । युवराज भुजेल, जयराम श्रेष्ठ, सञ्जय लामा र बलभद्र राई इभन–पार ७२ सहित संयुक्तरूपमा आठौँ स्थानमा रहनुभयो । गोकर्ण गल्फ क्लबमा भुवनले फ्रन्ट नाइन इभन-पार ३६ मा पूरा गर्नुभयो ।

उहाँले पहिलो होलमा एक सट खेर फाल्नुभयो । यसपछि दोस्रो, पाँचौँ र सातौं होलमा बर्डी प्रहार गर्दा आठ होलको समाप्तिमा २-अण्डरको स्थितिमा हुनुहुन्थ्यो । तर, नवौँ होलमा ओबी प्रहार गर्दा यो होलमा डबल बोगीको सामना गर्नुभयो । यसपछि ब्याक नाइनमा भने उत्कृष्ट प्रदर्शनसहित चार बर्डी प्रहार गर्नुभयो । १३औँ होलमा एक सट खेर फाल्नुभयो भने १०औँ, ११औँ, १५औँ र १७औँ होलमा बर्डीको सफलता प्राप्त गर्नुभयो । ब्याक नाइन ३-अण्डर ३३ मा पूरा गर्नुभयो ।

एमेच्योर गल्फर राहुलले प्रो गल्फरलाई कडा चुनौती दिने क्रममा फ्रन्ट नाइन ३-अण्डर ३३ मा पूरा गर्नुभयो । उहाँले बोगीरहित फ्रन्ट नाइन खेल्ने क्रममा पहिलो, चौथो र छैटौँ होलमा एक-एक सट बचाउनुभयो । ब्याक नाइन इभन-पार ३६ मा पूरा गर्नुभयो । १२औँ होलमा बोगी खेप्दा १५औँ होलमा एक सट बचाउनुभयो ।

संयुक्तरूपमा दोस्रो स्थानमा रहनुभएका रमेशले सुरूवात राम्रो गर्न सक्नुभएन । फ्रन्ट नाइन २-ओभर ३८ मा पूरा गर्नुभयो । पहिलो होलमा बोगी खेप्नुभयो भने तेस्रो होलमा बर्डी प्रहार गर्नुभयो । तर, ५-पारको सातौँ होलमा डबल बोगीको सामना गर्नुभयो । ब्याक नाइनमा भने उम्दा प्रदर्शन गर्नुभयो । १५औँ होलमा इगलको सफलता प्राप्त गर्नुभयो । यसपछि १६औँ र १७औँ होलमा बर्डी प्रहार गर्दा ब्याक नाइन ४-अण्डर ३२ मा पूरा गर्नुभयो ।

टुरको पाँचौँ प्रतियोगिता सूर्य नेपाल च्यालेन्ज जित्नुभएका रविले फ्रन्ट र ब्याक नाइन दुवै १-अण्डर ३५ मा पूरा गर्नुभयो । उहाँले छैटौँ, सातौँ, १५औँ र १८औँ होलमा बर्डी प्रहार गर्दा पहिलो र ११औँ होलमा एक-एक सट खेर फाल्नुभयो ।

यसैगरी धरानका प्रो निरजले तेस्रो र नवौँ होलको बर्डीविरूद्ध सातौँ होलमा बोगी खेप्दै फ्रन्ट नाइन १-अण्डर ३५ मा पूरा गर्नुभयो । यसपछि १५औँ होलमा एक सट खेर फाल्दा १३औँं र १८औँ होलमा बर्डी प्रहार गर्नुभयो । ब्याक नाइन १-अण्डर ३५ मा पूरा गर्नुभयो ।

एमेच्योर गल्फर विजयले उत्कृष्ट सुरूवात गर्दै फ्रन्ट नाइन ३-अण्डर ३३ मा पूरा गर्नुभयो । उहाँले पहिलो, तेस्रो, पाँचौँ र छैटौँ होलमा बर्डीको सफलता प्राप्त गर्नुभयो भने नवौँ होलमा एक सट खेर फाल्नुभयो । यसपछि १०औँ होलमा बर्डी प्रहार गर्नुभयो भने १६औँ र १७औँ होलमा एक–एक सट खेर फाल्दै ब्याक नाइन १-ओभर ३७ मा पूरा गर्नुभयो ।

प्रो तोरण शाहीले पहिलो दिन व्यक्तिगत कारण खेल सुरू हुनुभन्दा अगाडि नाम फिर्ता लिनुभयो । चार दिनसम्म चल्ने ७२ होलको प्रतियोगितामा ३२ प्रोफेसनल र १२ एमेच्योर गरी कुल ४४ गल्फरको सहभागिता छ । कुल आठ लाख ४० हजार नगद पुरस्कार राशि रहेको प्रतियोगिताको विजेताले एक लाख ४० हजार नगद पुरस्कार प्राप्त गर्नेछन् । दोस्रो र तेस्रो हुने गल्फरले क्रमशः ९६ हजार र ७२ हजार नगद हात पार्नेछन् ।

३६ होलको समाप्तिमा कट लागू हुनेछ । जहाँ उत्कृष्ट २१ खेलाडीले तेस्रो र चौथो दिनका लागि स्थान सुरक्षित गर्नेछन् । एमेच्योर खेलाडीको हकमा पनि कट बनाउन उत्कृष्ट २१ भित्र पर्नुपर्ने नियम रहेको छ । कट बनाउन सफल सबै प्रोफेसनल खेलाडीले नगद पुरस्कार प्राप्त गर्नेछन् ।