काठमाडाैं । कोशी प्रदेश सरकारको गौरवको आयोजना घिनाघाट-विराटचोक चार लेन सडकको बाँकी काम अन्तिम चरणमा पुगेको छ ।
निर्माण शुरु भएर चार वर्षसम्म म्याद मात्रै थपिरहेको सो सडकको काम अन्तिम चरणमा सम्पन्न पुगेको हो । पटकपटक म्याद थप गर्दा पनि काम अघि बढ्न नसकेको आयोजना पछिल्लो आठ महिनादेखि अलपत्र अवस्थामा रहेको थियो । घिनाघाट-विराटचोक २२.१९ किलोमिटरको सडक आयोजनाको बाँकी काम शुरु हुन लागेसँगै स्थानीयहरु काम सम्पन्न हुने आशमा रहेका छन् ।
कोशी प्रदेश सरकारले सार्वजनिक खरिद नियमावलीको १३ औं संशोधनमार्फत एक पटकका लागि म्याद थप गर्नसक्ने व्यवस्था गरेपछि घिनाघाट-विराटचोक सडकखण्डको बाँकी काम चाँडै सम्पन्न हुने निश्चित भएको हो । यस अघिको सार्वजनिक खरिद नियमावलीमा म्याद सकिनुभन्दा २१ दिनअघि नै म्याद थपको निवेदन दिनुपर्ने व्यवस्था गरिएको थियो ।
तर अन्तिम चरणमा रहेका आयोजनाहरू सम्पन्न गराउन सरकारले नियमावलीको उक्त मौजुदा व्यवस्था संशोधन गरेपछि अलपत्र अवस्थामा रहेको घिनाघाट-विराटचोक चारलेन सडक आयोजना अबको एक वर्षभित्रै सम्पन्न हुने पूर्वाधार विकास कार्यालय, मोरङका प्रमुख सुशील श्रेष्ठले बताउनु भयो । उहाँले कोभिड १९ का कारण र विभिन्न कारणले भएको मूल्य वृद्धिले पनि केही ढिलाइ भएको बताउनु भयो । अहिले १३ औं संशोधनमार्फत असार मसान्तसम्म म्याद थप गरेर काम पूरा गराउने पक्षमा लागेको बतउनु भयो ।
घिनाघाट-विराटचोक सडक तीन प्याकेजमा विभाजन गरी २०७६ सालदेखि बनाउन शुरु गरिएको थियो । सडकको विराट चोकदेखि नेता चोकसम्मको पहिलो प्याकेज र नेता चोकदेखि मिलन चोकसम्मको दोस्रो प्याकेज निर्माणको ठेक्का श्रेष्ठ-रमन-एपेक्स जेभीले पाएको थियो । २०७६ असार २९ गतेको सम्झौता बमोजिम दुवै प्याकेजको निर्माण कार्य २०७८ असार २८ गतेभित्र सम्पन्न भइसक्नुपर्ने थियो । तर हालसम्म दोस्रो प्याजकेजअन्तर्गतको नेता चोकदेखि मिलन चोकसम्मको १० किलोमिटर सडक निर्माणको काम सकिए पनि पहिलो प्याकेजको भौतिक प्रगति पनि ८८ प्रतिशतभन्दा उँभो बढ्न सकेको छैन । तथापि आगामी वर्षको असार मसान्तभित्रै बाँकी निर्माण कार्य सम्पन्न भइसक्ने ठेकेदार कम्पनीका प्रोजेक्ट म्यानेजर सौरभ दाहालले बताउनु भयो । कोरोना लगायतका कारणले पनि समस्या आएको बताउनु भयो । आफूहरुको पनि कमजोरी रहेको बताउँदै असारसम्ममा काम पूरा हुने बताउनु भयो ।
घिनाघाट-विराटचोक सडकअन्तर्गत मिलनचोकदेखि पुष्पलाल चोकसम्मको तेस्रो प्याकेजअन्तर्गत सिंघिया खोलाको पुलको काम भइरहेको छ । कोशी प्रदेश सरकारको भौतिक पूर्वाधार विकास मन्त्रालयका सडक महाशाखा प्रमुख रमेश श्रेष्ठले निर्माणको ठेक्का पाएको लामा-बानियाँ जेभीले पहिलोपटकको थप म्यादमा काम सम्पन्न गर्न नसकेपछि अहिले दोस्रोपटक म्याद थपको तयारी भइरहेको बताउनु भयो । दोस्रोपटक थपिएको म्यादमा पनि ठेक्का सम्पन्न नगरे उक्त निर्माण कम्पनीलाई कालोसूचीमा समावेश गर्ने चेतावनी दिनुभयो ।
तत्कालीन मुख्यमन्त्री शेरधन राईले २०७६ भदौ २३ गते शिलान्यास गरेको विराटचोक–घिनाघाट सडकलाई विराटनगर प्रवेश गर्ने कोशी राजमार्गको विकल्पका रूपमा हेरिएको छ । तर कछुवा गतिमा भएको सडक निर्माणको कामले अझै पनि पूर्णता नपाउँदा यो बाटो प्रयोग गर्नेहरूले सास्ती भोग्नु परिरहेको छ । -न्युज एजेन्सी नेपाल
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच